Sermon 105

Zem andern mâle stuont Mariâ ûf in einer inbrünstigen begirde, alle menschen ze ziehen, ze üeben, ze bringen unde ze wirken diu dinc, diu got von in begerte. Dar umbe ist ir leben ein strâfe gewesen aller gebrestelîchen dinge, wan si hât dar umbe mit den menschen ir wonunge gehabt, daz sie durch ir guot ebenbilde ze gote gezogen würden. Si hât getrôst die betrüebeten unde gesterket den gelouben unde versagte nieman ir rât. Aber nû fliehent guotschînende liute in klœster und in klûsen, daz sie ledic werden der anevâhtunge lîplîcher dinge. Ez ist guot, obe sie got dar inne lûter meinen? aber ez ist ze fürhten, etlîche meinen sich selber mêr dar inne dan got. Soliche sint weder juncfrouwen noch geistlîche liute noch geberer guoter dinge. Mariâ was ein juncfrouwe und ein geistlîcher mensche und ein gebererin gotes.

Si was ein juncfrouwe, wan kein crêatûre hete ruowe in ir sêle denne got alleine. Si was ein geistlîcher mensche, wan alliu ir werc, diu si zwischen ir unt gote worhte, diu vollebrâhte si nâch den aller edelsten tugenden, die si verstuont unde dar zuo si von gote vermant wart. Si was ouch ein gebererin gotes, wan si gotes in ir sêle mit tegelîcher gnâde nie vermissete. Dar umbe, swer Marien der juncfrouwen welle nâch volgen und ir leben êren unde zuo ir lobe komen wil, der muoz ein juncfrouwe sîn, daz ist, er muoz sîn selbes und aller dinge ledic sîn, sô er sich in der crêatûre mêr vindet dan in gote. Unde swer ouch Mariâ rehte êren wil, der muoz ein geistlîch mensche sîn, daz ist, er muoz durch gotes willen alle zît diu dinc lieber lâzen, diu er von eigem willen lieber behielte. Ouch swer ein gebererin gotes welle sîn, der muoz der minne gotes in sîme herzen niemer âne sîn, alsô daz er sich schame, sô im ein ander in tugenden vor gêt.

Zem dritten mâle stuont Mariâ ûf in wârer diemüetikeit und in dem vernihten aller crêatûre; wan si wart mit willen noch mit begir noch mit bœser meinunge nie berüeret, daz ir ieman solte undertân sîn noch dienen durch ir heilikeit willen. Solher diemüetikeit gehœrent driu dinc zuo. Daz êrste ist: iht. Der sol iht sîn, der sich in tugenden wil üeben alsô, daz er allez daz in dem leben besezzen habe, waz er von gote verstêt und erkennet, ê er ez ieman offenbâret. — Daz ander, daz der diemüetikeit zuo gehoeret, daz ist, daz wir uns alles des guotes, daz got in uns würket, als umb einen ougenblik uns selben niht süllen zuo eigenen, ob wir ez joch nâch sîm allerliebesten willen volbringen; wan ez ist sîn unde niht unser. — Daz dritte, daz zuo der diemüetikeit gehoeret, ist nihtesniht, daz ist: einem geistlîchen menschen sol vaste missevallen, sô ander an ime geergert werden von sînes groben lebens willen; und umbe daz sol er sich diemüetigen unde sol der aller diemüetigisten juncfrouwen Marîen diener unde nâchvolger sîn, von der diu êrsten wort sprechent ‘wirt erliuhtet’, wan si wart löbelich erliuhtet, dô si den willen gotes vollekomenlîchen erkante in dem volbringen der ê, dô si als an dem hiutigen tage Jêsum irn sun in dem tempel operte, des si ze keiner reinigunge niht bedorfte noch schuldic was. Mariâ diu juncfrouwe wart ouch erliuhtet, dô si sich in rehter minne ûz ir selber ze got erhuop über alle crêatûre und über ir eigen vermügen. Und umbe daz empfienc si eine solhe frîheit von gote, daz si keine sünde tuon mohte. Si wart ouch erliuhtet, dô si in dem liehte gotes erhaben wart, in deme si ir verstendicheit in keiner minnern liebe volbrâhte, denne ob si in dem selben puncte solte gestorben sîn. Dar umbe, swer Marîen die juncfrouwen welle êren, der sol ûz minne den willen gotes alsô besitzen, swaz er lîdens unde widerwertikeit über in verhenget, daz er des niemer beger ledic ze sîn, wan man liset niendert von ir, daz si got gebeten habe, daz er si lîdens überhüebe.

Der name Jêrusalem bediutet zweierleie: ein stat des frides und ein stat des gesihtes, unde diu zwei hât an ir gehabt Mariâ diu juncfrouwe, wan si hât in der wârheit ganzen friden gehabt und ist ouch diu stat, in der got nâch allem sînem willen geworht hât. Si hât ouch ein lûterz beschouwen gehabt in üebunge der tugende werc, wie si got ûz rehter minne möhte genuoc tuon. In der minne buoche sprichet diu brût ‘mîn liep ist mir und ich bin im.’ Daz ist: got ist einer minnenden sêle sô gar genuoc, daz si sô balde niemer begern mac, got sî ir ê bereiter ze gebenne; als sant Augustînus sprichet: got ist mir nêher dan ich mir selber bin. Und alsô ist der almehtige got unser vrouwen sô nêhe gewesen, daz er daz wesen irre sêle ê gelediget hât von dem vermügen, mit dem si sich mit gebresten möhte vereinet hân, ê danne si ez begerte unde suohte. Unde zuo dem hât si wol sprechen mügen ‘diu ougen mînes friundes hânt mich anegeblicket’, wan ez heizet wol ein aneblicken, sô sich daz lieht gotes in die sêle ergiuzet. Als Richardus sprichet über daz buoch der tugent: swenne daz götlich lieht die sêle durch gêt, sô wirt si ir selber als ungesmac in allen ir werken, daz si sich selber niht lîden mac an der tugent unde si tugentlich ist, sunder si helt sich des götlichen gesmackes. Unt dar umbe hât diu liebe juncfrouwe Mariâ wol sprechen mügen mit dem wissagen ‘wer gît mir vedern als einer tûben, daz ich fliegen müge zuo dem, den mîn sêle minnet?’ und ist als obe si sprêche: wer gît mir solhe vernunft, mit der ich mich über alle crêatûre erhebe und in zît über alle zît? Dâ von sprichet sant Augustînus: mîn sêle ist dâ mêr, dâ si minnet, denne dâ si dem lîchamen leben gît. Und alsô hât unser frouwe got alse verre gevolget, daz si weder ûf ir selber noch ûf keiner crêatûre geruowet hât mit keinem luste, sunder si wolte den alleine haben ze luste, der sich ir geben hete. Dar umbe sprichet von ir sant Johannes in dem buoche der tougen ‘ich sach ein wîp bekleidet mit der sunne unde hete den mâne under irn füezen und hete ûf irm houbete eine krône von zwelf sternen, wan diu sunne der gerehtikeit hât sî umbegeben unde hât geschinen in ir heiligen lîchamen unde hât den mâne under ir füeze getreten, daz ist den alten slangen, den tiuvel, mit allen irdischen dingen, und ist gekrœnet gewesen mit den zwelf sternen der vorderisten tugende, daz ist diemüetikeit, gedult, vorhte, miltikeit, barmherzikeit, miltidunge, mêzikeit, sterke, wîsheit, gloube, hoffenunge unde minne. Dar umbe, swer Marîen welle zuo gesellet werden, der üebe sich in den zwelf tugenden, ûf daz er ir müge nâch volgen in daz rîche der himel unde die gâbe enpfâhe, die got den sînen bereitet hât, unde sich dem gebe, der sich ime geben hât, dâ mite der geber unde diu gâbe, der würker unde daz werc einic sî, unser herre Jêsus Kristus, der mit dem vater unde mit dem heiligen geiste almehtiger got ist. Âmen.