Sermon 106

Über daz vrâget Origenes unde sprichet: waz frumes ist Marîen dâ von komen, daz si Kristum lîplich getragen hât? Zuo dem sprich ich mit im, daz Mariâ drîerleie nutze dâ von enpfangen hât. Der êrste was ein ganzîu hoffenunge ze erfüllen allen willen gotes, unde daz hât si selber an den worten beziuget, diu si zuo dem engel sprach ‘nim war, ich bin ein dierne des herren, geschehe mir nâch dîme worte.’ Der ander ir nutz ist gewesen, daz si dar umbe ist erhaben worden über alle crêatûre, an dem, daz si ist erwelt worden ein muoter der menscheit Kristî. Ir dritter nutz ist an dem gewesen, daz si Kristum geborn hât, von dem si enpfangen hât den lôn der muoter unde den lôn der juncfrouwe.

Diu ander vereinunge, die Mariâ von gnâden enpfangen hât, ist, als Hugo sprichet: waz ist gotes reht? in gnâden ze geben. Über daz sprechent die lêrer, daz Mariâ driu dinc in der gnâden einunge enpfangen habe. Des êrsten hât si enpfangen eine volkomene diemüetikeit, als si selber gesprochen hât ‘er hât angesehen sîner diernen diemüetikeit.’ Von der sprichet Gilbertus: daz ist eins diemüetigen menschen reht, daz er sich selber alsô überwunden habe, daz ime kein tugent in aller wîse unde gestalt niht swêre sî, in der diu nâtûre möhte ein verdriezen haben. Wan swer gote alsô stat in sîme herzen gêbe mit allen tugenden, in dem tête got alsô würken, daz er ledic unde lôz aller bildnisse würde. Wan in solher mâze was Mariâ alsô ledic, daz got alwege volle stat in ir ze würken hete nâch allem sînem willen. Daz ander, daz Mariâ in vereinunge der gnâden enpfangen hât, ist, als Damascênus sprichet: Mariâ hât allewege einen sundern zuoganc ze gote gehabt, in deme si alle zît niuwe wârheit empfienc, die si ûz minne âne mitel in uns giezende ist. Daz dritte, daz Mariâ genomen hât in der vereinunge der gnâden, ist ein erhebeta begirde ze gote, in der er ir alle zît genuoc ist nâch allem ir willen.

Diu dritte vereinunge, die Mariâ von genâden enpfangen hât, ist diu hœhste tugent der minne, in der si ze gote ist vereinet worden unde got zuo ir. Unde dâ bî sol man verstên, wie sich ein ieglîcher geist an gote hœhen sülle, daz er mit gote ein geist werde, nâch dem als sant Paulus sprichet ‘die gote anhangent die werdent ein geist mit gote.’ Ez ist der menschen gewonheit, daz in wênic smecket, swaz sie mit lîplichen sinnen niht begrîfen mügent. Dannoch sol man wizzen, daz diu wârheit sô lûter in ir selber ist, daz si niht alwege mit lîplichen bilden ze verstên ist, sunder si ist eteswenne ein wec, dâ von ime der mensche selber ein verstên machen mac. Als ich iezuo hie stên unde rede, und ob ich nû ze etewaz lust gewünne unde gêbe dem eine stat in mîme herzen, alsô daz ich niht enbern wolte ze wizzen, war umbe ez mir sô lustic wêre, sô formierte ich mir selber eine sache ûz andern lustigen dingen, dâ von mir daz selbe bilde ein vorspil wurde in mîner vernunft. Alsô ist ez ouch umbe die einikeit der minne. Dô Mariâ den lust verstuont, den si von der einikeit haben solte, dâ mite sich Kristus lîplîche in si vereinte unde mensche von ir wolte geborn werden, unde solte dannoch juncfrouwe belîben, unde diu verstendikeit was ir niht nâtürlich, sunder ein gâbe der genâden, wan in der minne der erkantnüsse gie si in sich unde von ir ze gote unde wart in der selben minne alsô erlustet und empfienc sô grôze süezikeit, als die lêrer gemeinlîche sprechent, daz si âne smerzen unde wê irn sun gebar aller dinge, diu wîplîcher persône in ir geberunge gemeinlîche zuostênt. Si wart ouch dar nâch alsô erlustet, ob si alliu gegenwürtigiu lîden gehabt hête, daz wêre ir alsô süeze ze tragenne gewesen, wan daz fiur der minne was alsô in ir enzunt, daz si in lîden kein verdriezen hête. Unt dar umbe list man niendert, daz si got habe gebeten, daz er si lîdens überhebet hête.

Zem andern mâle sol man diu wort des engels merken, die er zuo Marîen der juncfrouwen sprach ‘gegrüezet sîst dû voller genâden.’ Über diu wort wil ich einen sin sagen zem lobe der juncfrouwe Mariâ unde spriche, daz ir grœstiu êre, die si ûf erden gehabt hât, ist gewesen, daz ir wille dem willen gotes alwege vereinet was, unde daz selbe hete si lieb âne aller crêatûre helfe. Wan hête si in ir selber als umb einen ougenblik mê lustes gehabt von dem daz si Kristum nâch sîner menscheit gebar, denne in dem daz si in erkante nâch sîner gotheit, sô wêre ir kiuscheit îtel gewesen. Und umbe daz ist ein vrâge under den lêrern: ob Mariâ diu juncfrouwe von dem sêliger sî, daz si got in ir habe geistlîche geborn, dan Kristum nâch sîner menscheit. Über daz sprechen wir alle, daz ir diu geistlîche geburt habe mê sêlikeit brâht dan diu menschlîche geburt Kristî, diu in dem werke des heiligen geistes geschach. Wan an der selben geburt hete Mariâ niht mêr wan als vil si von gnâden der minne empfienc. Unde bî des engels gruoze sol man verstên die ledikeit irs geistes, wan Mariâ was als ledic von aller sorgveltikeit, daz si von der zît und si von gote berüeret wart ime ze volgenne, in sich selber nie gekêret wart an götliche gegenwürtikeit. Hie möhte eteswer vrâgen, wie daz sî, daz diu persône des suns ist gesant worden menschlîche nâtûre an sich ze nemenne ûz Mariâ der juncfrouwen und ist dannoch ûz der înfliezunge des vater schôze, diu der trôn gotes ist, enie gescheiden worden? Über daz sol man wizzen, dô der sun gotes menschlîche nâtûre an sich nam, in dem selben puncte gebar der vater sînen sun, der in dem vater aller dinge ein bildnisse was und ein einikeit irs wesens. Sô nam der sun nâch sîner persône an sich menschlîche nâtûre unde behielt dannoch die götliche nâtûre gemeine mit dem vater unde mit dem heiligen geiste, von den er einen ougenblik nie gescheiden wart. Wan ê Mariâ diu juncfrouwe ein muoter gotes wart nâch der menscheit, dô was si gotes muoter an der gotheit. Unde von der gebürte, daz si in gebar in der gotheit, dâ wider bilte sich diu geburt gotes in ir in der gotheit, daz er von ir mensche geborn wart.

Für baz ist ze wizzen, daz daz wort âvê bediutet stêtikeit, unde stêtikeit bediutet einen man. Der ist ein man, der in sînem muote niht gewandelt noch beweget wirt. Dar umbe, swenne ein wîp in ir muote niht gewandelt würde, sô wêre si ein man unde niht ein wîp. Die beide hâte Mariâ. Si was ein wîp nâch dem nidersten teil irs ûzern menschen und ist got in got mit got nâch dem obersten teil irs geistes. Und in dem sinne mügent alle menschen Mariâ sîn alsô, daz daz wort âvê zuo uns allen in der wârheit mac gesprochen werden. Âvê bediutet einen menschen, der in dem anvange gote dienen wil, daz ist: sô einen solhen aller armuot lustet unde daz im alliu betrüebnisse smecket unde fröude in allem lîden hât durch daz menschlîche bilde Jêsû Kristî unde gotes in sînem herzen niemer âne ist von der zît und er sînen willen zuo im gekêret hât. Ouch bediutet âvê wê in eime zuonemenden menschen, den lustet in dem im lîden niht lîden ist, alsô daz sîn wille niemer begert, daz im got lîden beneme. Ouch bediutet Âvê ein süezikeit, in der sich ein mensche von minne wegen sînem nêhsten undertân machet von der zît und er gotes in sînem herzen enpfunden hât unde hât in in keiner andern glîchnisse gegenwürtigen denne in der gelîchnüsse Jêsû Kristî. Âvê bediutet ouch einen menschen, der keinen andern schiuhet, der in umbe sînen gebresten strâfet. Eime zuonemenden menschen gehoeret ouch zuo, daz er keinen minnern ernst des enpfinden gotes gewinne denne er hâte, dô er gote von êrste anhuop ze dienen; wan ob ein solher über ein jâr oder zwei niht grœzern ernst des enpfinden gotes hête denne dô er anhuop gote ze dienen, sô hât er niht zuo genomen. Wan sant Augustînus sprichet: alle gedanke unde wort, diu ich rede, diu mir noch mîme nêhsten ze der êwigen sêlikeit niht nütze sint, diu wîsent mich an den wec der helle. Dar umbe ist der ein wârhafter zuonemer, der von gote niemer suochet noch begert, daz er ime lîden abeneme noch im keine crêatûre zuofüege, diu in troste. Er sol ouch mit der minne alsô durchgozzen sîn unde sîn selbes alsô ledic, ob er in wârheit weste, daz er des lîdens, daz in betrüebet, einen ougenblik niht solte âne sîn, daz er niemer deste minner ze keiner tugent verdrozener noch unwilliger sîn wolte.

Unde zuo einem solhen wirt billiche gesprochen: âvê, der den fride in gnâden der minne in ime besezzen hât. Der hât den fride in ime selber, des herze aller sorgen in der zît hie ledic stêt. Er ist wol âvê, den got alsô gefrîdet hât, daz in kein crêatûre mac hindern unde sîn selbes alsô ledic ist, daz er weder mit willen noch mit lust noch mit vernunft kein bilde noch gelîchnüsse besitzet dan daz bilde Jêsû Kristî, dem er in der wârheit dienet, unde dem lîden kein lîden ist. Dar umbe ist daz hôhe wort âvê in der zît geredet durch eine crêatûre, diu wesen hât in der obern zît, und ist zuo einer crêatûre geredet worden in der zît und ist erfüllet worden in der crêatûre, daz ist in der juncfrouwen Mariâ, in der alle tugende sint vollebrâht worden zuo unserm nutze. Wan der almehtig got, des gerihte unervarlich sint, der hât in manigerleie wîse sîne güete an uns erzeiget, und über daz, alsô was im mit grôzem gevallen ze muote, daz er wolte beschaffen die edeln crêatûre ob allen lûtern unde vernünftigen crêatûren, die sêligen juncfrouwe Mariâ, ûf daz sîn einiger mitewiger sun Kristus unser menschlîche nâtûre ûz ir an sich nême alsô, daz er weselîch ein gemeiner sun gotes des vaters wêre unde Marîen der juncfrouwen.

Dar umbe süllen wir got loben und ime danken umbe alle guottête, die er uns getân hât, unde sunder umbe die edeln unde richen gâbe, die er uns an Marîen der juncfrouwen geben hât. Wan allez guot, daz uns daz veterlîche herze gegeben hât, daz ist allez durch ir hende und ûz ir juncfröuwelîchem lîchamen geflozzen in dem âvê, daz si alse hiute enpfangen hât, daz ist Jêsum Kristum unsern herren, der mit got dem vater unde mit dem heiligen geiste hêrschet unde lebet êweclîche. Âmen.