Sermon 109

Dâ von sprichet Chrysostomus: der herre stuont zuo sîme gebete, unde bediutet ein lûter reinekeit, mit der ein mensche von sünden sol ûf gezogen sîn. Zem andern mâle sol man in diemüetikeit beten, sô kumt man zuo dem, als sant Augustînus sprichet: herre, der ist dîn bester kneht, der zem êrsten begert, daz er dînen willen erkenne und erfülle. Wan swer sich âne widerstên nâch dem willen gotes rihtet, der enmac ouch sînes willen niht âne sîn. Den wân hete sant Augustînus, dô er noch ungeloubic was unde sich bekêren wolte. Dô vorhte er, er enmöhte dar an niht bestên. Dô wart im zuo gesprochen: kêr zuo gote, der verlât dich niht und enpfâhet dich. Wan der sun gotes ist ein erbe sînes vaters in sîner götlichen klârheit unde ein bilde sînes êwigen wesens und ein ûftragendiu kraft aller dinge. Sant Augustînus sprichet: der klârheit, der man nâch dem leben enpfinden sol, der mac man hie in dem lîbe enpfinden. Daz ist: als vil sich ein mensche hie in diemüetikeit Kristô gelîchent, als vil wirt er ime gelîch an der klârheit in dem himele. — Zem dritten mâle sol man merken, waz man biten sol. Daz ist: als der herre Jêsus sprach ‘vater, êre dînen sun, daz ouch dich dîn sun êre. Dîn êre ist an dem, daz dû in gebest den êwigen lôn, die mich enpfangen hânt und in dich geloubent. Daz ist êwic leben, daz man dich erkenne einen wâren got unde Jêsum Kristum, den dû gesant hâst.’ Diu geschrift sprichet, swâ man eine persône nennet oder zwô, dâ sol man ouch die dritten verstên.

Under den meistern ist ein frâge: welichez der rehte kerne des êwigen lebens sî? Dar zuo sprechent sie, ez sî erkantnüsse, und etlîche sprechent, ez sî diu minne. Sô spriche ich: sie sint ez beide. Wan diu minne ist etwenne blint, wan swâ sî diu erkantnüsse hin leitet, dar ûf vellet si mit ganzer kraft. Dar umbe sprach der herre: vater, behalt mir mîn êre unde gib in daz êwige leben, daz ich in verheißen hân. Daz ist: swenne diu erkantnüsse got berüeret und er sî, sô enpfâhent ir alliu ungelîchiu dinc, diu uns gote ungelîch machent. Unde sprichet aber: ‘ich bite dich niht für die welt, sunder für die, die dû mir geben hâst ûz der welt. Die wîle ich bî in was, dô bewart ich sie, aber nû bewilhe ich sie dir, daz dû in gebest daz êwige leben, daz ich von dir genomen hân. Wan als vil der mensche got erkennet, als vil wirt er mit ime vereinet. Unt dar umbe, daz wir unser herze in die crêatûre sô vil ergiezent, sô werden wir uns selber frömde unde haben der selben dinge mêr erkantnüsse dan unser selbes. Aber ein rehter geistlîcher mensche erkennet sich selber baz dan ander dar umbe, daz er sich mit zîtlîchen dingen niht bekümbert.

Ez ist ze wizzen, daz sant Jeronimus von eime heiligen vater schrîbet, der Îsââk hiez, der selbe sprach: ein wesenlîch reinez gebet enist niht anders dan ein begern himelischer dinge in dem muote, der ein bilde der heiligen drîvaltikeit in der sêle ist, wan diu driu: vernunft, gehüegede unde der frîe wille heizent der muot. Ûz dem sol man ofte an Jêsum Kristum gedenken und an sîne dêmüetige gedult in allem sîme lîdenne und an sîniu werc, âne daz man gote niht gevallen mac, wan er ist diu tür des êwigen lebens. Dar umbe, swer ze gote rehte beten welle, der ensol niht anders biten, dan daz gotes êre unde lob ist und im selber nütze und sîme nêhsten ein bezzerunge. Und ein solichez gebet guoter meinunge enmac niemer bœse sîn, wan sîn anevanc sint alle tugende rehtes lebennes. Dar umbe, swer umbe zîtlîchiu dinc bitet, der lege alwege dar zuo, ob ez gotes wille sî unde sîner sêle nütze. Aber swer umbe tugende bitet, der endarf des niht sprechen, dar umbe, daz sie diu werc gotes sint. Wan swer einen turn andêhtiges gebetes bûwen wil, sô muoz tugentlîchez leben der anevanc sîn, daz daz gebet ziere unde ze got ordene. Daz andêhtige gebet ist als ein guldîniu leiter, diu den himel berüeret, an der man zuo gote stîget.

Dar nâch sprichet der vater Îsââk aber: man muoz vier staffeln gên, ê man zuo eime vollekomenen gebete kumet. Der êrste ist, daz man ûz dem herzen werfe den mist aller bôsheit, daz man got deste baz mit stêten gedanken vor den ougen der sêle müge haben. Der ander ist, daz man den herren Jêsum alsô sêre minne, ê man eine tôtsünde tête, daz man ê sterben wolte. Der dritte ist wâriu diemüetikeit mit erkantnüsse sîn selbes. Der vierde ist ein tegelîchez arbeiten nâch tugenden. Unde swer sich in den vier dingen üebet, des sêle wirt als ein pflûmveder: swenne diu niht beswêret ist, sô wirt si von eime lîhten lufte in die hœhe erheben. Alsô swenne diu sêle mit sünden niht beswêret ist, sô hât si daz von nâtûre, daz si sich gar lîhte in andâht ze gote erhebet. Der herre Jêsus sprichet ‘ir sullent âne underlâz beten.’ Über daz sprichet sant Thomas mit dem heiligen vater Îsââk: ze stêtem beten kumt man in vierleie wîse. Des êrsten mit eime wâren gelouben, mit starker hoffenunge unde mit götlicher minne. Des andern mâles sô man keine zît des gebetes versûmet tac unde naht, dar zuo man gebunden ist. Daz dritte ist, daz man die hitze des gebetes niht balde verlâze. Daz vierde, sô man sich flîzet alwege guote gedanken ze haben.

Nâch dem setzet er noch sehs andriu dinc des gebetes: wan wir enmöhten niht alwege unsern guoten frîen willen wider des tiuvels anweigunge behalten, erbêten wir es niht von gote in unserm andêhtigen gebete. Daz êrste gebet ist, sô man bitet umbe vergebunge der sünden, daz den sunder nôt ist, die sich von sünden niulîche gekêret hânt. Daz ander, sô man einen guoten fürsatz hât, bœsiu dinc ze lâzenne, oder des selben ein gelübede tuot, unde sô man in den lustlîchen dingen ein abebrechen hât, diu man halt etwenne âne sünde niezen möhte. Wan swaz man verheizet unde tuot, daz ist gote alwege genêmer dan daz man sus tuot. Daz dritte ist, sô man für ander menschen bitet, wan daz ist ein almuosen brüederlîcher minne. Daz vierde, sô man ein dancsagen hât der guottête gotes, daz under den vieren diu beste unde diu edeliste tugent ist. Daz fünfte gebet ist der paternoster, der under allen gebeten daz beste ist dar umbe, daz in der herre Jêsus Kristus selber gemachet unde gelêret hât, wan in dem ist allez daz beslozzen, daz uns nôt ist ze sêle unde ze lîbe, und ist, als sant Augustînus unde sant Thomas sprechent, daz wir got von ganzem herzen minnen unde begern des êwigen lebens unt daz wir niht mêr in sünde vallen unt daz unser wille nâch dem willen gotes geschehe unt daz er uns gebe daz tegelîche brôt sînes heiligen lîchames, von dem diu sêle lebet, unt daz er uns unser sünde vergebe und in versuochunge niht gefüeret werden unde von dem übel erlœset werden. Daz sehste heizet ein fiurigez gebet, daz alleine von herzen gêt âne munt ûz rehter andâht unde mit zehern der ougen, und ist daz volkomenste gebet, daz man tuon mac.

Nû ist ein frâge, ob ez den anhebern unde den sündern ouch geben werde? Zuo dem sprichet der vater Îsââk, daz ez den sündern ouch etwenne geben werde, aber ez ist in hie ofte mêr ein lôn dan ein künftigez verdienen. Wan sô ein mensche etwenne sîne sünde bedenket und ernstlîche merket, sô wirt er weinen unde kumt im etwenne ein freude, daz in zimt oder got habe im alle sîne sünde vergeben. Unde dar umbe sint sehsleie weinen, diu alliu verdienlich sint. Daz êrste ist, sô man die vergangenen sünde beweinet, dâ mite man got gelediget hât. — Daz ander ist, sô ez ûz grôzer begirde nâch gote getân wirt, als Dâvîden sîn zeher brôt wâren tag unde naht. Aber diu gnâde ist von den verre, die ir herze mit zîtlîchen dingen bekümbernt. Wol dem, der die zeher der riuwe hât, wan in got dâ mit in kurzer zît von allen sînen sünden reiniget, dâ von geschrieben stêt in dem buoche der tougen ‘die sint sêlic, die ir gewant weschent in dem bluote des lambes, daz ir lôn sî an dem holze des lebens, und în gênt durch die türe in die stat, daz ir nackeit niht erschîne.’ Über daz sprichet sant Augustînus: ô mensche, mache ûz dîme herzen ein buoch, in deme geschrieben sî klage, weinen unde wê. — Daz dritte weinen ist, sô man bedenket daz grôze lîden der helle, daz allen tôtsünden bereitet ist. Daz weinen hete sant Jeronimus, dô er sprach ‘ich ezze, ich trinke, ich slâfe, ich wache oder waz ich tuo, sô zimt mich oder diu stimme der bûsûne spreche alwege in mîniu ôren: stêt ûf, ir tôten, unde komet für daz gerihte gotes.’ — Daz vierde weinen ist, sô man die sünde des nêhsten beweinet, alse got der êwige vater getân hât, dem unser sünde sô vaste sint ze herzen gangen, daz er wolte, daz sîn einborner sun dâ für stürbe. — Daz fünfte weinen ist umbe die sêle, die in wîzen sint und ir buoze in grôzem lîden enden müezent, in dem sie nû erkennend ir versûmnüsse unt daz betrîegen der welt, wie wol in diu selbe riuwe ir lîdennes niht abe nimt. Dar umbe süllen wir unser gebet vor gote in zehern sæjen, sô werden wir unser fruht in dem êwigen lebenne mit freuden snîden unde sînen lôn enpfâhen. — Daz sehste weinen ist umb unser eigen gebresten, dâ mite wir tegelich umbe gên unde gehindert werden an unserr sêle sêlikeit. Dâ bî mügen wir wol erkennen, daz uns weinens nôt gêt, daz wir dort in daz êwige weinen komen, ûz dem Arsenius alsô geweinet hât, daz er tegelîche ein tuoch bî ime hete, dâ er sîne zehern mite abe wischte.

Ez sint sunder undern andern dinger sehs zeichen, dâ bî man erkennen mac, obe man erhôrt sî. Daz êrste ist eintrehtikeit des muotes unde fridesamkeit mit dem nêhsten. — Daz ander ist ein starker geloube, dâ von der herre Jêsus zuo sînen jungern sprach ‘ist iuwer geloube als ein pfenichkorn, swes ir bitet, des werdet ir gewert.’ — Daz dritte, daz man in dem gebete stête sî dar umbe, daz ez alwege verdienlîch sî, man werde erhôrt oder niht. — Daz vierde, sô man diu werc der barmherzikeit geistlîch unde lîplich erzeiget gegen andern. — Daz fünfte, sô einer sîn leben bezzert unde die bürde der sünde abe leit. — Daz sehste ist ein gedultigez lîden, wan mit dem wirt man Kristô aller gelîchest. Ûz den dingen mac man nemen, daz niht alleine die guoten menschen erhôrt werdent, sunder ouch die sünder. Wan sô ein andêhtig mensche in sîme gebete ein hoffenunge hât, er sî erhôrt, sô ist er âne zwîvel gewert. Wan sô vil sich des menschen muot mêr zuo dem gebete ordent unde von zîtlîchen dingen abekêret, sô er sich ie baz nêhent zuo der reinikeit des herzen. Wan der herre gienc dar umbe alleine ûf einen berc beten, daz er uns lêrte mit reinem herzen, mit ruowe unde mit eim abescheiden von der menige des volkes daz einige götlîche wesen sîner nâtûre an ze beten. Wan der herre Jêsus Kristus ist dar umbe mensche worden, daz wir durch die menscheit in got den vater gên möhten. Dar ûf sprichet Gregorius: ez sint mit grôzem siufzen die zeher von unserm schepfer ze biten. Wan etlîche hânt die gâbe enpfangen fridesamlîche ze reden unde ze beschirmen die gedrückten und ir guot den armen ze geben unde hânt die hitze des gelouben; aber sie hânt noch die gâbe der zeher niht. Wan sô etlîche der helle pîne beweinet hânt, die hebent dar nâch an ze weinen, daz in daz rîche gotes verzogen wirt. Wan in dem beschouwet der geist, wer die engelischen kœre sîn unde waz die geselleschaft der sêligen sîn unde waz diu majestât des götlichen anesehens sî. Und ûz dem wirt der mensche mê beweget ze weinen, daz er dem êwigen guote niht sol gegenwürtic sîn, dan er vor der helle pîne ûz vorhte beweinet hât. Und wie wol ez niht sîn muoz, daz man zuo der riuwe alwege zehern habe, sô ist ez doch ein zeichen grôzer minne, dâ die zeher mit der riuwe zuo loufent. Wan dô Mariâ Magdalênâ zuo Kristô grôze minne hete, dô schepfete si ouch von dem brunnen sîner gnâde die riuwe über ir sünde mit flüzzigen zehern, dâ mite si im sîne füeze wuosch, umbe daz ir vil sünde vergeben wurden. Unt dar umbe, muoz man von nôt über die sünde riuwe hân, sô ist ouch dar zuo gar guot, daz diu riuwe mit zehern gewaschen werde.

Wan diu riuwe, diu âne zeher kumt, daz ist ein zeichen eins harten herzen und einer unvolkomenen riuwe. Aber die ir zeher nû in gewonheit brâht hânt, den sint sie ouch gehôrsam, swenne sie sich ze andâht gebent, ez sî ze betrachten daz lîden Jêsû Kristî oder etwaz von gote ze biten, unde mit ir zehern tringent sie in, daz er in niht lange versagen mac. Zuo andâht ist diu naht für den tac ze nemen. Daz hât Antonius wol bewîset, dô er die ganze naht kniende bette, unde dâ an dem morgen diu sunne ûf gie, dô schrei er: ô dû ûzwendigez lieht, wiltû mir aber die inwendigen sunne vertrîben, diu in mîme herzen ûf gegangen ist? unde klagete, daz ime der tac aber unnützelîche solte hine gên. Unt daz die zeher der riuwe guot sîn, daz hât uns der herre Jêsus an sant Pêter bewêret, wan dô er sîn verlougente unde der wort gedâhte, diu der herre vor zuo im geret hâte, dô nam er riuwe unde gie ûz unde weinte bitterlîche, in dem er gnâde unde vergebunge der sünde vant. Ez erwarp ouch Ezechias der künic von Jerusalem mit sînen zehern, daz der engel gotes sîner viande, die in umbeleit heten, in der êrsten naht ersluoc hundert tûsent unde fünf und ahtzic tûsent in ir gezelten. Er erwarp ouch mit sînen zehern, daz ime got fünfzehen jâr sîner tage zuo gap, dô er solte gestorben sîn. Dô Nabuchodonosor got niht erkennen wolte, als er solte getân haben, dô nam im got sîn rîche unde wart, daz er heu az als ein ohse unz daz er erkante, daz der oberiste got aller rîche gewaltic ist. Wan dô er sîniu ougen in den himel erhuop, dô lobete er den hœhsten got unde weinte sô vil, daz ime sîniu ougen wurden als ein rôhez fleisch. Ouch dô keiser Theodosius in einer gêhe liez siben tûsent menschen tœten, der kam dar nâch zuo sô grôzer riuwe unde diemüetiger vorhte durch die brede sant Ambrosii, daz er sich bœser schatzte dan alle sünder unde vergôz sô vil zeher mit weinen, daz er daz estrich in der kirche naz machte, unde kam ze gnâden. Dar umbe ist ez ein sêliger gebet, daz mit zehern ze gote gesant ist, wan ez ist unmügelich, oder man erwerbe dâ mite die gnâde gotes unde vergebunge der sünden unde daz êwige leben. Daz verlihe uns got der vater unde der sun unde der heilige geist. Âmen.