Sermon 57

Er meinet, daz wir vrîlich und unbeweget funden werden, sô man uns sprichet, daz wir valsche und unwârhafte liute sîen und swaz man von uns gesprochen mac, dâ mit wir unsers guoten liumden beroubet werden, und niht alleine daz man uns übele sprichet, mêr: ouch daz man uns übel tuot und man uns abeziuhet die helfe, der wir zuo unsers lîbes nôtdürfte niht enbern mügen, und niht alleine an der nôtdurft zergenclicher dinge, mêr: ouch daz man uns schaden tuot an unserm lîbe, daz wir siech werden oder swaz pîne daz ist, diu uns ze lîplîcher arbeit gefürdern mac, unde sô wir in allen unsern werken getuon daz allerbeste, daz wir erdenken kunnen, und uns daz die liute kêrent zuo dem aller bœsten, daz sie erdenken künnent, unde daz wir daz niht alleine von den liuten lîden, mêr: ouch von gote, alsô daz er uns enziuhet sînen gegenwürtigen trôst unde sô er rehte tuot, als ein mûre zwischen uns und ime gemachet sî, unde sô wir mit unsern arbeiten zuo ime komen, trôst unde helfe suochen daz er denne gegen uns tuot, als er sîniu ougen vor uns beslîeze, alsô daz er uns weder sehen noch hœren welle und er uns alleine lât stân vehten in unsern nœten, als Kristus von sînem vater gelâzen wart: sehent, hie solte wir uns in sîner götlîchen nâtûre verbergen, daz wir alsô ungeneiget stüenden in unserm untrôste, uns mit dekeiner sache ze behelfenne wan alleine mit dem worte, daz Kristus sprach ‘vater, aller dîn wille werde vollebrâht an mir.’

Got ist ein sôgetân wesen, daz man ez niht baz bekennet denne mit nihte. Wie mit nihte? Daz man abe lege allez mitel, niht alleine die welt versmâhen unde tugende haben, mêr: ich muoz die tugent lâzen, sol ich got sunder mitel sehen; niht alsô, daz ich die tugent versmâhe, mêr: diu tugent sol in mir wesentlich sîn und ich sol ob der tugende wesen. Wan sô des menschen gedank enkein dinc niht enrüeren mac, dan aller êrste rüeret er got. Ein heidenischer meister sprichet, daz nâtûre über nâtûre niht enmac. Dâ von mac got von keiner crêatûre bekant werden. Sol er bekant werden, daz muoz geschehen in einem liehte über nâtûre. Die meister habent eine vrâge, waz daz meine, sô got die sêle erhebe über sich selber und über alle crêatûre und er sî heim gefüeret in sich selber, war umbe enedelt er denne den lîp niht, daz er irdenischer dinge niht bedörfte? Diz berihtet ein meister — und ich wêne, ez sî sant Augustînus — unde sprichet alsô: wenne diu sêle kumet zuo der götlîchen einunge, denne aller êrst ist der lîp volkomenlîch dar zuo komen, daz er alliu dinc niezen mac ze gotes êren. Wan durch den menschen sint alle crêatûre ûz geflozzen, unde waz der lîp redelîche der crêatûren geniezen mac, daz ist der sêle niht ein abeval, mêr: ez ist ein zuovluz ir wirdekeit, wan diu crêatûre enmöhte edelern widerfluz niht vinden, in ir ursprunc wider ze komenne, denne in dem gerehten menschen, der ie einen ougenblik sîner sêle gestatte, daz er ûf gezogen wart in götlîcher einunge. Wan zwischen gote unde der sêle ist denne dekein hindernüsse, und alsô verre diu sêle gote volget in die wüestenunge der gotheit, alsô verre volget der lîp dem lieben Kristô in die wüestenunge des willigen armüetes, und als diu sêle vereinet ist mit der gotheit, alsô ist der lîp vereinet mit würkunge gewêrer tugende in Kristô. Sô mac der himeische vater wol sprechen ‘diz ist mîn lieber sun, in deme ich mir selber wol gevalle’; wan er hât niht alleine in die sêle geborn sînen eingebornen sun, mêr: er hât selbe sî geborn sînem einbornen sune.

Eyâ, von dem aller tiefesten herzen! Mensche, waz mac dir herte oder scharpf sîn ze lîdenne, wenne dû rehte betrahtest, daz der, der dâ was in der forme gotes und in dem tage sîner êwikeit in dem schîme der heiligen unde der dâ vor geborn was ein schîn und ein substancie gotes, daz der kome zuo dem karcher unde zuo dem lîme dîner smeckenden nâtûre, diu alsô unreine ist, daz alliu dinc, swie reine sie sint diu ir genâhent, diu werdent smeckende und unreine, und er doch durch dînen willen genzlîche dar în wolte gestecket werden? Waz ist, daz dir niht süeze sî ze lîdenne, swenne dû ze semen lîsest alle die bitterkeit dînes herren unde gotes und swenne dû wider gedenkest aller der bitterkeit und alles des lasters, daz ûf in viel? welich schande und laster er leit von den fürsten unde von den rittern unde von den bœsen knehten unde von den, die den weg ûf und nider giengen für daz kriuze? wie diu klârheit des êwigen liehtes verspiuwen unde verspottet unde geitwîzet wart? Eyâ, wie ein grôz unverschult barmherzikeit und wol bewêrtiu minne, diu mir an keiner stat nie volkomenlîcher bewêret wart als an der stat, dâ der minne kraft durch sîn herze brach! Alsô mache dir ein gebündelîn von aller hande bitterkeit dînes herren unde gotes unde lâz ez alle zît zwischen dînen brüsten wonen und sich an unde beschowe sîne tugende, wie fürderlîch er dîn heil in allen sînen werken zuo hât brâht, unde sich, daz dû im mit dem selben gelte widermezzest sînen schemelîchen lesterlîchen tôt und sîne pîn lîdende nâtûre, mit der er âne schulde für dîne schulde geliten hât, als ez sîn eigen schulde wêre, als er selber sprichet in dem prophêten von sîner pîne, dâ er sprichet ‘sehent, diz lîde ich von mînen schulden,’ unde wâ er sprichet von der fruht sîner werke, dâ sprichet er ‘sehent, disen rîchtuom sulnt ir besitzen von iuwern werken!’ unde nennet unser sünde sîne sünde unde sîn werc unseriu werc, wan er hât unser sünde gebezzert, als er sie selbe gewürket hête, unde wir besitzen die verdienunge sîner werke rehte als wir sie gewürket haben. Unde diz sol unser arbeit ringe machen, wan der guote ritter klaget sîner wunden niht, sô er den künig an siht, der mit ime verwundet ist. Er biutet uns ein tranc, daz er vor getrunken hât. Er enbiutet uns niht, er habe ez ê vorgetân oder geliten. Dar umbe sulle wir grôze minne ze lîden hân, wan got nie niht anders getet die wîle er ûf ertrîche was. Daz wir alsô unser menschlîche nâtûre und alle unser krankheit in götlîcher nâtûre übergên und verlieren, daz an uns niht funden werde dan lûter guot, des helf uns got. Âmen.