Sermon 58 — Well done, good and faithful servant

Nû merkent dise rede. Als verre als der mensche sîn selbes verlougenet dur got unde wirt vereinet mit gote, als verre ist er mê got dan crêatûre. Swenne der mensche sîn selbes zemâle lidig ist dur got und er niemande ist dan got alleine unde dur niht enlebet dan dur got alleine, sô ist er wêrlîche daz selbe von gnâden, daz got ist von nâtûre, unde got bekennet sîn selbes enkeinen underscheit enzwischen im unde disem menschen. Ich hân aber gesprochen: von gnâden. Wan got der ist unt dirre mensche ist, und alsô als got guot ist von nâtûre, alsô ist dirre mensche guot von gnâden, wan gotes leben unde sîn wesen ist in disem menschen alzemâle. Har umbe hât er disen menschen guot geheizen, unde diz ist daz wort, daz unser herre sprach ‘guoter kneht,’ wan dirre kneht ist guot bî gote in keiner anderen güeti denne dâ got guot ist. Ich hân etwenne mê gesprochen, daz gotes leben unde wesen sî in einem steine als in einem holze und ouch in andern crêatûren, die doch niht sêlic sint. Got der ist in disem knehte in einer anderen wîse, dâ abe er sêlic ist unde guot, wan er ist in ime lustberlîche unde lebet in ime unde mit im frölîche unde vernünfticlîche als in im selben unde mit im selben; her umbe ist er sêlic unde guot. Her umbe sprichet unser herre ‘gang în, guoter kneht getriuwer, in die fröide dînes herren, wan dû getriuwe bist gewesen über kleine, dar umbe wil ich dich setzen über allez mîn guot.’ Nû hân ich ein teil gesprochen von sîner güete, war umbe dirre kneht guot ist; nû wil ich iu bewîsen von sîner getriuwe, wan unser herre sprach ‘guoter kneht getriuwer, wan dû getriuwe bist gewesen über kleine, dar umbe wil ich dich setzen über allez mîn guot.’

Eyâ nû merkent, waz daz kleine sî, über daz dirre kneht getriuwe ist gewesen. Allez, daz got geschaffen hât in himelrîche und in ertrîche, daz er selber niht enist, daz ist kleine vor ime. Über allez diz ist dirre guoter kneht getriuwe gewesen. Wie daz sî, daz wil ich iu bewîsen. Got hât disen kneht gesazt zwischen zît und êwikeit. Zuo keime was er geeigent, sunder er was frî mit vernunft unde mit willen und ouch in allen dingen. Vernünfticlîche durgienc er alliu dinc, diu got geschaffen hât; willeclîche liez er alliu dinc und ouch sich selber und allez daz, daz got geschaffen hât, daz got selber niht enist; vernünfticlîche nam er sie ûf unde gab gote êre unde lop und antwerte sie gote in sîne grundelôsen nâtûre unde sich selbe, als verre als er geschaffen ist. Dâ liez er sich selber und alliu dinc, daz er sich selber nie berüerte noch kein geschaffen dinc mit sîme geschaffen willen. Mit guoter wârheit, der alsus getriuwe wêre, got der hête in ime als unsprechlîche grôze fröide, der in die fröide benême, der benême im sîn leben unde sîn wesen unde sîne gotheit alzemâle.

Ich spriche aber mê (erschrikent niht, wan disiu fröide diu ist iu nâhe und ist in iu): ez ist iuwer keiner sô grob noch sô kleine mit verstântnisse noch sô verre, er müge dise fröide in ime vinden in der wârheit als si ist mit fröide unde mit verstânne, ê daz ir tâlanc ûz dirre kilchen koment, jâ ê daz ich tâlanc gebredie, er mag ez allez wêrlîchen in im vinden unde leben unde haben als daz got got ist und ich mensche bin, des sint gewis, wan ez ist wâr unde dîn wârheit sprichet ez selber unde daz wil ich iu bewîsen mit einem gelîchnisse, daz stêt geschriben in einem êwangelio.

Unser herre saz zuo einem mâle ob einem brunnen, wan er was müede. Dô kam ein wîp diu was ein Samaritânâ von dien heiden, unde si brâhte einen kruog und ein seil und wolte wazzer gewinnen. Und unser herre sprach zuo ir ‘wîp, gip mir ze trinken.’ Unde si antwurte im unde sprach ‘war umbe heischest dû mir trinken? nû bistû doch von dien juden und ich bin ein Samaritânâ und unser ê und iuwer ê hât enkeine gemeinschaft mit einander.’ Dô antwurte unser herre unde sprach ‘wüstist dû, wer dir trinken heischet, unde bekantist die gnâde gotes, vil lîhte dû hieschest mir trinken und ich gêbe dir von dem lebendigen wazzer. Swer dâ trinket von disem wazzer, daz ich gibe, den dürstet nûmmê unde von im sol entspringen ein brunne des êwigen lebendes.’ Daz wîp marhte diu wort unsers herren, wan si gienc niderre dicke zuo dem brunnen, unde sprach ‘herre, gib mir trinken des wazzers, daz mich niht mê dürste.’ Dô sprach unser herre ‘gang unde bring dînen man.’ Unde si sprach ‘herre, ich enhabe enkeinen man.’ Dô sprach unser herre ‘wîp, dû sprichest wâr: dû hâst aber fünf man gehebet, unde den dû nû hâst, der ist niht dîn.’ Dô liez si vallen seil unde kruog unde sprach zuo unserem herren ‘herre, wer bist dû? dâ stêt geschriben, als Messias kumet, den man heizet Kristum, der sol uns lêren alliu dinc unde sol uns die wârheit kunt tuon.’ Dô sprach unser herre ‘wîp, ich bin ez, der mit dir sprichet’ unde daz wort erfulte allez ir herze. Dô sprach si ‘herre, unser elteren die beteten under den böumen ûf dem berge und iuwer elteren von der judischeit die betôten in dem tempel: herre, welche von disen betent aller wêrlîchest got an, und welez ist diu stat? beriht(e) mich des.’ Dô sprach unser herre ‘wîp, diu zît sol komen und ist ieze hie, daz die wâren anbêtære niht alleine sullen beten ûf dem berge noch in dem tempel, sunder in dem geiste und in der wârheit beten alsô den vater an; wan got der ist ein geist, unde wer in anbeten sol, der sol in anbeten in dem geiste und in der wârheit, und alsôliche anbêtære suochet der vater.’ Daz wîp wart alsô vol gotes und überfliezende vol und ûzquellende von füllede gotes unde wart predigende unde rüefende mit lûter stimme unde wolte allez daz ze gote bringen unde vol gotes machen, daz si mit den ougen an sach, als si selber erfüllet was. Sehent, diz geschach ir, dô si iren man wider hâte.

Niemer mê engit sich got der sêle offenbâr noch al noch genzelîche, si enbringe ir man, daz ist ir frîger wille. Dar umbe sprach unser herre ‘wîp, dû sprichest wâr, dû hâst fünf man gehabet, die sint tôt; unde den dû nû hâst, der ist niht dîn.’ Welez wâren die fünf man? Daz sint die fünf sinne, dâ mit hâte si gesündôt, unde dar umbe wâren sie tôt. ‘Unde der man den dû nû hâst, der ist niht dîn:’ daz was ir frîger wille, der was ir niht, wan er was gebunden in tôtsünden, unde si was sîn ungewaltic, unde dar umbe enwas er ir niht: wan wes der mensche niht gewaltic ist, daz ist sîn niht, ez ist mê des, der sîn gewaltic ist. Ich spriche aber nû: swenne der mensche sînes frîgen willen gewaltic ist in der gnâde und daz er in vereinen mac mit dem willen gotes genzelîche und als ein einic ein, sô bedarf er niht mê dan daz er spreche, als diz wîp tet: herre, wîse mich, wâ sol ich betôn unde waz sol ich tuon, daz ich dir aller liebest sî in der wârheit? unde Jêsus der antwürtet, daz ist, daz er sich offenbâret wêrlîche unde genzelîche und al, als er ist, unde erfüllet den menschen alsô überflüzzecliche, daz er ûzquellende ist unde fliezende von übervoller füllede gotes, als diz wîp tet in einer kurzen zît ob dem brunnen, diu vor gar ungeschiket was dar zuo. Und dar umbe spriche ich aber, als ich ê sprach, daz enkein mensche hie enist sô grob noch sô unverstendic noch sô ungeschicket dar zuo, mac er sînen willen mit der gnâde gotes lûterlîche und al vereinen mit dem willen gotes, und er bedarf niht mê dan sprechen in sîner begerunge: herre, wîse mich dînen liebsten willen und sterke mich den ze tuone, unde got der tuot ez als gewêrlîche als daz er lebet unde got git im in alsô rîlîcher füllede in aller wîse vollekommen, als er disem wîbe ie gegap. Sehent, diz mac der grobeste unde der minste von iu allen enpfân von gote, ê er tâlanc ûz dirre kilchen kome, jâ ê daz ich tâlanc gepredie, mit guoter wârheit und alsô wêrlîche als got lebet und ich mensche bin. Und dar umbe spriche ich: erschrikent niht, disiu fröide enist iu niht verre, went ir si wîslîche suochen.

Nû spriche ich aber, als unser herre sprach ‘gang în, guoter kneht unde getriuwer, in die fröide dînes herren, wan dû getriuwe bist gewesen über kleine, dar umbe wil ich dich setzen über allez mîn guot.’ Eyâ, nû merkent daz edel wort, daz er sprach ‘über allez mîn guot.’

Waz ist nû des herren guot? Daz ist güete, als verre als si gespreitet ist unde geteilt in allen dingen ald in allen crêatûren, die dâ guot sint von sîner güete in himelrîche ald in ertrîche: daz ist des herren guot. Wan nieman enist guot noch enhât guot noch güete dan von im alleine. Dar umbe ist ez sîn guot und ouch allez daz daz man von gote selben gesprochen mac ald mit vernunft begrîfen mac ald gebrüeven ald gewisen mac, diz ist noch allez des herren guot unde her über alzemâle wil er disen kneht setzen, wan er ouch guot ist unde getriuwe gewesen über kleine, und über allez diz guot ist er herre, noch ein ander, und ist doch daz selbe und ist doch ein, waz daz ist, und enist noch diz noch daz und ist weder hie noch dâ. Dar umbe sprach er ‘gang în, guoter kneht unde getriuwer, in die fröide dînes herren, wan dû getriuwe bist gewesen über kleine, dar umbe wil ich dich setzen über allez mîn guot.’

Nû hân ich iu geseit, welez des herren guot ist, unde dar umbe sprach er ‘gang in die fröide dînes herren, ich wil dich setzen über allez mîn guot’, als er sprechen wolte: gang ûz allem geschaffenem guote und ûz allem geteiltem guote und ûz allem gestücketem guote: über allez diz wil ich dich setzen in daz ungeschaffen und in daz ungeteilte und in daz ungestückete guot, daz ich selbe bin. Dâ von sprach er ‘gang in die fröide dînes herren’, reht als er sprechen wolte: gang ûz ûz aller fröide, diu geteilt ist und diu von ir selben niht enist daz daz si ist, in die ungeteilten fröide, diu von ir selber und in ir selber ist daz, daz si ist, unde diu enist niht anders dan diu fröide des herren.

Ein wunderlîch rede! wie möhte man daz berihten ald gesprochen, daz nieman verstân kan noch bekennen mac? Merkent doch etwaz dâ von. Diu fröide des herren daz ist der herre selber und enkein ander unde der herre ist ein lebende wesende istige vernünftikeit, diu sich selber verstêt, und ist und lebet selber in im selber und ist daz selbe. Hie zuo hân ich enkeine wîse geleit, sunder ich hân im abe genomen alle wîse, als er selbe ist wîse âne wîse unde lebet und ist frô daz er ist. Sehent, diz ist diu fröide des herren und ist der herre selber und har în hiez er disen kneht gân, als er selber gesprochen hât ‘gang în, guoter kneht unde getriuwer kneht, in die fröide dînes herren, wan dû getriuwe bist gewesen über kleine, dar umbe wil ich dich setzen über allez mîn guot.’ Daz wir ouch guot werden müezen unde getriuwe, daz ouch uns unser herre heize în gân und êweclîche inne belîben mit ime und er mit uns, des helfe uns got. Âmen.