Tractate — Chapter 15

Nû sprichet man von drîerleie geschepfnüsse. Man sprichet, daz geburt sî geschepfnüsse, unde daz von nihte geschaffen wirt, unde daz geschaffen wirt in genâden zuo hôhen genâden. Daz selbe hete Kristus ûf daz aller hœhste. Ist geburt ein geschepfnüsse, sô was Krist ein geschepfunge sînes vaters in der êwigen geburt persônlich unde wesenlich. Daz sprach Kristus selber ‘diu wîsheit geschuof die wîsheit.’ Diz geschepfnüsse des suns ist êweclich an ime gewesen allez, daz ez ist, unde wirt doch êweclich geborn von dem vater mit allem dem, daz er ist, unde diu geburt belîbet êwiclich in dem vater. Her ûf sprichet sant Dionysius: got geschuof einen got, der was als guot als got. Als verre als sich der vater selbe enpfêhet von ime selben, als verre ist er ein geschepfnüsse sîn selbes. Her ûf sprichet sant Dionysius: got ist sîn selbes eingeborn sun. Daz ist in der êwikeit. Crêatûre die belîbent in der êwikeit, als sie sint in der gotgeberhaftigen gotheit. Der sun bekennet elliu dinc wesenlich in dem wesen als der vater, der wesenliche hât gewalt alles, daz geschehen möhte unt daz niht geschehen möhte. In der persône hât er aller dinge bilde, daz er mit dem vater elliu dinc bekante, und der gemeine gewalt alles, daz geschehen ist unt daz nû geschiht unt daz noch geschehen sol unt daz got noch getuon möhte, ob er wolde, unt daz doch niemer geschiht. Nâch dem, daz der vater sînen willen strecket zuo den dingen, diu dâ geschehen süllent, nâch dem strecket der sun sîne wîsheit, daz sie geschehent; und als der vater sînen willen leitet zuo den dingen, diu niemer süllent geschehen, alsô leitet ouch der sun sîne wîsheit, daz sie niemer geschehent.

Daz ander geschepfnüsse ist der drîer persône alleine, wan sie ein sint an irn werken, dâ sie elliu dinc von nihte schaffent. Daz hete Kristî sêle ûf daz hœhste, wan si wart von nihte geschaffen in der zît. Diu bilde, diu in der miteln persône sint, diu sint gedrucket in die vermügentheit der sêle, daz diu sêle in dem bilde bekennen mac elliu dinc, diu geschehen sint unde die nû geschehent unde die noch geschehen süllent. Aber daz niemer mêre geschehen sol unde daz got noch wol getuon möhte under der gemeine gewalt unde niemer geschehen mac unde doch in dem wesenlichen gewalt ist, des bekennet diu sêle niht, wan daz gehœret got alleine zuo. Diz lieht ist crêatûre von nihte geschaffen und ist der sêle übernâtûrlich. Ein lieht hât diu sêle gemeine mit den engelen. Daz ist, daz ir ein bilde în gedrucket wirt, daz si in ir selber bekennet diu dinc, diu dâ geschehen sint unde diu nû geschehent; aber diu noch geschehen süllent, der bekennet si niht in dem bilde, got gebe ir sie denne ze bekennene. Unt daz ist der sêle übernâtûrlich.

Daz dritte geschepfnüsse ist, daz der lîcham geschaffen wirt von genâden zuo hœhern genâden, daz ist, daz er zuo nimet an tierlicheit. Mit der tierlicheit möhte er niht gesehen in der liute consciencie, mit der tierlicheit möhte er ouch dehein zeichen getuon und er weste ouch dehein zuokünftic dinc, got engebe ez ime denne. Kristus was als afhôht, dô er kint was, daz er niht bekante, wer sîn vater oder sîn muoter was. Her ûf sprichet sant Ambrosius: er wart geschaffen von gnâden zuo hœhern gnâden, wan er stuont von dem tôde ûf in untœtlicheit. Krist siht in dem himel niht mit vleischlîchen ougen denne daz vor im ist; solde er hinder im iht sehen, sô müese er sich umbe kêren. Dâ von bekande der sun den vater nie ze grunde. In ir gebrûchen, dâ sich die drîe in ir nâtûrlicher einekeit einigent, und in daz gebrûchen wart Kristes sêle gesat in dem punte, dô si geschaffen wart, unt daz gebrûchen wart ir enzogen, alsô daz si götlîcher nâtûre niht gesehen mohte. Kristes sêle gebrûchet alsô götlîcher nâtûre von genâden alse got von nâtûre. Alsô ist daz enzogen allen crêatûren, daz götlîcher nâtûre nie ein tropfe kom in alle crêatûre. Dâ von ist daz daz hœhste bekantnüsse, dâ man zuo komen mac, daz man bekenne, wie die drîe persône gebrûchen ir götlîcher nâtûre. Dar zuo mac doch nieman komen, mêr: daz sich diu sêle senke in ein mitwizzen unt daz diu geschaffenheit unde diu ungeschaffenheit zemâle in sî vlieze unt daz si ûf der mite stê unde sehe in die beide âne irretuom unt daz si ûf ein punt lûterlîche bekenne, wie si gebrûche unde wie ir daz enzogen wirt, des si dâ gebrûchet, unde wie si mite gezogen wirt von genâden, und enkan doch götlîcher nâtûre niht begrîfen. Si bekennet daz wol, daz si gotes ist unde doch niht ir selber. Si sol bekennen ûf daz hœhste punt, wie lîden unde gebrûchen ûf ein punt sî. Daz Krist hete lîden unde gebrûchen ûf ein punt lîplichen, daz was ein wunder. Sîn sêle hete lîden an allen iren kreften. Diu oberste kraft diu hete lîden, und alsô vil mêre denne die andern, als vil si behender was denne die andern. Her ûf sprichet ein wîse meister: in diser bekantnüsse kumt diu sêle in volkomene vreude, wan volkomeniu bekantnüsse machet volkomene vreude.

Her ûf sprichet Kristus ‘die dich, vater, bekennent unde dînen sun, den dû gesant hâst, die habent daz êwige leben.’ Er sprichet ouch ‘bitet, daz iuwer vreude vol werde.’ Sant Dionysius sprichet, volliu vreude sî ein lûter consciencie, diu einen înfluz habe, der der nâtûre fuocsam sî, unt daz sich diu sêle schouwe in dem spiegel der gotheit. Got ist ein spiegel, der sich offenbâret swem er wil, unde verbirget sich swem er wil. Her ûf sprichet sant Pêter ‘got geschuof die nâtûre unde die persône in der nâtûre und erwelte die nâtûre unde niht die persône.’ Sant Dionysius sprichet, diu sêle habe ein lieht, daz ir selber liuhtet ze würkenne. Daz lieht, daz got in die nehsten engel giuzet, dâ mite giezient sie sich wider in got mit allem dem, daz sie sint. Her ûf sprichet sant Bernhardus: die geiste die giezient sich niht mit irm nâtûrlichem liehte in got, diu gotheit ziuhet sie in sich mit irm liehte, daz siz niht ansiht.

Nû sprichet sant Johannes ‘got ist diu minne und der in der minne wont, der wont in gote unde got wont in im.’ Als sich got der sêle offenbâret, sô minnet diu sêle got, sô ist si in gote unde er ist in ir. Als diu sunne schînet, sô siht daz ouge; denne ist daz ouge in der sunne unde diu sunne in dem ougen. Eyâ, vriunt mîn, nû merke, waz ich meine, wan ich mîne meinunge niht geschrîben getar noch gereden, wan in den persônen ist götlîch nâtûre ein spiegel, dâ nie rede în kum. Alsô verre als sich diu sêle über rede gewerfen mac, alsô verre gelîchet si sich dem spiegel. In dem spiegel einiget niht denne gelîchnüsse.

Dô ich, herre, in dir was, dô was ich unnôtdürftic an mînem nihte, unt dîn angesihte, daz dû mich anesêhe, daz machte mich nôtdürftic. Ist daz ein tôt, daz diu sêle von gote scheidet, sô ist ouch ein tôt, daz si ûz gote gevlozzen ist, wan alliu bewegelicheit ist sterben. Dâ von sterben wir von zît ze zît unde diu sêle stirbet alsterbende in dem wunder der gotheit, daz si niht begrîfen kan götlîche nâtûre. In dem nihte stürzet si über unde wirt ze nihte. In disem nihte sînde wirt si begraben unde mit unbekantnüsse wirt si vereinet in den unbekanten unde mit ungedanken wirt si vereinet in den ungedâhten unde mit unminne wirt si vereinet in den ungeminten. Waz der tôt begrîfet, daz kan im nieman genemen: er scheidet daz leben von dem lîbe unde scheidet die sêle von gote unde wirfet sî in die gotheit unde begrebet sî in ir, daz si allen crêatûren unbekant ist. Dâ wirt ir vergezzen als der gewandelten in dem grabe unde si wirt unbegrîfenlich allen begrîferen. Als got unbegrîfenlich ist, alsô wirt si unbegrîfenlich. Als wênic man die tôten begrîfen mac, die hie ze dem lîbe sterbent, alse wênic mac man die tôten begrîfen, die in der gotheit tôt sint. Disen tôt suochet diu sêle êwecliche. Als diu sêle getœtet wirt in den drin persônen, dâ verliuset si ir niht unde wirt geworfen in die gotheit. Dâ vindet si daz antlütze irs nihtes. Her ûf sprichet unser herre ‘mîn unbefleckeie, dû bist zemâle schœne,’ unde von der unbegrîfenlicheit sîner schœne sô sprichet si ‘dû bist noch schœner.’ Dâ siht si in die verborgenen künste gotes, daz got wunderlîchen daz niht hât gemachet nôtdürftic, unde hât ime doch niht geschadet. Sant Dionysius sprichet daz ist niht wunder, daz got die sêle nôtdürftic gemachet hât mit sîner angesihte, sît daz diu sunne âne gebot den maden unde den würmen leben gît in dem vûlen holze. Sô siht diu sêle gotes grôzheit an und ir kleinheit unde wirfet sich ûz gotes herzen und ûz allen crêatûren unde belîbet ûf ir blôzem nihte, unde diu götlîch kraft enthaltet si in irm wesenne. Sant Dionysius sprichet: elliu dinc stênt ûf nihte nâch dem gebote gotes. Aber sprichet er: der blic, der ûz got gêt in die sêle, der ist ein begin des gelouben, daz ich geloube, daz mir nie geoffenbâret wart. Alsô verre als sich diu sêle mit gelouben gesenken mac in daz unbekante guot, alse verre wirt si ein mit dem unbekanten guote unde wirt ir selben unbekant und allen crêatûren. Si weiz wol, daz si ist; si enweiz aber niht, waz si ist. Als si allez daz bekennet, daz ze bekennen ist, denne alrêst kumt si über in daz unbekante guot. Disiu übervart ist manigen bekennern verborgen. Diu sêle ist an ir nâtûre alsô gestalt, wâ si iht ist, dâ ist si alzemâle, an ieglichem lide ist si alzemâle, unt daz ist des schult, swâ der nâtûre iht ist, dâ ist si alzemâle. Dar umbe ist diu gotheit an allen steten und in allen crêatûren und an ieglicher alzemâle.

Diu ungenâtûrte nâtûre nâtûret niht denne alsô vil als si sich lêzet nâtûren. Sô nâtûret si niht, der vater nâtûret sînen sun in der genâtûrten nâtûre, unde der vater ist der ungenâtûrten nâtûre alsô nâhen als der genâtûrten nâtûre, wan si ist ein mit im. Der vater ist in der ungenâtûrten nâtûre aleine und ouch der êrste in der genâtûrten nâtûre. Und in der genâtûrten nâtûre ist der sun mit dem vater nâtûrende unde der sun nâtûret den heiligen geist, unde der heilige geist ist mit dem vater unde mit dem sune in der genâtûrten nâtûre und er nâtûret niht. In der genâtûrten nâtûre sint sie ein und diu genâtûrte nâtûre underscheidet die persône unde die persône sint alsô êwic an ir persônen, als diu ungenâtûrte nâtûre ist an ir nâtûre, unde diu genâtûrte nâtûre ist als êwic an ir als diu ungenâtûrte nâtûre, unt diz ist niht denne ein got unde drie persônen, die nâtûrent die crêatûre, ein ieglich in ir nâtûre, unde gebent in kraft unde werc, daz ist, daz in aller beste bekumet. Ein ieglich crêatûre hât ir nâtûre alsô liep, daz si niht ein ander wolde haben. Ein meister sprichet: möhte riuwe an den vater gevallen, sô rou in, daz er alle crêatûre von götlîcher nâtûre niht möhte gemachen. Swenne sich diu sêle mit ir einveltigen nâtûre kêret in gotes nâtûre, sô ist si balde vereinet in gote, wan daz merken ûf den kreften und ûf den persônen und ûf den tugenden ist der sêle ein hindernüsse in götlîcher einekeit. Der gemeine sin gît den andern sinnen hœren, sehen, enstên, smeken, und er ist doch niht wan ein in ime selben. Daz die ûzwendigen sinne vernement, daz bringent sie an den gemeinen sin. Sô nimet denne diu redelicheit daz beste ûz und ziuhet ez in die gehücnüsse und einet ez in die sêle unde lêzet daz grobe der vihelîcheit. Diu oberste kraft treget ez in daz bekantnüsse unde bekennet gotes aller liebste willen unde treget ez denne in die sêle unde diu sêle einiget elliu dinc in gotes liebesten willen.

Got ist ein einveltic guot an ime selben und ungestücket. Alle die namen, die diu sêle gote gît, die nimet si an ir selber. Aleine got drîveltic sî an den persônen, er ist doch niwan ein einic guot an der nâtûre. Er ist ein algewaltic guot an dem vater und ein klâriu wîsheit an dem sune und ein lûter güete an dem heiligen geiste. Er ist drîveltic und er ist ein an allen crêatûren gemeinlich und er ist den verbrunnen geisten unde die in dem brande erloschen sint und in ime ze nihte worden sint ein einvaltig substancie. Als diu sêle an ir geeiniget hât elliu dinc unde stêt ûf ir einvaltigen substancie, sô ziuhet si götlîcher nâtûre krefte in sich, die si ûz ir wirfet von irem wesen in götlîcher nâtûre wesen, unt daz wesen durchgêt si alzemâle unt diu zwei wesen stênt ûf einem punte in der sêle und in gote unt daz underscheit der drîer persône enhindert die einikeit niht unt daz wesen hindert daz underscheit der drîer persône niht. An ieglicher persône ist er drîvaltic und ein nâch dem gebornen wesen unt daz ungeborne wesen enlêzet die persône in dem wesen niht. Swer eine persône enpfêhet, der enpfêhet götlîche nâtûre drîvaltic zemâle in einer einekeit. In dem wesen dâ hât ein persône alsô vil als drie in dem underscheide.

Sêlic ist diu sêle, diu den übersprunc getuot, daz si elliu dinc enpfêhet in der blôzen gotheit. Diu sêle sol begraben werden in dem antlütze gotes, si sol gezogen werden in den himel, dâ die drie persône inne wonent mit einekeit irre nâtûre. Daz ist diu verborgen gotheit, dâ man niht abe gesprechen mac. Sêlic sint die die übervart getuoent: den werdent elliu dinc bekant in der wârheit unde sie sint doch unbekant allen crêatûren. Als verre als sie über alle crêatûren sint, als verre sint sie got ob allen crêatûren, unt daz kumt von der einekeit, die sie mit gote habent. Daz antlütze gotes verbirget si in im und alle ir gestaltniüsse. Swâ sich zwei dinc vereinent, daz allermeist krefte hât daz ziuhet daz ander an sich. Kristus sprichet ‘ir hânt mich niht erwelt, ich hân iuch erwelt.’ Sêlic sint die ûzerwelten, sie tragent daz bilde gotes. Kristus sprichet ‘sêlic sint die armen des geistes, gotes riche daz ist ir.’ Die armen des geistes daz sint die, die gote elliu dinc gelâzen hânt, als er sie hâte, dô wir niht enwâren. Gotes riche ist, daz diu sêle vol gotes sî unde niht an ir selber sî. In dem nihte wont got unde diu sêle wont in dem selben nihte. Dâ hât si keinen wandel unde dar enkan kein crêatûre komen mit ir kraft unde kein crêatûre mac niht hœher komen. Her ûf sprichet sant Dionysius: got wont in dem nihte. Ô Dionyse, daz wære ze klein gesprochen! got wonet in dem nihtesniht, daz ê was denne niht, daz ist diu verborgen gotheit, diu dâ blôz ist an ir künste, dâ man niht von gesprechen tar. Daz die einekeit geschiht, daz ist gotes aleine. Her ûf sprichet sant Dionysius: enwonete got niht in dem nihte, sô würden elliu dinc ze nihte. Her Dionyse, daz wære ze klein, und wonte got niht in dem nihtesniht, unde trüege got mit sîner kraft die crêatûre niht, sô würden sie ze nihte, wan sie vliezent von nâtûre in daz niht, dâ sie von geschaffen sint. Dar umbe wont got in dem nihtesniht, daz dâ ê was denne niht.

Diu crêatûre hât einen înganc in got, dâ ir wesen an stêt, unde würket in der kraft, diu sî beweget, ze komen von nihte ze ihte. Nû sprichet sant Paulus und ouch sant Augustînus ‘wie ist mir geschehen, daz ich von nihte ze ihte worden bin, unde von einem wurme got unde von einer crêatûre schepfer?’ Diu sêle sol in got alsô vereinet sîn, daz sî des bedunke, daz niht mêre sî denne got aleine unde daz got nie crêatûre mê beschüefe denne sî aleine. Diu sêle, diu dise übervart getuot, diu kumet in eine ruowe aller dinge. Si ist got, als er in ime selber ist. Her ûf sprichet Kristus selbe ‘ich bin iu mensche gewesen, unde sît ir mir niht got, sô tuot ir mir unreht.’ Got ist mensche worden, daz wir got würden. Got was mit götlîcher nâtûre verborgen in menschlîche nâtûre, daz man dâ niht erkande denne einen menschen. Alsô sol sich diu sêle verbergen in götlîcher nâtûre, daz man an ir niht müge bekennen denne got; niht daz si eine persône an sich neme, als Kristus hete, sunder daz si zemâle gesenket werde in götlîche nâtûre.

Got ist niht nâtûre, als diu crêatûre ist, diu daz an ir hât, daz ein andriu niht enhât. Der ein becke wære und ein briuwe, von dem möhte man niht gesprochen, daz er aleine ein briuwe wære, wan er wære ouch ein becke. Alsô ist got aller nâtûren nâtûre, wan er aller nâtûren nâtûre an im hât ungestücket. Er ist lieht der liehte, er ist leben der lebenden, er ist wesen der wesenden, er ist rede der redenden. Dar umbe ist er aller nâtûren nâtûre. Her ûf sprichet sant Dionysius: dar umbe mac er niht heizen ein nâtûre, wan er einvaltic ist und ime kein gelîcheit niht enist. Her ûf sprichet aber sant Dionysius: man mac got niht bekennen denne mit unbekantnüsse.

Als got in die sêle kumet, sô kumet er mit allen dingen in sî. Aleine got ein dinc einvalticlîchen in im habe, diu sêle hât sie doch redelich mit underscheit, tiuvel und engel und elliu dinc. Alsô hât diu sêle mügentheit ze enpfâhenne elliu dinc an got, unde si bekennet, waz got ist in in und waz sie sint in gote, unde si wirfet sich ûf in die einvaltikeit über elliu dinc in daz unbekantnüsse. Her ûf sprichet sant Dionysius, daz sî hêrschaft, daz man nidriu dinc überkome unde diu dâ neben sint, unde sie bringe in diu hœhsten. Dar über sprichet Kristus ‘die mir volgent, die wil ich bringen, dâ ich bin.’

Der vater sprichet sich in dem sune in die sêle. Wan der sun daz wort ist des vater, sô offenbâret der vater sich der sêle in dem worte, daz er in sîner götlîchen nâtûre kein gestaltniüsse hât. Sô sprichet sich diu sêle wider in dem selben worte dem vater, daz si kein gestaltniüsse habe an irem nihte, sô lêzet si ir iht in dem worte unde wirfet sich ungestalt in den ungestalten. Diu gotheit ist ein blôz einvaltic dinc, daz aller dinge kraft an im hât ob den persônen unde der drîer persône kraft in einvaltikeit unde si mac sich nieman gegeben noch si mac nieman zemâle enpfâhen alsô, daz si aleine an im bestê. Her ûf sprichet sant Dionysius: diu gotheit hât elliu dinc. Dar umbe sint die drie persône in der gotheit, die die gotheit offenbârent ir ieglich dem andern unde der crêatûre als vil, als si sîn enpfâhen mac. Der vater offenbâret ime die gotheit selbe und offenbâret sî sînem sune unde der vater unde der sun offenbârent sî dem heiligen geiste unde die drie persône offenbârent sî den crêatûren unde diu gotheit spilt mit der rede und vor der rede und obe der rede unde diu rede mac sî niht begrîfen. Unde wêren die drie persône mit der underscheit in der gotheit niht, sô enwære diu gotheit nie geoffenbâret worden unde si enhête nie crêatûre geschaffen. Dar umbe sint diu êwigen werc ein sache der crêatûre. Der vater offenbâret die gotheit, der sun offenbâret den vater, der heilig geist offenbâret sie beide. Die offenbârung hât diu gotheit von den dingen, diu niderhalp ir sint. Diu aller meiste volkomenheit hât gebresten an den crêatûren. Sô geschiht ez under wîlen, daz der mâne schiuzet under die sunne und enpfêhet den sunnenschîn alzemâle; sô sprichet man, diu sunne sî vergangen. Sô ist ein sterne, der wirfet sîne kraft in den mânen unde ziuhet in von der sunne; sô nimet denne diu sunne ir lieht von den dingen, die under ir sint. Diu sêle enpfêhet von der drîvaltikeit elliu mêzigiu dinc, diu von kreften gemezzen sint. Ûz der blôzen gotheit schînet ein einvaltic lieht in daz einvaltic wesen der sêle, daz die krefte niht enpfâhen mügent die obersten noch die nidersten. Aleine diu gotheit elliu dinc in ir habe, si hât sie doch in einem wesen ungestücket. Si gebirt niht, des heizet si niht vater; si enpfêhet niht, des heizet si niht sun noch heiliger geist. Die drîe persône sint an den persônen got und an der nâtûre gotheit. Diu gotheit durchschînet daz underscheit der persône und aller crêatûre underscheit unz ûf die nidersten unde liuhtet si ir selber unde liuhtet ouch ir selber in ir selber. Und als diu sêle in daz blôze wesen kumet der gotheit, sô bekennet si alliu dinc unz ûf die nidersten crêatûre; sô liuhtet si ir selber und alliu dinc in ir unde bekennet in der gotheit götlîche nâtûre unde in dem underscheide der persône dâ verliuset si irn namen unde die drîe persône die verliesent irn namen in der einekeit, und allez, daz diu einekeit begrîfen mac, daz verliuset sînen namen in der einekeit. Dan enwirdet diu sêle irem nihte wert unde sol in der gotheit niht ieglich ein sich nâhen unde die krefte habent dekein nâchvolgen. Her ûf sprichet sant Dionysius: diu gotheit ist ze nihte worden. Dâ meinet er, daz diu sêle mit irem blôzen wesen den kreften engangen ist. Dâ habent die krefte die gotheit verlorn und ouch ir blôz wesen der gotheit ûf den persônen und ûf den kreften unde die krefte habent ein nâchvolgen in daz wesen unde sie widerstênt an dem widerslage der drîer einekeit. Dâ verliuset diu minne irn namen und elliu dinc in der gotheit nihte, dâ ist diu sêle ingevlozzen irm ihte. In der gotheit nihte dar inne hât der vater sîne volkomenheit unde die drîe persône ir einekeit unde gebent allen crêatûren ir volkomenheit an irm beschaffenen ihte, unde diu sêle fliuzet in irm ihte in der gotheit niht durch elliu dinc unde si rüeret sie doch niht an irs wesens ihte. Her ûf sprichet sant Dionysius, daz diu sêle niht gerüeret werde an irm ihte in der gotheit nihte unt daz die sêle ouch diu gotheit niht rüere an irm nihte. Dâ ist si als grôz . . . . ., daz sie fliuzet ime gelîch in einem liehte. Her ûf sprichet sant Dionysius: diu gotheit ist ze nihte worden, wan sî der sêle krefte niht begrîfen mügent.

Gelobet unde gebenedeit sî der vater unde der sun unde der heilige geist in einekeit götlîcher nâtûre. Gelobet unde gebenedeit sî Jêsus Kristus des lebenden gotes sun an einer persône götlîcher nâtûre unde menschlîcher nâtûre.