Tractate — Chapter 3

Hie ist ein vrâge, obe diu sêle mit ir eigen kreften ir hœhste sêlikeit begrîfen müge? Zuo dem sprechent die vier lêrer Thomas, Egidius, Heinricus und Albertus, hiete diu sêle ir eigen verstendikeit an bildnüsse, als si ir wesen hât, sô möhte si ir hœhste sêlikeit begrîfen, wan si ist ein unmêzlîchiu mâze, die got mit nihte erfüllen mac dan mit im selber. Ouch sprichet sant Augustînus: hiete diu sêle ir eigen nâtürlîchen adel âne mitel gegenwürtic, sô wære si ir selbes eigen mêr dan alle crêatûre in ir nâtûre, dar în si geordent ist. Wan got ist ein geist unde vergeistet die sêle und ist in ir geistlîchem eigen über alle crêatûre geordent, dâ von si der crêatûre mac genuoc sîn in dem ebenbilde der êwigen wârheit, daz sich âne mitel in ir erbildet. Nû ist aber ein frâge: in welcher mâze got in die sêle kome, sît er doch wesentlich in ir ist und si mit sîme wesentlichen werke enthaltet unde wesen unde leben in ir würket? Über daz sprechent etlîche lêrer, daz got drîvelticlîchen in die sêle kome. Des êrsten mit sîner gnâde, durch die der mensche erfröuwet wirt unde lust gewinnet, alle tugende zuo erfüllen, unde hât ein begern, daz im daz von keiner crêatûre niemer benomen werde. Des andern mâles kumt got in die sêle mit lûterer erkantnüsse, in der sich der mensche geschouwet unde lernet sich selber erkennen, daz er gote in allen dingen genuoc sî, dar în er in ziuhet, ez sî lîden oder versuochunge geistlich oder lîplich. Zem dritten mâle kumt got in die sêle mit rehter frîheit, dâ mit er den menschen friet von allen sorgen des lebens. Dar umbe sol in diu sêle enpfâhen unde sol sich an niemen genüegen lâzen dan an im alleine. Der mensche ist nâch dem obristen teil sînes inwendigen menschen, der sêle, gote glîcher dan allen crêatûren, und wie wol er nâtürlich mêr mit der crêatûre ist, sô ist er doch nâch der vernunft gote glîcher denne kein crêatûre. Wan sô diu sêle nâch der art irs vermügens unde nâch der eigenschaft irs wesennes vernünfticlîchen in got ruowet, sô werdent ir alliu dinc als eigen, als ob sie durch ander dinge willen niht beschaffen wæren dan alleine durch ir willen. Und in dem teil lîdent sî alle crêatûre unde sint ir undertân, als obe sie von ir beschaffen wæren. Wan in dér kraft wâren die vogel Franciscô undertân und hôrten sîne predie. Ez was ouch in dér kraft Daniel begâbet unde hielt sich alleine gotes, dô er under den lewen saz. In dér kraft ist ouch der heiligen üebunge gewesen, die ir lîden alsô ûf nâmen, daz ez in in grôzer minne kein lîden was. Ûf daz sprichet Dionysius: diu sêle sol sich sô reine machen, daz si in volkomenheit erliuhtet werde, daz si den engeln glîch werde und enpfâhe daz von gnâden, daz die engele nû von nâtûre besizzen habent. Wan diu sêle wirt dar zuo niht volbrâht, dar zuo si beschaffen ist, si enwerde dan glîch den engeln, in den dehein sünde ist. Unt dar umbe, daz diu sêle von dem himel ist (daz ist von got, der ein himel der sêle ist) unde der lîcham von der erden, sô sint sie alwege wider einander. Dar umbe muoz diu sêle, diu ze gote wider komen wil, von dannen si ist geflozzen, alliu dinc lâzen unde fliehen, diu gotes niht ensint noch zuo gote niht enwîsent. Wan alliu bildnisse unde glîchnisse, als Dionysius sprichet, hât got des êrsten in die nidristen engele îngedrücket, daz sie danne daz götlîche lieht unde den trôst gotes in die sêle drücken, daz si komen müge in ir einigez ein, daz got ist, dâ nie dehein crêatûre în blicken noch sehen mohte.

Die lêrer sprechent, daz der sêle sêlikeit an dem grœzer sî, sô got in ir sich selber birt âne lîplîche einunge, dan der lîcham Kristî âne sîne gotheit und âne sîne sêle. Wan ein ieglîchiu sêligiu sêle ist edeler dan der tœtlîche lîcham Kristî, wan diu inwendige geburt gotes in der sêle ist ein volbringunge aller ir sêlikeit, wan diu sêlikeit frumt ir mêr dan daz Kristus mensche wart, unt daz enmöhte der sêle niht nütze sîn âne die vereinunge gotes. Dâ von sprichet Dionysius: diu sêlikeit ist ein inblîben mit gote, alsô daz in diu sêle mêr gegenwürtic habe dan sich selber, unde diu sêle begrîfet got aller eigenlîchest, sô si mit eime fridelîchen herzen zuo im loufet. Wan in dem fride ist sîn stat unde hât uns in dem fride zuo sînen kinden erwelt. Wan als got in dem gestirnten und umbeloufenden himel ein beweger ist, alsô ist er ouch hie in der sêle ein beweger der frîheit unsers willen zuo im selber unde zuo allen guoten dingen, in dem si geschouwen mac daz lieht in dem liehte unde vereinet werden mag in dem liehte mit dem liehte. Wan die lêrer sprechent, daz nâch eigener nâtûre die engel in dem himel edeler sîn danne diu sêle Kristî oder Marien: wan sie sint gote glîcher an wesenne denne diu sêle. Aber diu sêle Kristî hât von ir verdienen mêr fröuden danne alle engel habent und ist gote nêher denne kein engel. Alsô ist ez ouch von der sêle Marien, aber niht nâtürlich, wan von nâtûre sô ist diu sêle Kristî unde Marien als mîn sêle oder eins andern menschen sêle. Ouch sprechent die lêrer, daz diu sêle in dem menschen mêr dan tûsentvelticlîchen ist und ist ganz in eime ieglîchen gelide, in den vingern, in den ougen, in dem herzen und in eime ieglîchen teil aller gelide grôzer und kleiner. Alsô in dem ahten himel, an dem sô vil sterne stênt, ist ein engel, der den selben himel umbe trîbet, und ist in eime ieglîchen sterne ganzer. Wan dô got den êrsten menschen beschuof, dô ordente er in alsô, daz dekein krankeit in in vallen mohte, wan ein guldîniu ketene wol geordenter schickunge gie von der drîvaltikeit in die obristen krefte der sêle unde durchgie ouch ir nidristen krefte, daz sie den obristen gehôrsam wâren, dâ von kein suht der krankeit weder in lîp noch in sêle vallen mohte, unz daz er daz gebot übergie. Dar umbe ist diu sêle nâch den obristen kreften ein geist unde nâch den nidristen ein sêle, und alsô ist ein strik zwischen der sêle unt dem geiste in dem einigen wesen.

Man sol ouch wizzen, daz in der sêle ein kraft ist, diu tac noch naht ruowe hât unde fliuzet ûz dem geiste und ist ganz geistlîch, und in der kraft ist got ganz blüejende unde grüenende in allen den fröuden und êren, als er in im selber ist. Wan dâ ist sô gar herzenlîchiu fröude unde sô grôz frôlocken, daz si weder mit gedanken mac begrîfen werden noch mit worten ûz gesprochen. Wan wære der mensche in der kraft alwege vereinet, der selbe mensche möhte niht alt werden. Ich spriche mêr, und solte ein mensche niuwan einen ougenblik in der kraft die wunne unde fröude sehen, diu dar inne ist, unde solte er alliu dinc lîden, daz wære im ein genuohtsamiu fröude.

Dar umbe sol diu sêle von gote vier eigenschaft nemen in der kraft irre verstendekeit. Daz êrste ist ganziu sicherheit, sich frî ze vinden von aller crêatûre und abe ze treten, die got an ir niht haben wil. Daz ander, daz si von gote ganzen nutz in ir wonunge habe in der kraft der minne. Daz dritte, daz si von gote eine ganze huote habe, dâ von ir alle crêatûre niht schaden mügent. Daz vierde, daz si in der kraft alle ir vîende überwinden sol. Wan in daz der sun gotes gebildet ist, nâch dem ist diu sêle gebildet, und in dem der sun nimt, in dem nimt diu sêle, wan daz si an dem niht enhanget, dâ der sun von dem vater ûz fliuzet. Fiwer unde hitze ist einz, smecken unde gestalt ist einz unde sint doch verre von einander. Daz wort, daz got êwicliche sprichet, daz lît sô verborgen in der sêle, daz man ez weder wizzen noch hoeren mac. Dâ von sprichet Dionysius: diu sêle hât ein glîchnüsse des influzzes in der gotheit, dâ die obristen krefte der sêle unde diu nâtûre ein eigenschaft tragent, alsô daz ein ieglîchiu kraft in die andern fliuzet. Dar umbe, wil diu sêle ein geist werden, sô sol si irn gang in die êwikeit haben irs wesens unde sol mit flîze betrahten, daz si von der gâbe gotes ein unzerganclichiu nâtûre ist, der müglich ist ze komen zuo der êwigen sêlikeit. Und wan der geist dem unwandelbæren gote an hanget, sô mac sî weder tôt noch leben, tiefe noch hœhe, engel noch mensche noch kein crêatûre von gote in ir stêtikeit ûf loesen: wan diu sêle, diu in got stirbet, diu wirt ouch in im begraben, dâ von si aller crêatûre unerkant wirt, als ir got unerkant ist. Ûf daz sprichet Dionysius: wenne diu sêle die grœze der mehtikeit gotes an siht unde dâ neben ir kleinheit, sô wirfet si sich ûz ir selber und ûz aller crêatûre unde blîbet ûf ir blôzem nihte unde diu gotheit enthaltet sî in ir kraft unde blîbet alleine in der gnâde gotes. Wan got ist im selber in allen dingen und ist eime ieglîchen dinge ganz in allen dingen. Alsô sol diu sêle sîn: waz got von nâtûre ist, daz sol si von gnâden sîn unde sol abegescheiden unde ledig aller crêatûre sîn unde sol gote alliu dinc lâzen, als obe sie niht enwæren. Und waz an einer solhen sêle lebet, daz ist allez got: wan der ungeschaffen geist ziuhet die sêle in ir erkantnüsse, daz si allen dingen ein geist wirt und alliu dinc sint ir ein geist, als si der heilige geist êwiclichen gegeistet hât. Ûf daz sprichet meister Vincentius: der geist, der abegescheidenlîchen stêt, des adel ist alse grôz, swaz er beschouwet, daz ist wâr, unde swaz er wil, des ist er gewert, unde swaz er gebiutet, des muoz man ime gehôrsam sîn.

Man sol ouch wizzen, swenne der frîe geist in rehter abegescheidenheit stêt von allen dingen, sô twinget er got zuo sîme wesen, unde möhte ez formelîche âne zuoval bestên, sô nême er gotes eigenschaft ganz an sich. Aber daz enmac got niemen geben dan im selber, dar umbe mag im got niht mêr tuon danne daz er sich im selber gebe, und ein solcher mensche wirt als verre in die êwikeit erhaben, daz in kein zîtlich dinc bewegen mac, daz er iht lîpliches enpfinde, unde heizet der welte tôt, dâ von Paulus sprichet ‘ich lebe niht, mêr: Kristus lebet in mir.’ Dâ von sprichet ouch Dionysius alsô: in gote sterben ist niht anders danne ein unbeschaffen leben, daz got selber ist, unde heizet danne niht ein sêle, mêr: diu obriste kraft gotes, dar umbe, daz er sînen willen mit ir würken mac. Und waz die fünf sinne von einer solhen sêle nement, daz gît si allez dem innern menschen, sô er etwaz hôhes und edels gegenwurfes hât, und ein solcher heizet danne sinnelôs, wan sîn gegenwurf ist ein bilde verborgener vernunft. Dionysius sprichet über diu wort sante Pauls ‘wan ir ist vil, die alle nâch der krône loufent, und wirt alleine dem wîsen geben.’ Der louf ist niht anders denne ein abekêren von allen crêatûren unde sich vereinen in die unbeschaffene gotheit. Unde swenne dan diu sêle dar zuo kumt, sô loufet si ime nâch unde ziuhet got sô vaste in sich, daz si an ir selber ze nihte wirt, als diu sunne die morgenrœte in sich ziuhet, daz si ze nihte wirt. Ouch sprichet sant Augustînus: diu sêle hât einen himelischen îngang in die götlîche nâtûre, daz ir alliu dinc ze nihte werdent. Unde swer des geistes kostet, dem wirt ungesmak daz fleischlîche, und swenne diu sêle ûf daz hœhste kumt, sô wirt si von erkennen kennelôs, wan in des geistes einunge sint alle die, die gote alliu dinc gelâzen habent, als er sie hete, dô wir niht enwâren. Wan der herre Jêsus ist der sêle vor gangen unde hât uns ebenbilde geben in dem würken sîner menscheit. Aber nâch dem inneristen teile der drîer persône, gotheit geist, ensach nie kein crêatûre weder sêle noch engel noch diu menscheit Kristî von ir eigenen nâtûre. Wan ez sprechent etlîche unde sunder meister Eckehart von Parîs der dinge aller beschrîber: als ir von mir gewis sît, daz ich ein mensche bin, als gewislîch gebirt got sîn eigen nâtûre in dem grunde mîner sêle als in dem himel, und umbe daz bin ich niht sêlic, ob ich mich niht zuo gote kêre und alle mitel der sünden und ir gesiehte mit aller crêatûre niht abe lege. Wan in dem selben grunde, dâ der vater sînen eigenen sun inne gebirt nâch sîner eigenen nâtûre, ûz dem bin ich geborn. Und alsô gebirt ouch der vater nâtûrlîche sînen sun in der sêle (alse wêrlîch als ich von mîme vater ein lebender mensche geborn bin), diu alliu dinc zîtlîches schaden under ir füeze getreten hât. Und in dem selben grunde, dar inne der vater sînen sun haben wil, dar inne wil er mich haben und alle die der vater mit sînen gnâden zuo im ziuhet. Wan als got in im selbe ist von allen dingen in alliu dinc, dâ bin ich allez daz von gnâden, daz got von nâtûre ist. Wan zuo dem uns got alle haben wil, daz ist sô guot, daz ez wênic menschen gelouben mügent, dan die ir selbes sint ûz gegangen. Und obe got der sêle alliu geschaffeniu dinc gêbe, von den möhte si niht erfüllet werden dan mit im selber: wan er ist der aller hœhste unbeschaffene himel aller himel in götlîcher nâtûre. Unt daz diu sêle in uns untœtlich ist, daz ist von uns niht geschehen, sunder von gote und ist doch nâtûrlîch. Aber diu sache der vereinunge kumt von gnâden, sô sich der obriste alsô neiget, daz er ein forme dem nidristen wirt, ûz dem diu hoffenunge unsers ansehens künftic wirt.

Dar umbe sol diu sêle von lîplichen dingen ûf stên unde sol über sich gezogen werden unde sol in ir selber wonen, des êrsten umbe der lustigen dinge willen, diu si in gote vindet. Wan diu volkomenheit gotes machet sî in ime sîn glîchnüsse enpfâhen. Dar umbe sint sîne volkomenheit alsô unmêzlîche ûz gozen, daz der engel mêr ist dan gras unde sant unde tropfen wazzers ie wurden, und ein ieglîcher engel hât sîne sundere nâtûre, alsô daz dekeiner dem andern glîch ist. — Zem andern mâle sol diu sêle ûf stên durch die lûterkeit, die si in gote vindet; wan alliu dinc sint in ime als lûter und edel, als balde sie ûz im fliezent in die nêhsten crêatûre, sô wirt ez als unglîch als iht unde niht. — Zem dritten mâle sol diu sêle ûf stên durch die samenunge, die si in gote vindet. Wan sol si got begrîfen, sô muoz si ir wonunge über sich setzen; wan hiete got tûsent himel unde tûsent ertrîche geschaffen, sô begriffe diu sêle alle mit der einen kraft der wirkender widerkraft. Dannoch mac si got niht begrîfen nâch dem werke, dâ mit er si nâch ime gebildet hât. — Zem vierden mâle sol diu sêle ûf stên durch diu unmêzelîchen guoten dinc, diu si in gote vindet: wan in im sint alliu dinc nâch ie der zît niuwe in sîme sune, der hiute geborn wirt, als ob er von dem vater nie geborn wære. Und als got in die sêle fliuzet, als fliuzet si hin wider in got.

Diu sêle tritet vier trite in got. Wan sô si sich ze gote neiget, sô kumt si des êrsten in eine vorhte von sîner grôzen wirdikeit wegen. Zem andern mâle tritet si ûz der vorhte und enpfêhet eine hoffenunge von der edelen neigunge gotes. — Zem dritten mâle tritet si in ein begern unde nimt als ein verzagnisse von dem unmêzlîchen begrîfen, dar inne si von gote begriffen wirt. — Zem vierden mâle kumt si in sô grôze vergezzenheit, daz si keines ûzganges niemer mêr gedenket von dem daz si nû in gote funden hât. Got hât die sêle dar umbe geschaffen, daz sîn einborner sun in ir geborn werde. Unde wenne unde wâ diu geburt geschiht, daz ist gote lustsamer denne dô er himel und erde beschuof, dar umbe, daz diu sêle edeler unde wîter ist denne der himel. Wan als ein ê ist zwischen man unde wîb, alsô ist ein ê zwischen gote unde der sêle. Diu obriste kraft an der sêle ist der man unde diu nidriste ist daz wîp. Der man in der sêle sol alwege blôz stên unde daz wîp bedecket, alsô daz diu nidriste kraft in die obriste der sêle gezogen werde. Wan von êrste gebirt got in der sêle sîn gelîchnüsse unt dar nâch sich selber, als er in êwikeit ist. Gotes sun ist der sêle sun, und in dem hât got unde diu sêle einen sun, daz ist got. Diu sêle, in der diu geburt einest geschiht, diu wirt nâch gote gevüeget, unde ie diu geburt mê geschiht, ie mê diu sêle in got gevüeget wirt und in daz veterlîche herze.

Diu sêle hât zwêne füeze, daz ist verstentnüsse unde minne. Und ie mêre si verstêt, ie mêre si minnet. Unde wer mac si vellen, sît si der enthaltet, der alle crêatûre enthaltet? Wan diu gnâde reizet die begirde unde ziuhet die sêle ûz ir selber, daz si mit der gnâde und in der gnâde in gnâde gêt und über die gnâde in got unde kumt in ir êrsten ursprunc, dâ ir in wünnesamer einunge nie alse vol geschach. Wan dâ erstumment alle sinne, unde der sêle wille unde der wille gotes fliezent in einander, dâ von die zwêne willen ein minnesamez umbevâhen habent in rehter einunge. Unt dâ selbes mac diu sêle weder minr noch mê würken danne götlîchiu werc, dar umbe, daz an ir niht mê lebet denne got. Dar umbe sprichet diu sêle in der minne buoche ‘ich hân den kreiz der welte umbeloufen unde kunde sîn nie ze ende komen. Dar umbe hân ich mich gesenket in den einigen punct mînes einigen gotes, wan er hât mich verwundet mit sînem anblicke.’ Und swen daz anblicken niht verwundet hât, des sêle ist von der minne gotes nie verwundet worden. Dar umbe sprichet sant Bernhart: swelch geist des anblickes enpfunden hât, der enmac sîn niht sagen, unde swer sîn niht enpfunden hât, der enmac sîn niht gelouben. Wan dâ wirt ein pfîl âne zorn geschozzen unde man enpfindet sîn âne smerzen; wan dâ wirt ûf getân der lûter unde der klâre brunne der gnâden erzenîe, der diu inwendigen ougen erliuhtet, dâ von si mit eime wünnesamen ansehen enpfindet den wollust der götlîchen heimsuochunge, in der man ungehôrtiu dinc geistlîches guotes vindet, diu nie gehôrt noch geprediet noch in keinem buoche geschrieben sint.

Dar umbe sol diu sêle ûz gên von îteln gedanken, von weltlîcher sorge unde von lîplichen lüsten unde sol in des heimlîche gên, den die himel aller himel niht begrîfen mügent. Wan der trôst gotes wirt alleine der sêle geben, diu allen zîtlîchen trôst versmêhet; unde ie sneller si von der crêatûre fliuhet, ie sneller ir der schepfer zuo loufet unde vereinet sî mit im. Dar umbe sprichet Dionysius: diu minne setzet die sêle ûz ir selber und ordent sî in den den si minnet unde machet sî alsô sinnelôs, daz si ir selbes nihtes ahtet, dar umbe daz si des willen volbringe, den si aller liebest hât. Wan die krefte der sêle, die si hât an dem muote des geistes, die sint himelisch dar umbe, daz sie himelischiu werc würkent; sô enpfâhet diu êrste kraft, diu ander beschouwet unde diu dritte minnet. Wan sô sich diu sêle an der enpfâhunge gotes üebet in der gedêhtnisse irre innekeit und an der beschouwunge irre vernunft, sô bringet sî diu minne in die innekeit der gotheit, dâ diu ruowe der êwikeit ist. Dar umbe wonet der vater in der sêle, daz er sî an sîn herze drücke, und in dem îndrücken des vaters enpfâhet si den sun in sich nâch sîner persône ûzgange, dâ von si sîn inneblîben erkennet mit dem vater in irm wesenne; wan der herre sprichet ‘ich wil sî in die wüeste füeren’, daz ist, er füeret die sêle ûz von aller îtelkeit unde sprichet daz wort, daz sîn einborner sun ist, in sî. Und in der selben berunge sînes suns giezent sie den heiligen geist in die sêle, der sî alliu dinc lêret. Wan alliu werc der sêle, diu des êwigen lônes sullent teilhaftic werden, diu müezent in gote geschehen. Und swie guot daz werc an im selber ist und ez in gote niht geworht wirt, sô enwirt ez von ime niht gelônet, wan er enwirt niht lônen nâch der lengi noch grœzi noch nâch der menige der werke, sunder nâch dem und sie in gote vollebrâht werdent, wan diu sêle ist ein gezouwe gotes, dar inne er sîniu werc würket. Und swenne si sich mit gote vereinet, sô wirt si alsô geadelt, daz si von gnâden wirt, daz got von nâtûre ist. Wan swelhiu sêle irme briutegoume Jêsû Kristô mit tegelîchen tugenden niht engegen kumt unde sich hie versûmet unde sich dem himele niht zuo füeget, die wirt er abe füeren in der helle grunt, dâ si sîner gerehtekeit als vil in lîdenne vindet, als sant Pêter in himel êwiger fröuden. Wan der wâre briutegoum, unser herre Jêsus Kristus, ist dar umbe her zuo der sêle komen, daz er ir sîne götlîche minne in sîner sihtigen menscheit offenbârte, ûf daz unser nâtûre von aller crêatûre geêret würde, diu über die engel ist erhebet worden. Und umbe daz dürfen wir niht gedenken, daz er deheine edelere crêatûre beschüefe denne wir sîn. Dar umbe süllent unser sinne ein genügen an sîner menscheit hân, als unser sêle an sîner gotheit hât, als sant Augustînus sprichet: wir süllen mit der sêle in die gotheit gên unde mit unsern lîplichen sinnen in die menscheit Jêsû Kristî, diu über aller heiligen und engele wirdikeit erhœhet ist, und dâ hin kein crêatûre nâch sîme unwandelbêren wesen reichen mac. Dar umbe swenne der andêhtigen sêle diu zuokunft irs küniges Jêsû Kristî durch etlîchiu dinc verkündet wirt, sô fröuwet sich allez, daz in ir ist, unde des küniges reht ist, daz er würke nâch sîner hêrschaft und erfülle der sêle hoffenunge, diu sîn begert, sî ze sterken, daz si den ûzern sinnen dekeine stat gebe, iht ze würken in deheiner crêatûre âne den willen gotes. Unde diu sicheriste friuntschaft des küniges ist, sô diu sêle in allem dem volget, dar în sî got ziuhet. Wan sô diu sêle, von der wir mêr menschen sîn denne von dem lîchamen, der âne die sêle tôt ist, einer ieglîchen manunge gotes volgete, si überwünde alle anvehtunge âne arbeit unde wære ir ein lust, swaz si durch sînen willen tragen solte. Unde swenne si nihtes an ir vindet, daz ze strâfen sî, sô ist si frî mit ganzem fride vor allen urteilen. Dar umbe gehœret der sêle zuo, diu got minnet, daz si irn willen âne sînen willen niemer vollebringe, sît der zît unde si sich in sînen dienst ergeben hât. Wan got ist ein eigen, daz nihtes bedarf unde des elliu dinc bedürfent. Unt dar umbe, swenne sich diu sêle von innen an siht und erkennet sich von gnâden elliu dinc ze vermüegende, sô haltet si sich in ir eigen nâtûrlîch bilde.

Dar umbe sol diu sêle von gote merken. Daz êrste, daz si habe ein erkantnüsse des, der zuo ir künftic ist. Daz ander, daz si des ein ganze einunge habe, der in ir würken wil. Daz dritte, daz si habe ein lustigez brûchen des, der sî sô rîchlîche ze tische nemen wil. Daz vierde, daz si von des hêrschaft eine beschirmunge habe, mit dem si ruowen sol. Ûf daz sprichet Dionysius: swenne sich diu sêle ze gote kêret, sô gehœret ir zuo, daz si sich in got alsô erbilde, daz ûz ir selbes erkantnüsse dehein gestalt ûzer got in ir ûf stê. Unde swenne daz die sêle tuot, sô enthaltet si den ûzern menschen in rehter einunge, dem si daz nâtûrlîche leben gît. Wan sô sich got in die sêle sprichet, sô hât er sich mit ir vereinet, unde würket denne die sêle in sich selber unde machet sî sô vermüegic, daz si zimt oder ez sî hie in der zît niht, daz sî hindern müge an guoten dingen. Swenne sich diu sêle in der vernunft irs bildes in tugende üebet unt daz ir alliu dinc gegenwürtic sint von dem însprechen gotes, sô hât der geist ein frîez însprechen in gote nâch dem und daz veterlîche însprechen bewîset ist. Dar umbe sol diu sêle wizzen, wie si sich zwischen ir unde gote halten sülle, alsô daz si vernemen müge, in welcherleie üebunge sî got ziuhe und ir sîne manunge tuo. Und umbe daz sol diu minnende sêle got über alliu dinc minnen, der sich selber in sî senket unde würket in ir mit sînem geiste unde gît ir erkantnüsse, daz si die minne, die si von im innen an im hât, sol gegen allen menschen haben und erzeigen, unde diu sêle sol gote sich alsô undertân machen, als ob er alleine sînen tôt durch ir willen erlitten habe. Und swenne si daz tuot, sô nimt si in der wârheit zuo und ist geschickt ze enpfâhenne die gemeine gâbe gotes, mit der si komen sol zuo der wârheit der menscheit Kristî. Aber sô si minr tuot denne si vermac, sô wirt si imme lîchamen eime tiere gelîchent, daz man ze grœzerm vermügen nœten muoz; wan der minnist mensche, der gotes êwiclîchen mangeln sol, durch den hât Kristus mêr werke der minne geworht, denne alle heiligen ie durch sînen willen getân habent. Wan ob alle crêatûren reden kunden, sô möhten sie niht volsagen den adel, den got an den menschen, sunder an die sêle, geleit hât, alsô daz er keine crêatûre wil noch mac hôchwirdiger machen. Unde daz bewîset er uns selber mit sîme wesentlichen underscheide, den diu menschlîchiu nâtûre mit sîner götlîchen nâtûre hât. Unt dar umbe solten der sêle alle crêatûren versmâhen unde ze snœde sîn, durch die si möhte gezogen werden von den dingen, dar zuo si von gote beschaffen ist, und solte sich schamen, sît si daz êwige guot begrîfen mag unde daz versûmet.

Hie ist ein frâge: sît diu sêle sô edel ist, daz si zît noch stat noch nâtûre niht bewegen mac noch berüeren in irm wesenne, obe got âne bilde sîner eigenschaft in ir würke? Über daz antwürtent die lêrer unde sprechent: sît diu sêle ein crêatûre ist und ein geistlîch wesen hât, sô muoz daz von nôt sîn, swaz got in ir würket, daz er ez nâch wesen âne zuoval würke; wan alliu sîniu werc sint wesentlich und êwic, als sie in im selber sint, unde werdent in der sêle nâtûrlîche gemeinsamet über die gnâde. Wan gnâde ist ein ûzfliezendez lieht, daz geschicket ist under dem geiste dienstlîch ze sînne; wan gnâde wære niht ein lieht, wære si von dem geiste niht enthaltlîche erkant. Unde swenne sich got in der minne in die sêle sliuzet, sô ist si als unerkannt, als ir der obriste engel ist, unde minnet alliu dinc in götlîcher wîse âne nâtûrlîche eigenschaft. Got ist ein vernünftigez lûterz wesen und ein êwigez eigen, aber diu sêle ist ein gemachetez êwigez eigen. Wan als wênic got in namen und in worten mac begriffen werden, alse wênic mac diu sêle in bilden noch in formen begriffen werden. Diu sêle ist nâtûrlîch geeiniget unde glîch geordent der einigen vernunft gotes, diu alsô geeinet unde gelîch geordent ist in ir selber, daz dehein crêatûre in ir mac stat haben.

Der herre Jêsus sprach ze sînen jungern ‘ich gên iu ze bereiten die stat.’ An den worten sol man zwêne nütze merken. Der ein ist, daz diu sêle von nâtûre zem himele beschaffen ist unt daz got ir rehtiu erbestat ist. Wan got hât alleine die sêle âne underscheit beschaffen mügen, alsô daz nieman wizzen mac, waz si ist. Wan ein ieglîch mensche hât eine sêle, aber waz si in ir wesen ist, des enmügen wir hie in der zît niht wizzen. Dar umbe sprichet sant Augustînus: diu sêle ist von gote beschaffen unde vert wider ze gote, unt dar umbe enmac si niender ruowe haben dan in ime; wan got ist ein geist unde diu sêle ist ouch ein geist und ist ze gote gefüeget als ein geist zem andern. Diu sêle wirt ouch dem fiure gelîchet, daz an sîme wesenne daz hœhste ist unde daz kreftigiste an sîme werke, wan ez enruowet niht, unz daz ez den himel berüeret; wan daz fiwer ist umb alliu elemente gesetzet und ist verre, wîter unde hœher danne luft, wazzer und ertrîche, unde besliuzet diu andern alle in sich unde loufet mit dem himel umbe, wan ez ist im daz nêheste. Dar umbe heizet diu sêle ein fiwer, daz si gote mit der begirde nâch volget als daz fiwer dem himel und enmac niender ruowe haben danne in im. Diu sêle wirt ouch ein vanken himelischer nâtûre genant, wan der vanken ist ûf gein himel gevarn, daz ist: diu sêle Jêsû Kristî diu zeiget uns, daz aller sêle ruowestat niender ist danne ze himele. Wan ez sî denne, daz diu sêle von zîtlîchen dingen ze himelischen gezogen werde, anders der heilic geist enmac in sî niht komen, sîniu werc ze würkenne. Wan alliu werc gotes würket er in dem geiste. Got ist hôch unde der mensche nider: sol er danne zuo im ûf stîgen in andâht, sô muoz er sich hôch machen mit underlegen alles, daz got beschaffen hât, und ouch der sêle krefte, die in den werken des lîchamen mügent volbrâht werden, sô si dar zuo hât erkantnüsse unde minne, in den si über die welt gezogen wirt. Wan sol ich got erkennen, dâ zuo bedarf ich weder ougen noch ôren; sol ich danne mit got an der minne vereinet werden, dâ zuo bedarf ich weder hende noch füeze, mêr: ich bedarf, daz ich mich verberge vor allen beschaffenen dingen unde verslieze mich mit mînem geiste mit gotes geiste unde werde alsô ein geist mit gote; wan diu minne, die got zuo der sêle hât, diu hât in überwunden, daz er alle crêatûre beschaffen hât, daz er ir dâ mite sîn êre offenbârete. Unde wie lustic er die crêatûre gemachet hât, doch sô hât er eteswaz lîdens dâ nebene geleit, swer sîner êren lust niht ahten wil, daz er danne mit lîdenne gedrungen unde geslagen werde. Wan als wunderlich der menschen muot ist, als wunderlich ist der wec ze gote, dâ mite er einen mit lust zuo im ziuhet unde den andern mit ungemache unde slegen, als sant Paulus wunderlîche bekêret wart, dô er an dem wege was die kristen ze slahenne, unde daz er dannoch nâch sîner sêle in den dritten himel gezucket wart. Ouch an dem tage, dar an sant Augustînus bekêret wart, dô kunde er niht ersatet werden von dem wunderlîchen luste, den er hete an der huote, die got der sêle leite, dâ mite er sî zuo im kêrte.

Ez sint driu dinc, dar umbe diu sêle an der crêatûre dekein genüegen hât. Daz ein: daz sie geteilet sint. Daz ander: daz sie lîplich sint unde gênt ûf verderben unde verdrozzenheit, dar umbe an in kein zuonemen gesîn mac. Daz dritte: daz diu gâbe der crêatûren niht geschenket wirt von dem und si von êrste geflozzen sint (daz ist von gote), dar umbe sie der ûf gezogenen sêle in lust niht smecken mügent; wan got der herre locket die sêle zuo im, als ein schêfelîn mit eime grüenen loube von einer stat an die andern gelocket wirt. Und ob aller sêle kraft an einer sêle læge, sô enmöhte si hie daz minniste lôn niht enpfâhen, daz von dem minnisten werke kumt, daz got in êwiger minne geboten hât, oder diu sêle müeste dâ von zerfliezen und an dem lîchame sterben. Daz geschêhe danne niht, obe si allez daz lôn enpfâhen solte, daz got selber ist. Sol ez aber diu sêle vermügen, sô muoz si über sich selber erhaben werden und über alle crêatûre unde muoz in ein götlich wesen gesetzet werden und in die glîchnüsse götlicher nâtûre, wan diu sêle berüeret mit irn obristen kreften die êwikeit unde mit den nidristen die crêatûre, dâ von si dicke ze übele gezogen wirt. Wan möhte diu sêle got als ganz erkennen, als die engel, si enwære in den lîchamen nie komen. Got ist nâch im selber gebildet unde hât sîn bilde von im selber; unde swenne in diu sêle mit rehter erkantnüsse berüeret, sô ist si im an dem bilde gelîch, wan er hât sî nâch im gebildet, unde swenne sich daz götlich lieht in die sêle ergiuzet, sô wirt si mit gote vereinet als ein lieht von dem andern unde heizet denne ein lieht des gelouben götlicher tugende. Wan swâ diu sêle mit irn kreften unde sinnen hin niht komen enmac, dâ treit sî der geloube hin; unde swenne got in der kraft in der sêle begriffen wirt, sô kumt si zuo der tugende der hoffenunge, in der diu sêle ze gote sô gröze zuofluht gewinnet, daz si wênet, got enhabe in allem sînem wesenne niht, daz ir unmügelîch sî. Ûf daz sprichet sant Augustînus: die birn, die ich stal, die wâren mir vil süezer danne die mîn muoter koufte unde mir verslozzen unde verboten wâren. Alsô ist der sêle diu gnâde vil süezer, die si mit wîsheit begrîfet, danne diu allen menschen gemeine ist. Dar umbe sol diu sêle mit den nidersten kreften gote hie dienen unde mit den obristen in der êwikeit, unde si ist niht von zît noch von êwikeit gemachet, mêr: si ist von in beiden ein nâtûre von nihte gemachet. Neiget si sich ûf zîtlîchiu dinc, sô wirt si unstête; haltet si sich aber an diu êwigen, sô wirt si stête unde starc, mit den si überwindet diu wandelbæren dinc.

Und der sêle brütegoum ist der herre Jêsus, der sibenleie glîchnüsse an im hât. Daz êrste, daz er sô schœne ist, daz sich im diu sunne niht gelîchen mac, unde si mac von ir selber niht klâr sîn, sunder got muoz sî liutern, dâ von der luft erliuhtet wirt. Alsô sol sîn brût, diu sêle, sîn an gedanken, an worten und an werken. Unde sol si dar zuo komen, sô muoz sî got liutern von allen meiln der sünden, dâ von diu stat irre wonunge erliuhtet werde. — Zem andern mâle ist der herre Jêsus gar eins hôhen adels, wan er hât einen vater in himel âne muoter unde hât ûf erden ein muoter âne vater, unde dar umbe ist sîn adel sô wunderlich, daz in keins menschen sin begrîfen mac. Dâ gegen sol sîn brût, diu sêle, êrberkeit haben, dâ mite si sich ziere in ir wirdekeit über allez, daz minner ist danne got. — Zem dritten mâle ist der herre Jêsus sô rîch, daz himel und erde und alle crêatûre dar inne sîn ist. Dâ gegen sol diu sêle, sîn brût, frîheit haben unde sol im al ir sorge enpfelhen unde sol kein missetriuwen an sîme fürsehen haben, sît er milte ze gebenne ist denne wir ze nemenne. — Zem vierden mâle ist sîn wîsheit sô klâr, daz si aller herzen grunt durchliuhtet alsô, daz sînen ougen niht verborgen ist. Dâ gegen sol sîn brût, diu sêle, huote unde zuht haben, daz si in sîme ansehen ihtes tuo, daz ir niht zeme ze sîme gevallen. — Zem fünften mâle ist sîn sterke sô mehtic, dâ durch elliu dinc worden sint und enthalten werdent. Dâ gegen sol sîn brût, diu sêle, gröze hoffenunge haben, si sî in widerwertikeit oder in waz lîden und anvehtunge si stê. Wan waz si niht vermac, daz vermac er: sît im elliu dinc müglich sint. — Zem sehsten mâle hât er ein süezez gemüete. Dar umbe heizet in diu geschrift ein lamp âne meil, daz âne zorn und âne râche ist. Dâ gegen sol diu sêle, sîn brût, semfte, güetic unde gedultic sîn in allem dem, daz er hinz ir verhenget ze sîme lobe. — Zem sibenden mâle hât der herre Jêsus Kristus an im êwigen gesunt und unteclîcheit. Dâ gegen sol diu sêle, sîn brût, haben frœlîche unde frîe ledikeit aller ungeordenter dinge und ensol nihtes sô minnen, ez ensî ir alwege alse liep ze lâzenne oder ze habenne durch ir brütegoumes willen, und ir sol ouch niemer kein pîne sô grôz zuostên, ez sî ir alse liep ze lîdenne alse niht. Ir sol ouch gotes gerehtikeit an ir selber als liep sîn als sîn barmherzikeit. Diu sêle sol sich ouch aller gâbe gotes alse vaste an andern fröuwen als an ir selber. Dar umbe stêt geschrieben: der gerehten menschen sêle sint in der hant gotes und er hât sî sô nâhen zuo im gesetzet, daz ims nieman ûz sîner hant nemen mac. Er hât sî ouch mit underscheide gemachet als daz werc sîner hant; der lôn wil er selber sîn in dem êwigen lebenne; wan got hât alleine die sêle ân aller crêatûre hilfe beschaffen wellen nâch dem gewalte sîner mehtikeit und an der vernunft nâch sîner wîsheit unde nâch sîner güete an dem willen, als er sî von êwikeit in sîme gewalte erkant hât ze schepfen unde sêlic ze machen in sîner unmêzlîchen güete. Dar umbe ist diu sêle niht gemachet von der nâtûre gotes, mêr: nâch dem bilde der heiligen drîvaltikeit, dar umbe, daz si alleine mit der minne ze gote gebunden sî und in im ganze ruowe suochen unde sich im gereite ze eime genêmen tempel bewîse. Dar umbe gie er in den tempel unde treib ûz die koufer unde verkoufer unde hiez sie diu dinc fürder tuon. Dâ bî hât er zerkennen geben, daz er den tempel der sêle wil reine haben, daz niht dar inne sî danne er alleine. Und in dem sol diu sêle den engeln gelîch sîn, die dekein merken ûf ûzriu dinc habent unde meinent alleine niht anders danne den lûtern willen gotes ze vollebringen. Wan sie sint sô gar ûf den willen gotes geneiget, daz der in in vollebrâht werde, unde solten sie hezzeln brechen oder ein ander solich dinc tuon, daz tæten sie mit ganzem vlîze, als ob alliu ir sêlikeit dar an læge.

Und welhiu sêle alsô in den willen gotes gekêret wære unde des iren niht suohte, in der würde Jêsus wunder trîben unde wunne haben. Wan sô si irs willen ûz gienge, sô giengen alliu dinc mit Jêsû în, dâ von si alsô erliuhtet würde, daz ir niht widerschînen möhte danne got alleine. Wan wie wol die engel in etlicher mâze der sêle in künftigen fröuden gelîch sint, doch ist in ein ziel gesetzet, über daz sie niht komen mügent. Aber diu sêle mac hie mit guoten werken wol hœher komen; alsô si iezuo in gnâden hie dem obristen engel wol gelîch wære, sô möhte si mit irm frîen willen guoter werke unzellich über den engel komen, sô si von dem lîchamen ûz gienge.

Der unbeschaffen got ist alleine frî und ist glîch der sêle frîheit, aber niht nâch dem und si beschaffen ist, wan si hât gewachet ze nihte ze werden, unt daz si widerbrâht ist, daz hât got von nôt getân. Wan sol Jêsus in der sêle sîn, sô muoz si sich einigen unde muoz swîgen unde hœren sîniu wort. Unde swenne der geist den gewalt in dem sune enpfâhet, sô wirt er gewaltic in eime ieglîchen worte der tugende, der volkomenheit unde der lûterkeit. Und eine solhe sêle enmac niht stœren, si enstê mit gewalte dar inne als in einer götlîchen kraft.

Zem andern mâle offenbâret sich der süeze Jêsus in der sêle mit sîner unmêzlîchen wîsheit, in der sich der vater erkennet mit aller sîner veterlîchen hêrschaft, unde daz wort, daz diu wîsheit selber ist und allez daz dar inne ist und waz er selber eine ist. Unde swenne diu selbe wîsheit mit der sêle vereinet wirt, sô ist aller zwîvel, irrunge unde hindernüsse abe genomen und ist gesetzet in daz klâre lûter lieht, daz got selber ist. Dâ wirt got mit gote in der sêle erkant, unde mit der wîsheit erkennet si sich selber und alliu dinc. Sich offenbâret ouch Jêsus mit sîner unmêzlîchen süezekeit in der kraft des heiligen geistes, unde mit dem fliuzet diu sêle in sich selber und über sich selber und über alliu dinc von gnâden mit gewalte âne mitel in ir êrsten anevanc.

Zuo dem sprichet Richardus über daz buoch der tugent: swenne daz götliche lieht die sêle durchgêt, sô wirt si ir selbes als ungesmac in allen irn werken, daz si sich selber niht lîden mac in ir eigenen tugende, mêr: si helt sich zuo dem gesmacke gotes. Ouch sprichet sant Augustînus: mîn sêle ist dâ mêr, dâ si minnet, denne dâ si dem lîbe daz leben gît, und in der mâze ist mir got nêher, denne ich mir selber bin, wan ein ieglîchiu minnendiu sêle, diu got sô verre gevolget hât, daz si über sich selber erhaben ist unde mit dekeinem luste ûf ir selber noch ûf keiner crêatûre ruowet, diu wil ouch keinen lust haben von götlichem înfluzze, mêr: si wil got selber ze luste haben. Wan sô diu sêle von den dingen erlediget ist, der ir gewizzen kuntschaft hât, unde des bildes gotes kein entbern hât, sô hât diu vernunft einen ledigen zuoganc in die êwigen wârheit. Wan diu sunne der êwikeit wirfet sich mit irm schîne in die sêle unde durchdringet ir krefte alsô, daz ein ieglîchiu kraft berüeret wirt mit den zuovellen materiellîcher dinge von der schickunge, als si nâtûrlîch dar zuo gefüeget unde geordent sint. Unde daz lieht der êwigen sunne erhebet alle krefte der sêle unde machet sî ime gelîch in eime gar vernünftigen bilde. Unde swenne diu sêle daz werc wesentlich lîdet, als ez got wesentlich vernünftig würket, sô wirt der sêle vernunft ein lieht aller werke, diu got von gnâden in ir würkende ist. Unde swenne diu vernunft alsô erhaben wirt, alse vor geseit ist, sô erhebet si alle krefte über alliu zîtlîchiu dinc, daz dannoch die krefte von den nideren dingen ungehindert blîbent und alwege zuo nement unde niht abe. Wan diu vernunft des wesens gotes stêt an dem, daz er uns gebe; aber von nâtûre ist daz an im, daz er sich uns selber gebe, und der sêle nâtûre ist, daz si sich dem gebe, der sich ir geben hât; unde mit dem ist der geber und diu gâbe, der würker und daz werc einic. Dar umbe sprach der herre Jêsus ‘ich gên zuo dem, der mich gesant hât.’ Alsô mac diu sêle sprechen, sô si sich ûf ze gote erhebet: ich gên zuo dem, von dem ich komen bin.

Des êrsten gêt si zem vater in eime stêten willen, sich niht mêr mit der crêatûre unordenlîchen wider sînen willen ze bekümbern. Zem andern mâle gêt si an eime volkomenen wege, gote genuoc ze sîn in allem deme, dar zuo er sî ziuhet; unde zem dritten mâle gêt si in dem süezen gesmacke götlicher minne, in dem ir lîden kein lîden ist. Zem vierden mâle gêt si in den vier tugenden (daz ist: wîsheit, mâze, sterke unde gerehtikeit) über zît und über alle crêatûre. Si gêt ouch in den drin tugenden: gloube, hoffenunge und minne, âne die ze gote nieman komen mac. Dar umbe wer kan ez wizzen, zuo waz wunders diu sêle kome, diu der hant gotes enpfolhen ist? Wan ein ieglîchiu sêligiu sêle sol ir herze alwege ûf tuon gegen dem trôste gotes, unde waz si von im enpfâhet, daz sol si giezen in die nidersten krefte, dâ mite si got niht begrîfen sol, anders er würde gesmêhet ûz ir swachen erkantnüsse, diu ûz irn nidersten kreften erschînet. Unt dar umbe, daz alle sêle gegen gote niht glîch gefüeget sint, sô smecket in got niht gelîch in sîme erschînen, als diu sunne allen ougen niht gelîch schînet.

Ez stêt geschrieben ‘von der wurzen Jessê sol eine gerten enspringen.’ An den worten sol man driu dinc merken: waz diu wurze sî, von der got in der sêle geborn wirt, und in welcher mâze und waz nütze dâ von kome. Diu wurze von Jessê ist als vil gesprochen als ein fiurigiu nâtûre, diu allez daz zuo ir ziuhet und in sich verwandelt, daz in sî kumt. Alsô ist diu fiurige nâtûre gotes: sô si die sêle zuo ir ziuhet und in ir verwandelt, sô wirt si geistlîch in ir erkantnüsse geborn; wan diu sêle hât ein gemeinez lieht mit den engeln, in dem si got erkennet, unde daz lieht, daz ir angeschaffen ist, daz ist diu vernunft unde treit âne underlâz in die sêle die wîsheit gotes. Aber swenne si in den lîcham gozzen wirt, sô ervinstert si.

Man liset, daz drie künige Kristô ir opfer brâhten. Bî den sol man verstên die drie nidersten krefte der sêle, die undertân süllent sîn den obristen drin kreften der sêle. Dar umbe wil ich hie von den obristen kreften der sêle sagen, wie die künige sîn unde waz gâbe sie den nidersten kreften bringen.

Der êrste künic ist diu gedêhtnüsse, der bringet ûz sîme rîche die fruht. Swenne diu sêle merket, wie edel sî got beschaffen hât, sô fliuzet ûz der erkantnüsse ein lustigiu begirde, diu sich ze gote erhebet unde wirfet ze rücke alliu zîtlîchiu dinc. Sô ist denne wêrlîche der künic der gedêhtnüsse komen und hât geopfert daz golt der begirde zuo gote mit einem ûfgeben aller ander dinge. — Der ander künic der sêle ist diu vernunft. Diu kumt zuo der andern kraft, diu mâze oder bescheidenheit heizet. Unde swenne diu sêle erkennet, wie si von gnâden den willen gotes erfüllen mac, sô wirt si unverdrozzen, sich aller crêatûre undertân ze machenne durch gotes willen, und einer ieglîchen mêr, sô vil si von gote mêr gewirdiget ist. Sô kumt danne diu bescheidenheit mit rîcher gedult und enpfâhet mit dancsagen allez, daz got über si hie mit dem lîchame verhenget, unde mit dem kumt ir diu fruht des wîrouches, dâ von ir alle tugende vereinet werdent, alsô: waz ander herte unde swære an kumt, daz wirt ir von minne ringe und müglich ze tuonne. — Der sêle dritter künic ist der wille. Swenne der mit ganzer sterke der sêle daz fiwer der minne bringet unde sî alsô durchgêt, daz allez daz verzeret wirt, daz in der nâtûre zuo sünden gloset, sô wirt si sô stête, daz si weder tôt noch leben von der minne gotes niht gescheiden mac. Sô ist ir denne brâht die mirren, dâ mite si behalten wirt vor der viule zîtlîcher dinge, diu vil übels an der sêle bringent. Wan sant Ambrosius sprichet: got giuzet die sêle schaffende, unde giezende beschaffet er sî. Unde swenne si in minnet, sô gît er sich ir âne mitel, als diu geistlîchiu brût wol enpfant, dô si sprichet in der minne buoche ‘dô ich was an der ruowe mînes bettes, dô kam mîn liep unde klopkete an mîn venster unde tet sîne hant hin în unde ruorte mich.’ Bî dem sol man verstên: swenne sich diu sêle selber erkennet, sô ruowet si von allen dingen, diu hie bî ir sint, dar umbe, daz si selbe edler unde wirdiger ist dan alliu andriu dinc in der zît. Unde swenne diu sêle ûz allen crêatûren und ûz ir selber nû gegangen ist, sô muoz ouch diu êwige wârheit ûz gên ze suochen sîne minnende sêle, unde berüeret ir vernunft und erhebet sî alsô mit irm liehte, dâ von si mêr gerîchet wirt danne von alle dem, daz si vor in ir nâtûre von lîplîchen dingen ie verstanden hât. Dâ von sant Augustînus sprichet: reht als diu sunne mit irm schîne daz glas durchgêt, daz alliu dinc in im erkant werdent, alsô wirt der sêle vernunft von dem liehte gotes erliuhtet, daz si erkennet, daz si diu dinc mac, diu gote zuo gehoerent; und in dem wirt diu sêle schînen in ir blôzheit unde got in sîner ledikeit, des Dionysius wol enpfant, dô er sprach: dô sich diu blôze sêle mit irm blôzen gote vereinte, dô wart si enthalten in der wüeste der gotheit. Unde si heizet wol ein wüeste, wan in si gesach nie kein crêatûre von gnâden. Dar umbe dürfent sich die wol schamen, die an den dingen unverstendic sint. Wan ob der obristen engel einer her ab kême unde daz ouch alle crêatûre als vernünftic wêren als er unde retten von menschlîcher sêlekeit, sô enmöhten sie alle unz an den jüngesten tac niht volsagen, waz got einer ieglîchen minnenden sêle in dem êwigen leben geben wil. Dar umbe solte diu sêle niht anders suochen danne got durch got. Wan sô si sich ie lûterr helt, sô sich got ie lûterr in si senket unde würket ie volkomenlîcher sîniu werc in ir, unde mit dem stêt si an dem sicheristen, alsô daz si von minne wegen durch gotes willen alwege lieber sich von dem lîchame scheiden wolte, danne durch ir selbes willen dar inne blîben. Si ist ouch arm an ir selber, alsô daz si hie unde dort alleine got erkennet. Ein solhiu sêle endarf ouch ûz ir selber niht suochen, sît sî der heilig geist in der schuole irs herzen lêret diu dinc irre sêlekeit. Si haltet sich ouch der gâbe, dâ mite got sîn aller liebesten friunde begabet hât. Unt dar umbe, daz si alliu ir werc nâch dem aller liebesten willen gotes an dem hœhsten volbringe, sô üebet si sich, daz si einer lûtern gewizzen niemer âne sî, ûf daz der himelische vater sîn êwigez wort in ir âne underlâz gebern müge: Jêsum Kristum sînen sun. Wan diu sêle ist nâch dem obristen teil in der zît niht unde würket ouch niht in der zît, si ist ouch denne über tûsent mîle als nâhen als der stat, dâ ich iezuo an stê.

Ez sprechent ouch diu lêrer: allez, daz bilde ie enpfienc oder zît ie beruorte, daz des niht in die sêle kome; unde niht alleine, daz zît enpfienc, mêr: daz ie glîchnüsse enpfienc. Daz houbet der sêle ist diu obriste kraft, unde sît der zît unde si beschaffen wart ist si der gnâden götlîches liehtes nie âne gewesen, und in der kraft ist der sêle diu zît, dar inne got die welt beschaffen hât, und ouch der jüngeste tac als nâhen, als diu zît, in der ich iezuo rede. Und wan diu sêle in der kraft des houbtes stêt, sô enpfâhet si den nutz dâ von, daz ir alle gnâde unde sêlekeit, die alle heiligen besezzen hânt, alse gemeine werdent, als ob si ir eigen wêren. Wan daz ist ein gewissiu wârheit: wer reht in daz houbet kême, der têt niemer keine sünde, im würde ouch diu êwige fröude sô erkant unde würde alsô gelêrt, daz er keiner predie bedörfte. Dar umbe süllen wir daz houbet der sêle ûf heben unde süllen uns samenen in die wîte unde breite solher kraft unde scheiden uns von zîtlîchen dingen zuo den êwigen, sô gebirt got in der kraft allez, daz er an gewalt, an wârheit und an wîsheit ist, ganz in die sêle. Jâ diu sêle, in der diu gnâde ist, diu ist lûter unde reine und ist gote aller glîchest. Wan allez, daz dem vater gevallen sol oder uns ze nutze unde heil komen sol, daz muoz ime gevallen in sîme sune, und ûzer im gevellet im nihtes niht. Wan daz ist der adel, den got in die sêle gepflanzet hât, daz si ein sêlige nâtûre hât unde die gnâde von gote enpfâhen mac und daz in der gnâde daz lieht götlîcher lûterkeit in die sêle schînen mac unde daz wort in der drîvaltikeit in der vernunft sprechen mac unde daz leben der êwekeit in ir würken mac.

Die lêrer sprechent: diu sêle ist ein ûftragendiu kraft in dem gewalte des vaters und ein widerbirkender schîn in der wîsheit des suns und ein rüerender umbelouf in der süezekeit des heiligen geistes. Ouch sprichet sant Augustînus: diu sêle ist komen von dem himelischen lande ûz dem veterlîchen götlîchen herzen und ist gemachet von götlîcher minne und ist geborn von dem hôhen geslehte der heiligen drîvaltikeit und ist ein erbe des himels und ist ein gebieterinne aller crêatûre und ein besizzerinne aller der fröuden, die got geben mac in sîner êwekeit. Wan si ist ein bilde gotes und ist diu edelste crêatûre, die got ie gedâht hât. Wan got greif zwischen der gotheit unde der götlîchen nâtûre in sîn êwigez wesen unde machete die sêle von nihte, als er himel und erde von nihte hât gemachet und alliu dinc. Unde swenne man frâget, wie grôz diu sêle sî, sô sol man wizzen, daz ir grœze himel und erde niht erfüllen mac niwan got selber, den die himel aller himele niht begrîfen mügent. Dar umbe swer die sêle mezzen welle, der mezze sî nâch gote. Si ist ouch alsô schœne die wîle si in gnâden gotes ist unde sich mit sünden niht ungestalt machet, ob die obristen engel Seraphin unde Cherubin und alle heiligen sî êweclîche betrahtet hêten nâch ir gestalt unde glîchnüsse, sô enmöhten sis niht ervarn: wan si ist gotes bilde. Und nâch dem leben der zît fliuzet si wider in irn nâtûrlîchen ursprunc, von dannen si geflozzen ist, unde ie lediger si sich gehalten hât vor zîtlîchen bilden unde crêatûren, sô si ie glîcher wider in got fliuzet: wan der geist gotes ist blôz unde ledic aller materie, bilde unde formen. Dar umbe, wil diu sêle dem blôzen geiste gotes glîch werden, sô muoz si blôz unde ledic werden alles gemerkes unde prüevens der sinlîcheit und ein abescheiden haben aller dinge, diu niht got sint. Int daz solhiu blœze unde ledikeit allen geisten niht erkant ist, daz ist alleine schult unsers unerkanten lebens und unser ungeüebeten sinne. Wan allez daz guot, daz in aller crêatûre gesîn mac, daz vindet diu sêle in gote mit unschetzlîchem luste grôzer fröuden. Ouch sprichet sant Augustînus: dô allez daz in mir sweic daz in mir was, dô sprach got ein stillez wort in mîner sêle, daz verstuont nieman dan ich. Unde zuo welcher sêle daz wort gesprochen wirt, diu vergizzet aller bilde unde formen unde wirt ein inwonerinne mit gote. Dâ von ouch sant Paulus sprichet ‘von der zît unde sich daz êwige wort in mîner sêle offenbârte, dô lebte ich dem fleische noch dem bluote niht mêr.’ Wan als vil diu sêle ir selbes ledic ist, als vil ist si ouch ir selbes eigen unde gewaltic. Diu getriuwe unde minnende sêle diu tuot als diu bin, diu von manigerleie bluomen die süeze ûz ziuhet, dâ von si honic machet. Alsô nimt diu sêle von allen bluomen der tugenden von ieglîcher etwaz, dâ von si gebezzeret unde gesterket wirt. Unt daz ist ir gar nôt, wan si hât grôzer vînde drî: daz fleisch, diu welt unde den tiuvel, die an einander hangent als drîe kirschen an eime stingel. Und under den drin vienden ist der lîcham der swêriste, dar în diu sêle als in einen kerker gesetzet ist: niht daz si sîne bœse begirde volbringe, mêr: widerstê und in dem widerstên tegelîche den lôn in dem himel mêre unde hie die îngozzen minne. Dar umbe sprichet Senecâ der heidenische meister: ez ist dem menschen niht als schedelich als er selber. Wan der tôt ist gesetzet zuo dem îngange des lustes bœser begirde und ûz dem nâch volgen bœser begirde koment die wege, die uns reht ziment, der ende etwenne senkent in die tiefe der helle. Unde dar umbe wan diu sêle, diu ein frouwe des lîchames ist, sîner bœsen begirde nâch henget und im die sünde niht wert, sô vellet si in schulde unde muoz gote dar umbe genuoc tuon hie oder dort. Und ûf daz dem gerihte gotes die niht enpfliehen mügent, die ir sêle mit sünden tœtent und in fleischlîchen lüsten endent, sô sprichet er in dem wissagen Amos ‘ir sullent wizzen, daz mîn zorn über iuch gên wirt als der karren, der vor swêre krachen muoz, unde vor dem zorne enmac der snelle niht enpfliehen noch der starke enmac sîn mit sîner kraft niht überic werden noch der gewaltige enmac ez von im niht schieben. Wan wie schœne, wie starc unde wie gewaltic der man ist, sô entflühet er mir niht.’ Unt dar umbe, daz diu sêle zuo sô gar hôhen wirdigen himelischen dingen beschaffen ist, sô hât meister Eckehart von Parîs an dem ende der vorgeseiten dinge, diu ûz sîner geschrift genomen sint, sîn gebet gesetzet unde sprichet:

Ô hôher richtuom götlîcher nâtûre, zeige mir dîne wege, die dû in dîner wîsheit geordent hâst, und offen mir den gar kostlîchen schatz, dar zuo dû mich geruofet hâst: vernünfticlîchen ze verstên über alle crêatûre, ze minnen mit den engeln unde ze gebrûchen mit dîme einbornen sune unserm herren Jêsû Kristô unde ze erben dich ze enpfâhen nâch dîner êwigen wîsheit unde mich in dîner hilfe vor allem übele ze enthalten. Wan dû hâst mich erhaben über alle crêatûre unde hâst mir în gedrücket daz insigel dînes êwigen bildes unde hâst mîne sêle aller crêatûre unbegrîflich gemachet und hâst dir niht glîchers gemachet denne den menschen nâch der sêle. Sô lerne mich alsô ze halten, daz ich dîn niemer âne sî unt daz dû dîns lieplichen infliezenden werkes in mir niemer gehindert werdest und mich ouch ze keinem ûzern luste âne dich niemer gebe noch mich mit mînen gedanken mit keiner crêatûre mêr bekümbere danne mit dir. Herre, dû bist ein geist, der aller crêatûre unbegrîflich ist, und vergeistest die sêle, daz si in irm geistlîchen eigen über alle crêatûre geordent ist, ûf daz si dir, êwigiu wîsheit, müge nâch dîme götlîchen willen genuoc sîn und in gnâden von allen în gezogenen ungeordenten bilden erlediget werde. Wan dû hâst dir selber die sêle nâtûrlîch geeigent unde glîch geordent; dar umbe behalt sî, daz in ir niht müge stat haben dan dû alleine. O dar umbe, almehtiger unde barmherziger schepfer unde güetiger herre, erbarme dich über mich sünder unde hilf mir, daz ich alle hinderhuote überwinden müge und ir ansuochunge unde schedelîche lüste, unt daz ich volkomenlîchen vermîden müge in gedanken und in werken waz dû verbiutest, unde gib mir ze tuon unde ze halten allez daz dû geboten hâst unde hilf mir ze gelouben, ze hoffen unde ze minnen und in aller wîse ze leben als dû wilt unde wie vil dû wilt unde waz dû wilt. Herre, verlîch mir die riuwe der diemüetikeit und ein bescheiden abebrechen fleischlîcher tœtunge unde dich ze minnen, ze loben unde ze betrahten unde zeime iegelîchen werke unde gedanken, die nâch dir sint. Verlîch mir ein reinez, mêzigez und andêhtigez wârhaftes gemüete und ein würkelîche erkantnüsse dîner gebot unde dar zuo minne unde lust, sie lîhte ze vollebringen. Herre, verlîch mir alwege ein diemüetigez zuonemen zuo bezzern dingen unde niemer ein abenemen. Ô mîn herre, verhenge mir niht, daz ich mich verlâze ûf mîn eigene kraft noch ûf menschlîche ungewisheit unde krankeit nâch mînem verdienen, mêr: alleine nâch dîner güetigen schickunge. Unt dar umbe, herre, schicke mich in güete selber unde mîne gedanken und alliu mîniu werc in dîn gevallen, alsô daz von mîn selbes wegen in mir unde von mir alwege dîn wille geschehe und ich erlôst werde von allem übel unde brâht werde zuo dem êwigen lebenne, dâ dû drîveltig in der persône bist und einig in dem wesen götlîcher nâtûre, daz ist vater, sun, heilic geist und êwiclich gesegenter almehtiger got. Âmen.