Tractate — Chapter 5

Von dem êrsten sol man wizzen, daz der wîse unde wîsheit, wâr unt wârheit, guot unt güeti, gerehtekeit unde gereht sich einander an sehent. Diu güeti ist niht gemachet noch geschaffen noch geboren: si ist gebernde unt gebirt den guoten, unde der guote, alsô verre als er guot ist, ist ungemachet, ungeschaffen, mêr: unt doch geboren kint unde sun der güeti. Diu güeti gebirt sich und allez, daz si ist, in dem guoten wesenne. Wizzen, minnen unt würken giuzet si alzemâle in den guoten, unt der guote nimet allez sîn wesen, wizzen, minnen unde würken von dem innigôsten der güeti unt von ir alleine. Guot unt güeti sint niht mê denne ein güeti alleine, sunder geborn gebernde unt doch geboren kint der güeti unde geboren werden. In dem guoten ist alleine ein wesen, ein leben. Allez, daz des guoten ist, daz nimet er beidiu von der güeti unt in der güeti. Unde dâ von ist unt lebet unt wonet er unde dâ bekennet er sich selben unt allez, daz er bekennet unde minnet, allez daz minnet unde würket er mit der güeti, in der güeti unt diu güeti mit ime unt in ime aller werke, nâch dem als beschrieben stêt. Unde sprichet der sun ‘der vater in mir inne blîbende unt wonende würket diu werc. Der vater würket biz nû unt ich würke. Allez, daz des vaters ist, daz ist ist mîn; allez, daz mîn ist, daz ist mînes vaters: sîn geben ist mîn nemen.’

Doch sol man wizzen, daz der name oder daz wort besliuzet in ime niht anders weder minre noch mê denne blôz unde lûter güeti. Doch gît ez, sô wir sprechen guot, unt vernimet man, daz sîn güeti ist ime gegeben înfliezende unde geboren von der ungeboren güeti, und her umbe sprichet daz êwangelium ‘als der vater hât daz leben in im selben, alsô hât er gegeben dem sune, daz er habe daz selbe leben ouch in im selbe.’ Er sprichet: in ime selber, niht von ime selben, wan der vater hât ez ime gegeben.

Allez, daz ich nû hân gesprochen von dem guoten unde von der güeti, daz ist ouch gelîch wâr von dem wâren unt von der wârheit, von dem gerehten unt von gerehtikeit, von dem wîsen unde von wîsheit, von gotes sune unde gote dem vater, von allem dem, daz von gote geboren ist unt daz niht enhât keinen vater ûf ertrîche, in daz sich ouch niht gebirt allez, daz geschaffen ist. Allez, daz got niht enist, in dem ouch kein bilde niht enist denne got blôz lûter alleine.

Wan alsô sô sprichet ouch sant Johannes in sînem êwangeliô, daz allen den ist gegeben maht unde mügent gotes süne werden, die niht von bluote noch von dem willen des vleisches noch von mannes willen, sunder von gote und ûz gote alleine geboren sint.

Bî dem bluote meinet er allez, daz an dem menschen niht undertênic ist des menschen willen. Bî des vleisches willen meinet er allez, daz in dem menschen sînem willen undertênic ist unt doch mit einem widerstrîte unde neigunge nâch des vleisches begerunge, unt ist gemeine der sêle unt dem lîbe und enist niht eigentlichen in der sêle alleine; unt dâ von werdent die krefte müede unt kranc. Bî dem willen des mannes meinet sant Johannes die hœhsten krefte der sêle der nâtûre, unt ir werc ist unvermischt mit dem vleische unt stât in der sêle lûterkeit abe gescheiden von zît unde von stat unde von allem dem, daz zuo zît unt stat keine zuoversiht hât oder smac, daz mit nihte niht gemein hât, in dem der mensche nâch gote gebildet ist, an dem der mensche gotes geslehte ist unde gotes sippe. Unt doch, wan sie got selben niht ensint unt in der sêle unt mit der sêle geschaffen sint, sô muoz si ir selbes entbildet werden und in gote alleine überbildet, in gote unt ûz gote geboren werden, daz got alleine vater sî. Wan alsô sint sie ouch süne unt gotes eingeboren süne.

Wan alles des bin ich sun, daz mich nâch ime unt in sich gelîche bildet unde gebirt. Ein sôgetâner mensche ist gotes sun, guot der güeti sun, gereht sun der gerehtikeit. Alsô verre als er alleine sun ist, sô ist er ungeboren gebernde, unt er geboren sun hât daz selbe wesen, daz diu gerehtikeit hât, und ist unt tritet in alle die eigenschaft der gerehtikeit unde wârheit. Ûz aller dirre lêre, diu in dem heiligen êwangeliô beschrieben ist unde sicherlichen bekant, in dem nâtûrlichen liehte der vernünftigen sêle vindet der mensche gewâren trôst alles sînes leides.

Sant Augustînus sprichet: got enist niht verre noch lange. Wilt dû, daz er dir niht verre noch lange sî, sô füege dich zuo gote; wan dâ sint tûsent jâr als der tac, der hiute ist. Alsô sprich ich: in gote ist niht trûrikeit noch leit noch ungemach. Wiltû ledic sîn alles ungemaches unde leides, sô halte dich unde kêre dich in got unt zuo gote alleine. Sicherlîchen, allez leit daz kumet dâ von, daz dû dich niht enkêrest in got noch zuo gote alleine. Unde stüendist dû in gerehtikeit gebildet alleine unt geboren, wêrlîchen, dich enmöhte alsô wênic iht leidic machen, als ouch diu gerehtikeit got selben.

Salomôn sprichet ‘den gerehten betrüebet niht allez daz ime beschehen mac.’ Er sprichet niht: den gerehten menschen noch den gerehten engel noch diz noch daz, swaz des gerehten ihtes ist, sunder daz sîn gereht ist unde daz er gereht ist, daz ist sun unde hât vater ûf ertrîche unde crêatûre und ist gemachet unde geschaffen; wan sîn vater ist crêatûre gemachet oder geschaffen, aber gereht lûter, wan daz niht geschaffen noch gemachet vater hât unt gerehtikeit got alleine ist. Dar umbe mac leit unt ungemach alsô wênig in in gevallen als in got. Gerehtikeit mac in niht leidic gemachen, wan alliu fröude, liebi unt wunne ist gerehtikeit, und ouch wan machôti gerehtikeit den gerehten leidic, sô machete si sich selber leidic. Ungelîch unt ungereht enmöhte niht machen noch ouch schaffen den gerehten leidic, wan allez, daz geschaffen ist, daz ist verre under ime unt hât niht enkeinen îndruk noch înfluz in dem gerehten noch gebirt sich niht in in, des vater got alleine ist.

Her umbe sol der mensche geflîzen sîn, daz er sich entbilde sîn selbes unt aller crêatûre noch keinen vater wizze denne got alleine. Sô enmac in niht leidic machen noch betrüeben, weder got noch crêatûre, weder geschaffen noch ungeschaffen, und allez sîn wesen, leben, bekennen unde minnen unde wizzen ist ûz got und in got unt got. Noch ist ein anderz, daz man wizzen sol, daz ouch den menschen trœstet in allem sînem ungemache. Daz ist daz sicherlichen, daz der gereht unde guot mensche sich fröuwet ungelîche, jâ unt unspreclîchen mê in dem werke der gerehtikeit, denne er oder ouch der oberste engele wunne hât unt fröude in sînem nâtûrlichem wesenne oder lebenne. Unt her umbe gâben die heiligen frœlîchen ir leben dur die gerehtikeit.

Nû sprich ich: sô dem guoten unde gerehten menschen schade beschiht ûzerlîchen, unt ist, daz er belîbet gelîches gemuot unt in friden sînes herzen unbeweget, sô ist wâr, daz ich gesprochen hân, daz den gerehten niht betrüebet von allem dem, daz ime beschiht. Unt ist aber, daz er betrüebet wirt von dem ûzerlîchen schaden, wêrlîchen, sô ist gar billîchen unde gotes reht, daz got verhenget hêt, daz der schade dem menschen ist beschehen, der dâ wolte und ouch wânde gereht sîn unt in noch sô kleiniu dinc betrüeben mohten. Unt ist ez denne reht gotes, wêrlîchen, sô sol er sich niht betrüeben, sunder er sol sich fröuwen vil mê denne sînes eigenen lebennes, des sich der mensche doch mê fröuwet unt werder ist einem ieclîchen menschen denne alliu disiu welt; wan waz hilfet den menschen alliu diu welt, sô er niht mê enwêre?

Daz dritte wort, daz man wizzen mac unde sol, ist daz: in nâtûrlîcher wârheit ein einiger brunne unde lebendiu âder aller güeti weslîcher wârheit unt ganzes trôstes ist got alleine, unde allez, daz got niht enist, hât in ime selbe nâtûrlîche bitterkeit und untrôst unt leit, unt leit nihtes niht zuo der güeti, diu von got ist und got alleine ist, sunder si minret unde bedecket unt verbirget die süezikeit unt die wunne unt den trôst, den got gît.

Nû spriche ich für baz, daz allez leit kumet von liebi des, daz mir schade hât benomen. Ist mir denne schade ûzerlîcher dinge leit, daz ist ein wâr zeichen, daz ich minne ûzerlîchiu dinc unt minne wêrlîchen leit unt untrôst. Waz wunders ist denne daz, daz ich leidic wirde, sô ich doch leit unt untrôst minne unt daz ouch mîn herze suochet unde mîn minne gît daz guot der crêatûre, daz gotes eigen ist? Ich kêre mich zuo der crêatûre, von der untrôst von nâtûre kumet, unt kêre mich von dannen, von dem trôst unde fröude von nâtûre kumet: waz wunders ist daz denne, daz ich leidic unt trûric wirde unde bin? Wêrlîchen, unmüglich ist gote unt aller der welte, daz der mensche gewâren trôst vinde, der trôst suochet an den crêatûren. Der aber got minnet alleine in der crêatûre und die crêatûren in got alleine, der vindet gewâren unt rehten unde gelîchen trôst allenthalben.

Nû volgent her nâch von den stücken als bî drîzigen, der dâ ieclîchez alleine billichen trœsten sol den redelîchen menschen an sînem leide. Daz ein ist: allez ungemach unt schade ist niht sunder gemach unde kein schade ist niht lûter schade, unt dar umbe sprichet sant Paulus, daz gotes triuwe unt sîn eigen weslîchiu güeti enlîdet des niht, daz kein leit unde bekorunge unlîdelîchen unt ze überswenclîchen sî. Er gît unt machet alle zîte etwaz trôstes, dâ mit man sich behelfen mac; wan ez sprechent ouch die heiligen unde die heidenschen meister, daz got unt nâtûre lîdet des niht, daz lûter bœs oder leit müge sîn noch gewesen.

Nû setze ich, daz ein mensche hât hundert marc, der verliuret ez vierzic unt behaltet ime diu sehzic, wil der mensche alle zît gedenken an die vierzic, die er hât verloren, sô belîbet er ungetrôst und riuwec. Wie möhte der iemer getrœstet sîn unt âne leit, der sich kêret zuo dem schaden unt leit? unt bildet daz in sich unde siht dar în unde sihet daz an mit leide unt sprichet mit sînem schaden unt der schade kôset wider in unde sihet daz an von antlütze ze antlütze? Unt wêri aber, daz er sich kêrti ûf die sehzic marc, die er noch hât, unt kêrti den rugge den vierzigen, die verloren sint, unt widerbildeti sich in die sehzic unt sêhi die an unt kôseti mit in, sô würde er sicherlichen getrœstet. Daz iht ist unt guot ist daz mac trœsten, daz aber niht ist noch niht guot ist unde daz mîn niht ist unt mir verloren ist, daz muoz von nôt leit und untrôst geben unde betrüebtnis. Dar umbe sprichet Salomôn ‘in den tagen der leide unde der betrüebede vergiz niht der tage der güeti unt der lüsten.’ Daz ist alsô vil gesprochen: sô dû bist in leide unt in ungemache, sô gedenke des guoten unt des gemaches, daz dû noch vor dir hâst, unt behalt ez dir zuo dînem nutze. Und ouch sol daz den menschen trœsten, ob er gedenken wil, wie vil tûsent der sint unt hêtin sie sehzic marc, die dû noch hâst, sie dûhti, daz sie herren unde frouwen wêrîn unde daz sie rîche wêrîn, unt wêrîn von herzen frô unt vil dankbêr gote.

Noch ist aber ein anderz, daz den menschen trœsten sol. Ist er siech und in grôzem smerzen sînes lîbes, doch hât er atz hûse sîn nôtdurft an spîse unde an tranke unt an rât der erzenîen unt an dem dienste sînes gesindes, an klage, an bîwesen sîner friunde. Wie sol der tuon? Wie tuont arme liute, die daz selbe unt noch mê grœzer ungemach hânt unt habent nieman, der in kaltez wazzer gebe? Sie müezent daz blôze brôt suochen in regen, in snê, in grôzer kelti von hûs ze hûs. Dar umbe unde wilt dû getrœstet werden, sô vergiz der, den dâ baz ist, unt gedenke allez an die, den dâ wirser ist.

Für baz sô spriche ich: allez leit kumet von liebi unt minne; wan minne unt liebi ist leides anevanc unt ûzgang. Dar umbe hân ich leit umbe zerganclîchiu dinc, sô hân ich unt hete noch liep unt minne der zerganclîcher dinge unde hâte got niht von allem mînem herzen liep unt minne noch niht, daz got wil von mir hân unt sich mit geminnet wizzen. Waz wunders ist denne daz, daz got verhenget, daz ich gar billichen schaden und leit lîde?

Sant Augustînus sprichet: herre, ich enwolte dich niht verlieren, ich wolte aber mit dir besitzen die crêatûren; daz was von mîner gîtikeit wegen, unt dar umbe verlôs ich dich: wan dir ist unmære, daz man mit dir dich wârheit die valschen crêatûren besitze. Er sprichet ouch anderswâ, daz der valsche gîtic ist. Den an got alleine niht benüeget, wie möhte den benüegen gotes gâbe an den crêatûren, den an got unt mit gote niht benüeget? Einen guoten menschen sol niht benüegen noch trœsten, sunder ime sol ein pîne sîn allez, daz gote frömde unt ungelîch ist; er sol alle zît sprechen ‘herre got unt mîn trôst, unde wîsest dû mich ûf iht denne zuo dir, sô gip mir einen andern dich.’ Dô unser herre gelopte herren Moisen allez guot unde sante in in daz heilige lant, daz dâ bezeichnet himelrîche, dô seite Moises ‘ô herre, niht sende mich, dû wellest denne selber mite komen.’

Alliu neigunge, lust und minne kumet von dem, daz ime gelîch ist; wan alliu dinc neigent unde minnent sich selben gelîchelîche. Der reine mensche minnet alle reinikeit, der gerehte minnet unt neiget zuo der gerehtikeit, der munt der menschen sprichet von dem, daz ime innic ist. Alsô sprichet unser herre, daz der munt sprichet von vülli des herzen. unde Salomôn sprichet, daz des menschen arbeit ist ime in dem munde. Dar umbe ist daz ein wârez zeichen, daz niht got ist in des menschen herzen, sunder diu tœtlîchiu unt zîtlîchiu crêatûre, daz noch ûzer neigunge unt trôst suochet unt vindet. Unt dar umbe sol sich ein guoter mensche vil sêre schamen vor gote unt in ime selben, daz er noch gewar wirt, daz got niht in ime ist unt daz got der vater niht in ime würket, sunder diu leidic crêatûre noch in ime lebet unt würket. Dar umbe sprichet Dâvît in dem salter unt claget ez ‘trêheren wâren mîn trôst tac unt naht, alle die wîle, daz man sprechen mohte: wâ ist dîn got?’ wan neigunge ûf ûzerheit unt an untrôste lust unt trôst vinden unt von dem mit lust geren unde vil reden, daz ist ein wârez zeichen, daz got in mich niht schînet, niht würket. Noch mê solt er sich schamen vor guoten liuten, daz sie des an ime gewar würdin. Ein guot mensche sol niemer schaden geclagen noch leit, er sol daz alleine clagen, daz er der clage unt des leides in ime gewar wirt.

Die meister sprechent, daz undenen an dem himele ist fiur, wît unt vil unt sunder mitel, kreftic in sîner hitze, unt doch wirt der himel von ime niht berüeret alzemâle. Nû sprichet ein andriu schrift, daz daz niderôste der sêle ist edeler denne des himels hœhste. Wie mac denne der mensche sich vermeẓzen, daz er ein himelischer mensche sî unt daz sîn herze in dem himele sîe, der noch berüeret wirt unt leidic von sô kleinen dingen? Nû sprich ich ein anderz. Ein guot mensche mac niht sîn, der dâ niht wil, daz got sunderlîchen wil; wan ime gelîche ist, daz got ihtes welle denne guot; und sunderlîchen in dem und von dem, daz ez got wil, sô wirt ez unt ist von nôt guot unt ouch daz beste, unt dar umbe lêrte unser herre die apostelen unt uns in in unt wir biten alle tage, daz geschehe gotes wille, unt doch, wenne gotes wille kumet unt gewirdet, sô clagen wir unde sîn trûrig unt betrüebet.

Senecâ ein heidenscher meister vrâget: waz ist der beste trôst in lîdenne unt in ungemach, unt sprichet: daz ist, daz der mensche alliu dinc neme, als ob er des gewünschet unde gebeten habe, ob dû hêtist gewünschet unt ouch bêtest, daz alliu dinc von gotes willen beschehen, unt ob ez beschiht, daz enzürne niht. Ez sprichet ein heidenscher meister: herzoge unt obrôster vater unt ein einiger herre des hôhen himeles, allez, daz dû wilt, des bin ich bereit: gip mir willen unt den willen nâch dîme willen.’

Ein guoter mensche sol des gote wol getrûwen, gelouben unt ouch gewis sîn unt got sô guoten wizzen, daz ez unmügelîchen gote sî und sîner güeti unt minne, daz er möhti lîden, daz dem menschen kein lîden oder leit zuo kome, eintweders er wölte dem menschen vil grœzer leit dâ mite benemen oder ouch ûf ertrîche grœzlîcher trœsten oder etwaz vil bezzers dâ von unt dar ûz machen unt dâ gotes êre mêr unt grœzlîcher an lige. Unt doch, wie daz sî in dem alleine, daz ez gotes wille ist, daz ez beschehe, sô sol des guoten menschen wille alsô in gotes unt mit gotes willen ein unt geeiniget sîn, daz der mensche daz selbe mit gote welle, nochdenne ez sîn schade unt ouch sîn verdüemnüsse wære. Dar umbe wünschet sant Paulus, daz er von gote gesundert wære dur got unt dur gotes willen unt dur gotes êre.

Ein reht volkomen mensche sol sich selben sô tôt gewenet sîn unt sich selben entbildet in gote unt in gotes willen sô überbildet, daz doch alle sîn sêlikeit ist, sich selben unt allez umbe niht wizze unt got alleine wizze, niht wellen noch ouch willen wizze denne gotes wellen unt willen wizze, alsô got bekennen, als got niht bekennen. Als sant Paulus sprichet ‘got bekennet allez daz er bekennet unde wil minnen allez daz er minnet unde wil in sich selben sîn selbes willen.’ Unser herre sprichet, daz êwic leben ist bekennen alleine.

Dar umbe sprechent die meister, daz die sêligen in himelrîche die crêatûren bekennent blôz aller bilde der crêatûre, die sie bekennent in dem einigen bilde, daz got ist unt dâ sich selben unt alliu dinc got weiz unt minnet unde wil unt dâ lêret uns beten unde begeren got selben. Dâ wir sprechen: vater unser, der dâ ist in den himelen, geheiliget werde dîn name, daz ist dich bekennen blôz alleine. Zuo kome dîn rîche: daz ich nihtes niht habe, daz ich rîche ahte unt wizze denne dich rîche. Dâ von sprichet daz êwangelium ‘sêlic sint die armen des geistes’, daz ist des willen arm. Unde wir biten got, daz sîn wille werde in der erden, daz ist in uns, als in dem himele, daz ist in gote selbe. Ein sôgetâner mensche ist sô ein unt einwillic mit gote, daz er allez daz wil, daz got wil, unt in der wîse, sô ez got wil. Unt dar umbe, wan got denne etlîche wîse wil, daz ich ouch sünde hân getân, sô wölti ich niht, daz ich sie niht hêti getân; wan sô wirt gotes wille in der erden, daz ist in missetât, als in dem himele, daz ist in woltüenne. Sô wil der mensche gotes dur got enbern unt von got dur got gesunderet sîn. unt daz ist alleine rehtiu riuwe mîner sünde, sô ist mir sünde leit sunder leit. Alsô hât got leit aller bôsheit sunder leit. Leit unt mîn meister leit hân ich umbe sünde, wan ich niht sünde tæte umb allez, daz geschaffen ist, ob joch tûsent welte êweclîchen soltin sîn; doch sunder leit, unt ich nême unde schüefe diu leit in gotes willen unt ûz gotes willen. Ein sôgetân leit ist alleine volkomen leit, wan ez kumet unt urspringet von lûter minne, der lûtersten güeti unt fröude gotes. Sô wirt wâr unt wirt man gewar, daz ich in disem büechlî gesprochen hân, daz der guot mensche, als verre er guot ist, tritet in alle die eigenschaft der güeti selbe, daz got in im selber ist.

Nû merke, waz wunders unde waz lebennes hât der mensche ûf der erden als in dem himele in gote selben! ime dienet ungemach in gemach, unt leit gelîch als liep. Unt dâ bî merke doch in dem selben sunderlîchen trôst. Wanne hân ich die genâde unt die güeti, von der ich nû geseit hân, sô bin ich alle zît unt an allen dingen gelîche unt ouch genzeclîchen getrœstet unde frô, unde hân ich des niht, sô sol ich sîn enberen dur got unt dur gotes willen. Wil got geben des ich enbere dar an, sô hân ich ez in gotes namen unt bin ouch in wunne. Wil got niht geben, sô nime unt enbir in dem selben willen gotes, als er enwil niht, unt alsô nime ich enbern unde niht nemen. Wes gebristet mir denne? Sicherlîchen, eigenlîcher nimet man got enberende denne nemende; wan sô der mensche nimet, sô hât diu gâbe in ir selben, war umbe der mensche frô sî unde getrœstet. Sô man aber niht nimet, sô hât man niht, sô vindet noch weiz man niht, des man sich fröuwe, denne got unt gotes willen alleine.

Ouch ist daz aber ein ander trôst, unt hât der mensche verloren ûzerlîchez guot, sîne friunde, sîne mâgen oder sîn ouge oder waz daz ist, sô sol er des gewis sîn, ob er daz lîdet dur got unde gotes willen güetliche, sô hât er allez daz vor gote zuo dem minsten, dar umbe er daz niht lîden wolte. Ein mensche verliuret ein ouge: wölte er nû des ougen niht enbern umbe tûsent marc oder mê, sô hât er vor gote unt in gote sich behalten sicherlichen allez daz, dar umbe er den schaden oder daz leit niht lîden wolte; unt daz meinet vil lîhte, daz unser herre sprichet ‘ez ist bezzer, daz dû komest in daz êwig lebenne mit einem ougen, denne mit zwein ougen verloren werden.’ Unt daz meinet ouch vil lîhte, daz got sprach ‘wer lâzet vater unt muoter, swester oder bruoder oder waz daz ist, der sol wider nemen hundertvalt unt êwic leben.’

Noch sol man wizzen, daz tugende haben unt lîden wellen gerne unt gedulteclîchen hât ein wîti, als wir ouch sehen in der nâtûre, daz ein mensche schœner unt künsterîcher ist denne der ander. Alsô sprich ich ouch, daz ein guot mensche wol mac ein guot mensche sîn unt doch berüeret werden unde wanken von nâtürlîcher liebi zuo vater unt muoter, minre ald mê, unt doch niht vellic werden von gote noch von güeti, unt doch nâch dem ist er guot unt bezzer, dar nâch er minre unt mê getrœstet unt berüeret wirt unt gewar wirt nâtürlîcher minne unde neigunge zuo vater unt muoter, zuo swester unt bruoder unt zuo ime selben.

Nochdenne, als ich dâ vor geseit hân, könde ein mensche daz selbe nemen in gotes willen als verre als gotes wille ist, daz menschlich nâtûre den gebresten habe, sunderlîchen von gotes gerehtikeit von des êrsten menschen sünde, unt ouch, ob daz niht enwêre, er wölte des gerne enberen in gotes willen, sô wære im gar sêre rehte unt würde sicherliche getrœstet in leide. Daz meinet, daz sant Johannes sprichet, daz daz gewâre lieht liuhtet in vinsternüsse, unt sant Paulus sprichet, daz die tugende werdent volbrâht in krankheit. Unt möhte der diep wêrlîchen, genzlîchen unt lûterlîchen, willeclîchen unt frœlîchen den tôt lîden von minne der götlîchen gerehtikeit, in der unt nâch dem daz got wil unt sîn gerehtikeit, daz der übeltætic getœtet werde, sicherlichen, er würde behalten unt belibe sêlic, wan gotes wille ist unser heil unde sêlikeit.

Aber ein ander trôst ist: man vindet vil lîhte nieman, der iht ieman sô liep habe lebende, daz er niht gerne wölte enbern eines ougen unt blint sîn ein jâr, ob er dar nâch sîn ouge denne wider hêti unt sînen friunt alsô möhte von dem tôde erlœsen. Wölte denne ein mensche ein jâr enberen sînes ougen dur einen menschen und in alsô erlœsen von dem tôde, der doch in kurzen jâren sterben muoz, sô sol er gar billîchen gerne enberen zweinzic oder drîzic jâr, diu er vil lîhte leben möhte. Der mensche enbere sînes ougen, umbe daz er sich selben êweclîchen sêlic mache unt êweclîchen got sehende werde in sînem götlîchen liehte, unt in gote sich selben und alle crêatûren.

Unt aber sô ist ein ander trôst. Ein guot mensche als verre sô er guot ist unt ûz güeti alleine geborn unt ein bilde der güeti, sô ist ime allez daz unmære unt ein bitterkeit unde schade allez daz geschaffen ist. Unt daz ist ouch dar umbe: daz verlîeren ist lôs werden unt verlîeren leit und ungemach unt schaden wêrlîchen bekant. In der wârheit, leit verlîeren ist ein wârer trôst; wan allez ungemach, leit unt untrôst ist ûzerlîchez guot, unt dar umbe sol der mensche niht schaden clagen, er sol vil mê clagen, daz ime trôst unde gemach unbekant ist, unt daz trôst niht getrœsten mac. Er sol vil mê clagen, daz er niht genzeclîcher entbildet ist der crêatûren unt niht în gebildet unt gepflanzet ist unt aller ein bilde ist der güeti.

Ouch sol ein mensche gedenken in sînem leide, daz got diu wârheit sprichet unt gelopt bî im selben der wârheit. Entvieli got sînem worte, sîner wârheit, er ontvieli sîner gotheit unt wêri niht got; wan sîn wort ist sîn wârheit. Sîn wort ist, daz unser leit sol verwandelt werden in fröude. Unt sicherlichen, unt wisti ich daz für wâr, daz alle mîn steine verwandelt soltin werden in lûter golt, ie mê ich denne steine hêti unt grœzer, ie lieber sie mir wërin. Und alsô, spriche ich sicherlichen, würde der mensche krefticlîche getrœstet in allem sînem leide unt ungemache.

Noch ist ein anderz dem gelîche. Kein vaz mac niht zweierleie tranc in ime selben haben: sol ez wîn hân, man muoz von nôt daz wazzer ûz giezen, daz muoz blôz unt îtel werden. Dar umbe, solt dû götlîche fröude enpfâhen, sô muostû von nôt die crêatûre ûz giezen unt ûz werfen.

Her umbe sprichet sant Augustînus: giuz ûz, daz dû erfüllet werdest; lerne niht minnen, umbe daz dû gelernest minnen; kêre dich abe, umbe daz dû zuo gekêret werdest. Eigenlîchen geseit, allez daz nemen unt enpfenclich sol sîn, daz sol unt muoz blôz sîn. Die meister sagent uns, hêti daz ouge keine varwe in im selben, dâ ez bekennet, ez enbekanti noch die varwe die ez hêt noch die ez niht hêt; wan ez aber blôz ist aller varwe, dâ von bekennet ez alle varwe. Diu want hêt varwe an ir, unt dar umbe enbekennet si niht ir selbes varwe noch keine varwe unde hât keine lust von der varwe, niht mê von golde denne von kolvarwe. Daz ouge hât ir niht unt hêt si wêrlîch, wan ez bekennet si mit lust unt mit wunne.

Unt her umbe, daz die krefte der sêle dürnehtiger unt mê blôz sint, dar umbe nimet si mê dürnehtiger unt wîter waz si denne nimet und enpfâhet unt hât grœzer wunne unt wirt mê ein mit dem, daz si nimet, alsô verre, daz diu obrôste kraft der sêle, diu aller dinge blôz ist unt mit nihte niht mêr gemeine hât, nimet niht minre denne got selben in sînem eigen wesenne. Unde sprechent die meister, daz der vereinunge unt durbrüche unde der wunne sich niht mac gelîchen. Dar umbe sprichet unser herre gar merklichen in dem êwangelio ‘sêlic sint die armen in dem geiste.’ Arm ist der, der niht enhât unt arm ist des geistes, unt meinet alsô vil, als daz ouge arm unt blôz ist aller varwe unt enpfenclich aller varwe, alsô der arm ist des geistes, der ist ouch enpfenclich aller geiste unt alles geistes. Got ist ein geist, unt fruht des geistes ist minne, fride unt fröude. Blôz arm, niht hân, îtel sîn wandelt die nâtûre; îtel sîn machet wazzer ze berc ûf climmen unt vil anders wunders, dâ von man nû niht sprechen sol.

Dar umbe, wilt dû ganzen trôst unde fröude vinden in got, sô sich, daz dû blôz siest aller crêatûren, alles trôstes von den crêatûren. Sicherlichen, alle die wîle daz dich trœstet unt trœsten mügent die crêatûren, sô vindest dû niemer rehten trôst. Sô dich aber niut mêr getrœsten mac denne got, wêrlîchen, sô trœstet dich got unt mit ime unt in ime allez daz wunne ist. Trœstet dich daz got niht ist, dû hâst noch hie noch dâ. Unt trœstet dich aber crêatûre niht unde smacket dir niht, sô vindest dû beidiu hie unt dâ.

Möhti der mensche unde künde einen becher zemâle îtel gemachen unt îtel behalten von allem dem, daz füllen mac, ouch luftes, sunder zwîvel der becher verzige unde vergæze aller sîner nâtûre und îtelkeit trüege in ûf biz an den himel. Alsô treit blôz arm und îtel aller crêatûren die sêle ûf zuo got in got; ouch ziuhet ûf in die hœhi gelîchnüsse unt hitze. Gelîchnüsse gît man dem sune in der gotheit, hitze unt minne dem heiligen geiste. Gelîchnüsse in allen dingen unt sunderlîchen mêr unde zuo dem êrsten in götlîcher nâtûre ist geburt des einen, unde gelîchnüsse von einem in ein unt mit eime ist ein begin unt ursprunc der ûzblüegenden, hitzigen minne. Ein ist begin sunder allen begin. Gelîchnüsse ist begin von dem einen alleine unde nimet daz ez ist unt daz ez begin ist von dem einen in dem einen. Minne hât daz von nâtûre, daz si vliuzet und urspringet von zweien als ein ein, als ein, niht minne zwei, als zwei ist minne niht; zwei als ein gît von nôt nâtürlîche minne willeclîchen unde hitzeclîchen oder begirlîchen.

Nû sprichet Salomôn, daz alliu wazzer unt alle crêatûre îlent unt vliezent unt widerloufent in iren ursprunc. Unt dar umbe sô ist von nôt daz wâr sô ich gesprochen hân: gelîchnüs unt minne îlet unt hitziget ûf ze leitenne unt ze bringenne die sêle in den êrsten ursprunc des einen, daz unser vater ist aller in himele unt in erden. Sô spriche ich denne: daz gelîchnüs geboren von einem ziuhet die sêle in got, als er ist ein in sîner ungebornen einunge, unt des hân wir ein offen urkünde. Sô daz lîplîche fiur enzündet unt enbrennet daz holz als ein funke, sô enpfâhet ez fiures nâtûre unt wirt gelîche dem lûtern fiure, daz sunder allez mitel haftet undenen an dem himele. Alzehant vergizzet unde verzihet ez vater unt muoter, bruoder unt swester ûf erde unt îlet unt jaget ûf an den himelschen vater. Sîn vater hie nidenen des funken ist daz fiur unt muoter sîniu ist daz holz; bruoder unt swestern sint die andern funken, unt er beitet der êrsten funken niht: er îlet unt jaget ûf snelleclîchen zuo sînem rehten vater, daz der himel ist. Wan wer bekennet rehte wârheit, der weiz wol, daz daz fiur niht ist reht vater des funken als ez fiur ist: der reht wâr vater alles fiures unt hitze ist der himel.

Unt noch ist daz gar sêre ze merkenne, daz diz fünkelî niht alleine lâzet unt vergizzet vater unde muoter ûf ertrîche, mêr: ez lâzet unt verzihet sich sîn selbes, unt von nâtürlîcher minne kumet ez zuo sînem rehten vater, dem himel; wan ez muoz von nôt erleschen in der kelti der lüfte; doch wil ez bewîsen nâtürlîche minne, die ez zuo sînem wâren himelschen vater hât.

Unt als vor geseit ist von îtelkeit, daz ist von blôzheit, daz nâch dem, daz diu sêle dürnehtiger blôz unt ermer ist unt minre hât der crêatûren unt îtel ist aller dinge, diu got niht sint, dar nâch sô nimet si got lûterlîcher unt mê in got unde ein mit gote und sich in gote unde siht got von antlüte ze antlüte als in ein bilde oder gebildet, als sant Paulus sprichet. Alsô spriche ich nû von gelîchnüsse unt von der minne hitze; wan nâch dem, daz ez dem andern gelîcher ist, dar zuo unt dar nâch jaget ez mê unt ist sneller unt ist ime sîn louf süezer unt wunneclîcher, unt ie mê ez verrer kumet von ime selber unde von allem dem, daz jenez niht enist, dar zuo ez jaget, ungelîcher sich selben unt allem dem, daz jenez niht ist, dar nâch wirt ez gelîcher dem, daz ez jaget, dar zuo ez îlet. Unt wan gelîchnüsse fliuzet von dem einen unt ziuhet unt locket von der kraft unt in der kraft des einen, dar umbe gestillet noch benüeget niht noch dem, daz dâ ziuhet, noch dem, daz gezogen wirt, unz daz sie in ein vereinet werden. Unt dar umbe sô sprichet unser herre in dem prophêten Isaias unt meinet, daz kein hœhi, enkein nidri noch gelîchnüsse, kein fride der minne genüeget mir niht, unz daz ich selbe in mînem sune erschîne und ich selbe in der minne des heiligen geistes enbrant und entzündet wirde.

Unser herre Jêsus Kristus der bat sînen vater, daz wir mit ime unt in ime ein würden, unt niht alleine vereinet, mêr: ein einic ein. Der rede unt dirre wârheit hân wir ein offen urkünde unde bewîsunge in der nâtûre, ouch ûzerlîchen in dem fiure. Wenne daz fiur würket unt an gezündet unt enbrennet daz holz, sô machet daz fiur alze cleine daz holz unt sich selben ungelîche, benimet ime grôpheit, kelti unde swârheit unt fliht des wazzers unt machet daz holz sich selbem, dem fiure, gelîche ie mê unt ie mê; doch gestillet noch benüeget noch geswîget niemer niht, weder holz noch fiur an keiner wermi noch hitze noch gelîchnüsse, unz daz daz fiur gebirt sich selber in daz holz unt gît ime sîn eigen nâtûre unt ouch ein wesen sîn selbes, alsô daz allez ein fiur gelîch eigen ist ungescheiden weder minre noch mê. Unt dar umbe, ê daz diz her zuo kome, sô ist dâ iemer ein rouch, ein widerkriec, ein krastplen und ein strît zwischent fiure unt holze. Sô aber dâ alliu ungelîcheit wirt benomen unt hine getân, sô gestillet daz fiur unt geswîget daz holz. Und ich spriche mêr in der wârheit, daz diu verborgen kraft der nâtûre hazzet verborgenlîchen gelîchnüs als ouch verri, alsô vil ez in ime treit den underscheit unt zweiunge, unt suochet in ime daz ein, daz ez in ime unt durch ez alleine minnet, als der munt in dem unt an dem wîne nimet unt suochet den smac unt die süezikeit; unt hêtî denne daz wazzer den smac der güeti, den der wîn hât, sô minnôtî der munt den wîn niht mê denne daz wazzer.

Unt dar umbe hân ich gesprochen, daz diu sêle in gelîchnüsse hazzet unt niht minnet gelîchnüs als in ir unt durch si, sunder si minnet sî dur daz ein, daz in ir verborgen ist und ein wâr vater ist, ein begin sunder allen begin aller dinge in himele und in erde. Unt dar umbe sô sprich ich, alle die wîle, daz noch gelîchnüsse wirt funden und erschînet zwischent fiure unt holze, sô enist dâ ouch niemer wârer lust noch swîgen, weder ruowe noch genüegede. Unt dar umbe sprechent die meister: gewerden des fiures ist mit widerstrîte, mit andunge unt ouch mit unruowe in der zît. Aber geburt des fiures unt lust ist sunder zît unt sunder verre. Lust unt fröude dunket nieman lang noch verre. Allez, daz ich nû gesprochen hân, daz meinet, daz unser herre sprichet ‘sô diu frouwe gebirt daz kint, sô hât si leit unt pîne, sô aber daz kint geboren ist, sô vergizzet si leides unt pîne.’ Dar umbe sprach ouch got unt manetê uns in dem êwangelio, daz wir biten den himelschen vater, daz unser fröude volkomen werde. Unde dâ seit ouch Philippus ‘herre, zeige unt wîse uns den vater, sô benüeget uns.’ Wan vater daz meinet ein unt in dem geswîget gelîchnüs unt gestillet allez, daz begirde unt wesen hât.

Nû mac der mensche offenlîcher bekennen, war umbe unt wâ von er ungetrôst ist in allem sînem leide, ungemach unt schaden. Daz kumet allez unt alleine dâ von, daz er ûzwendic unt verre von gote ist unt niht îtel noch blôz der crêatûre, gote ungelîche unt kalt an götlîcher minne. Noch ist aber ein andriu sache, wer die merken unt bekennen wil, sô würde er billîchen getrôst an ûzerlîchem schaden, leit unt ungemache.

Ein mensche der vert einen weg, er tuot ein werc oder lât ein ander werc, sô beschiht ime ein schade, oder brichet ein bein oder einen arm oder er verliurt ein ouge ald wirt siech; und wil er denne allez gedenken: hêtist dû einen andern weg gevaren oder ein ander werc getân, sô wære dir diz niht beschehen, sô belîpt er ungetrœstet unt wirt ouch von nôt leidic. Unt dar umbe sol er gedenken: unde wærist dû nû einen andern weg gevaren oder hêtist ein ander werc getân oder gelâzen, dir wære ein vil grœzer schade unt leit beschehen, unt sô würde er billîchen getrœstet unt frô von herzen.

Aber setze ich einez. Dû hâst verloren tûsent marc, sô ensolt dû niht clagen die tûsent marc, die verloren sint: dû solt gote danken, der dir hâte gegeben tûsent marc, die dû verlieren mohtest und ouch lâzen vor der tugende unt gedult üeben und êwic leben verdienen, daz manic tûsent mensche niht enhât. Unt noch ein anderz setze ich aber, daz den menschen trœsten mac. Ein mensche, hêt er guot, gemach besezzen manic jâr unt verliuret daz nû von verhengen, sô sol der mensche wîslîche gedenken unt gote danken, sô er des schaden gewar wirt unt des ungemaches, daz er hêt, und denne alrest weiz er, waz nutzes unt gemaches er vor hâte, unt sol gote danken des gemaches, des er sô manic jâr sich hêt genietet, unt enzürni niht.

Er sol gedenken, daz der mensche nâch nâtürlîcher wârheit niut von ime selben hêt denne bôsheit unt gebresten. Allez daz guot ist daz hât got ime gelihen, unt niht gegeben. Und wer bekennet wârheit, der weiz, daz got der himelische vater dem sune unt dem heiligen geiste gît allez daz daz guot ist. Aber der crêatûre gît er kein guot, sunder er verliehe ez ir ze borgenne. Diu sunne gît dem lufte hitze, aber daz lieht gît si ime ze borge, unt dar umbe, alzehant sô diu sunne under gât, sô verliuret der luft daz lieht, aber diu hitze belîbet; wan diu ist dem lufte gegeben ze eigenne, unt dar umbe sprechent die meister, daz der himelische vater got ist des sunes vater unt niht herre, noch des heiligen geistes herre. Aber got vater, sun unt heilig geist sint herre unt ein herre der crêatûren. Unt wir sprechen, daz got was unt ist êweclîchen vater; aber mit dem, dô er geschuof die crêatûren, sô ist er herre. Nû sprich ich: sît dem mâle daz dem menschen allez, daz guot oder trœstlîch ist, ime ze borge gelihen ist, waz hât er denne ze clagenne, sô er ez wider nimet unde nemen wil? Er sol gote danken, daz er ez ime verlihen hêt sô lange. Ouch sol er ime danken, daz er ime ez alzemâle niht wider nimet daz er ime hêt verlihen, unt wære ouch billîchen, allez daz got dem menschen verlihen hât, der zornic wirt, daz er des einen teil wider nême, daz sîn nie wart unt des er ouch nie herre wart. Unt her umbe sprichet gar wol Jeremias der prophête, dô er was in grôzem lîdenne unt clagenne ‘ô wie grôz unt manicvaltic sint gotes erbarmherzikeit, daz wir niht alzemâle ze nihte werden.’ Wer mir hât verlihen sînen roc, kurset oder mantel, nême der sînen mantel unde liezi mir den roc unt den kurset in dem vroste, ich solte ime vil billîchen danken unt vrô sîn. Unt sol man daz ouch sunderbâr merken, wie daz sô grœzlîchen unreht ich unt der mensche hân, sô wir iht zürnin unt clagen, sô wir iht verlieren; wan sô ich wil, daz guot daz ich hân sî mir gegeben unde niht gelihen, sô wil ich herre sîn unt wil gotes sun nâtürlîchen sîn unt volkomen, unt bin doch noch niht gotes sun von gnâden; wanne eigenschaft des sunes unt des heiligen geistes ist, sich gelîchlîchen halten in allen dingen und in allen sachen.

Ouch sol man wizzen daz sunder zwîvel, daz ouch nâtürlîche menschlîche tugende sô edele und sô kreftic sint, daz ir kein ûzerlîchez werc ze swære enist, noch grôz genüege, daz si sich dar an unt dar inne bewîsen müge unt sich dar in erbilden. Und dar umbe ist ein inrez werc, daz niht zît noch stat besliezen mac noch begrîfen, und in dem selben ist, waz got unt götlîch unt gote gelîch ist, den noch zît noch stat besliuzet; er ist allenthalben unt alle zît gelîch gegenwürtic unt ouch dar an gote gelîcher, denne kein crêatûre volkomenlîchen enpfâhen müge noch gotes güeti in sich bilden. Unt dâ von sô muoz etwaz innigers unde hœhers sîn unt ungeschaffen âne mâze und âne wîse, dâ sich der himelsche vater ganz în bilden unt ergiezen möhte und ouch bewîsen; daz sint der sun unt der heilig geist.

Unt ouch mac daz inre werc der tugende alsô wênic ieman gehindern, als man got niht hindern mac. Daz werc schînet unt liuhtet tac unde naht; daz werc lobet unt singet gotes lop unt einen niuwen gesanc. Dâvît sprichet ‘singent gote einen niuwen gesanc, wan des lop ist von der erden ende.’ Daz werc minnet got niht, daz ûzer, daz zît unt stat besliuzet, daz enge ist, daz man hindern mac unt betwingen, daz müede unt alt wirt von zît unt von üebunge. Daz werc ist got minnen, guot unde güeti wellen, daz allez daz, daz der mensche wil unt ouch wölti tuon, mit lûterm ganzem willen in allen guoten werken hât ietzunt getân, dar an er ouch gelîch ist gote. Von dem schrîbet Dâvît, daz allez, daz er wolte haben ietzunt getân unde geworht, ist volbrâht.

Diser lêre hân wir ein offenbâre bewîsunge an dem steine. Des ûzer werc ist, daz er nider valle unt lige ûf der erden. Daz werc mac gehindern sîn unde vallet er niht alle zît noch âne underlâz. Aber ein ander werc ist noch inniger dem steine unt daz ist neigunge alle zît niderwert, unt daz ist ime angeboren, daz enkan ime got noch crêatûre benemen noch nieman. Daz werc würket der stein âne underlâz naht unt tac. Daz er tûsent jâr dâ obnan læge, er neiget weder minre noch mê denne in dem êrsten tage. Reht alsô sprich ich von der tugent, daz si hât ein innic werc: wellen unt neigen zuo aller güeti und îlen unt wider kriegen von allem dem, daz bœse unt übel ist, gote unt güeti ungelîch. Unde ie daz werc bœser ist unt gote ungelîcher, ie der widerkêr grœzer ist; unt ie grœzer daz werc ist unt gote gelîcher, ie ir daz werc lîhter, lustiger unt williger ist, unt alle ir clage unt leit ist daz, ob leit in si vallen mac, daz diz lîden dur got ze clein ist und alliu ûzeriu werc in zît ze kleine sint, daz si sich niht ganz noch ze vollen bewîsen noch dar în erbilden mac. Unt üebende sich wirt si kreftiger unt von milti wirt si rîcher. Si wölte niht geliten noch überliten hân leit unt lîden: si wil unt wölte alle zît âne underlâz lîden dur got unt güeti. Alliu ir sêlikeit ist lîden dur got, niht geliten hân. Dar umbe ouch unser herre sprichet ‘sêlic sint die dâ lîdent dur die gerehtikeit.’ Er sprichet niht: die geliten hânt. Ein solich mensche hazzet geliten hân, wan geliten hân ist niht lîden, daz er minnet, ez ist ein fürganc unt verlust lîdennes dur got, daz er alleine minnet. Unt dar umbe spriche ich, daz ein solich mensche ouch hazzet noch lîden süllen, wan daz ouch niht lîden ist. Doch hazzet er minre lîden süllen denne geliten hân, wan geliten hân ist verre unt ungelîche lîdenne, wan ez zemâle vergangen ist. Daz man aber lîden sol, daz benimet niht alzemâle lîdenne, daz er minnet.

Sant Paulus sprichet, daz er gotes dur got enbern wölte umbe daz gotes êre unt lop gemêret unt gebreideret würde. Unt man sprichet, daz sant Paulus daz sprêche in der zît, dô er noch niht volkômen was. Ich wêne aber des, daz diz wort kême von einem volkômenem herzen. Man sprichet ouch, daz er meinte, daz er eine wîle von gote wölte gesunderôt unt gescheiden sîn, und ich spriche, daz ein volkômen mensche als ungerne von gote sich scheiden oder sunderôn wölte unt ime als unmêre wêre ein stunde als tûsent jâr. Doch und wêri daz, daz ez gotes wille wêre unt sîn êre, daz er gotes enbêre, sô wêre ime alsô lîhte tûsent jâr oder êweclîchen als ein tac, ein stunde.

Ouch ist daz inre werc dar nâch götlîch unt gotvar unt ist geminnet götlîcher eigenschaft, daz ze glîcher wîse als alle crêatûre, ob tûsent welte wêrîn, ein hâres breite niht bezzer ist denne got alleine. Alsô spriche ich unt hân ez dâ vor geseit, daz diz ûzer werc, sîn lengi noch sîn wîti, sîn vili noch sîn grœzi niht alzemâle mêret die güeti des inren werkes: ez hât sîn güeti in sich selben; dar umbe enkan daz ûzer werc niemer cleine gesîn, ob daz inre grôz ist, unde daz ûzer enmac niemer grôz noch guot sîn, ob daz inre clein oder niht enist. Wer daz inre werc hât in ime alle zît beslozzen, alle grœzi, wîti unt lengi des inren werkes nimet unt schöpfet allez sîn wesen niergen denne von gote unt in gotes herzen.

Got minnet den sun unt wirt sun geboren in des himelschen vater schôze. Umbe daz ûzer werc enist ez niht alsô: sunder ez nimet sîn götlîche güeti enmiten des innigen werkes ûz getragen unt ûz gegozzen in einen niderval der gecleideten gotheit mit underscheit, mit mengi, mit teile, daz allez unt dem gelîche unt ouch gelîchnüs selben gote verre unt frömde sint. Sie haftent unt behaftent unt gestillent in dem, daz guot ist, daz crêatûre ist, blint alzemâle güeti unt liehtes in sich selben unt des einen, in dem got gebirt sînen eingebornen sun unt in im alliu diu gotes kinter sun unt geborne süne. Dâ ist ûzfluz unt ursprunc des heiligen geistes, von dem alleine, als er gotes geist ist unt ein geist got selber ist, enpfangen wirt der sun in uns unt ist ûzfluz von allen den, die gotes süne sint, nâch dem, daz sie minre oder mê lûterlîchen von gote alleine geboren sint nâch gote unt in gote überbildet und entriuwet aller mengi, der man doch noch vindet in den obrôsten engelen nâtûrlich.

Noch der ez rehte erkennen wil entriuwet der güeti, der wârheit und allem dem, daz ouch in dem gedanke unt in dem namen alleine einen wân oder schatwen keines underscheides lîdet, unt getriuwet dem einen blôz allerlei mengi unt underscheit, in dem ouch verliuret unt wirt entblœzet aller underscheit unt eigenschaft unt ist ein unt sint ein ouch vater, sun und heiliggeist. Unt daz eine daz machet uns sêlic, unt ie verrer wir dem einen sîn, ie minre wir sun oder süne sîn unt ouch der heilig geist minre volkomenlîche in uns entspringet unt von uns fliuzet. Unt dar nâch wir nêher sîn dem einen, dar nâch sîn wir wêrlîchen gotes sun unt süne unt ouch fliuzet von uns got der heilig geist. Unt daz meinet, daz unser gotes sun in der gotheit sprichet ‘wer trinket von dem wazzer, daz ich gibe, in dem entspringet ein brunne, ein ursprunc des wazzers, daz dâ springet in daz êwic leben.’ Unt sant Johannes sprichet, daz er daz sprêche von dem heiligen geiste.

Der sun in der gotheit nâch sîner eigenschaft engît niht anders denne sun wesen, denne got geboren wesen, brunne unt ursprunc unt ûzfluz des heiligen geistes der minne gotes unt vollen rehten ganzen smac des einen, des himelschen vaters. Dar umbe sprichet des himelschen vater stimme von dem himele zuo dem sune ‘dû bist mîn geminnôter sun, in dem ich geminnet unt beheglich bin, in ime ist mir ein wolgevallen.’

Sunder zwîvel, got minnet nieman mit genüegede unt lûterlîchen, der niht gotes sun ist; wan minne, der heilig geist, urspringet unt fliuzet von dem sune unt der sun minnet den vater durch sich selben unde sich selben in dem vater. Dar umbe sprichet vil wol unser herre, daz sie sêlic sint die armen in dem geiste, daz ist, die niht habent eigens menschlîches geistes unde blôz koment zuo gote. Unt sant Paulus sprichet ‘got hât ez uns geoffenbâret in sînem geiste.’

Sant Augustînus sprichet, daz der aller beste die geschrift verstât unt vernimet, der blôz alles geistes suochet unt wârheit der geschrift in ir selben, daz ist in gotes geiste. Sant Pêter sprichet, daz alle die heiligen liute habent gesprochen in dem geiste gotes. Sant Paulus sprichet ‘nieman mac bekennen unt wizzen, waz sî in dem menschen, denne der geist, der in dem menschen ist, unt nieman mac wizzen, waz in gote ist, denne der geist gotes unt got.’ Dar umbe sprichet gar wol ein geschrift einer glôse, daz nieman mac vernemen noch lêren kan sant Pauli schrift, er habe denne den geist in dem sant Paulus sprach unt schreip. Unt daz ist alliu mîn clage, daz grobe liute, die gotes geistes îtel sint unt niht hânt noch iren groben menschlîchen sin hine geleit, wellent urteilen daz sie hœrent oder lesent in der schrift, diu gesprochen unt geschrieben ist von dem unt in dem heiligen geiste, unde gedenkent niht, daz geschrieben ist: daz unmüglich ist bî den liuten, daz ist müglich bî gote unt ouch gemeinlich unt nâtûrlich. Daz unmüglich ist der undern nâtûre, daz ist gewonlich unt nâtûrlich der obren nâtûre.

Dâ von nû minnent doch noch, daz ich nû gesprochen hân, daz ein guot mensche, gotes sun in got geboren, minnet got durch sich selben in ime selben, unt vil ander wort, diu ich vor gesprochen hân, unt als ich ouch mê gesprochen hân, daz ein guot mensche von güeti unt in gote geboren tritet in alle die eigenschaft götlîcher nâtûre. Nû ist daz gotes eigenschaft nâch Salomônes worten, daz alliu dinc got würke durch sich selben, daz ist, daz er niht ûz ime selben ane siht, niht wan dur sich selben, er minnet unt würket alliu dinc dur sich selben.

Dar umbe sô der mensche minnet sich selben unt alliu sîniu werc, niht umbe lôn, umb êre oder umbe gemach, denne dur got unt gotes êre alleine, daz ist ein zeichen, daz er gotes sun ist. Noch mê: got der minnet dur sich selben unde würket alliu dinc dur sich selben, daz ist, er minnet dur minne unt er würket dur würken; wan sunder zwîvel, got hêti sînen eingebornen sun in der êwikeit nie geboren, wêri geboren nie geboren. Unt dar umbe sprechent die heiligen, daz der sun alsô êweclîch geboren ist, daz er doch âne underlâz noch wirt geborn. Ouch hêti got die welt nie geschaffen, ob geschaffen wesen nie wêri geschaffen, dar umbe got alsô die welt hât geschaffen, daz er si doch sunder underlâz schöpfet. Allez daz vergangen ist unt waz zuokünftic ist, daz ist gote frömde unde verre.

Unt dar umbe wer von got geboren ist gotes sun, der minnet got durch sich selben, daz ist, er minnet got dur minnen got unt würket alliu sîniu werc dur werc, dur got unt der wirt minnens unt würkens niemer müede, unt ouch ime ist allez ein minne daz er minnet. Und her umbe ist wâr, daz got ist diu minne, unt als ich ouch sprach dâ obnân, daz der guot mensche wil und wolte alle zît lîden dur got, niht geliten hân. Lîden hât er, daz er minnet lîden durch got unt lîdet got, unt dar umbe unt ouch dar an sô ist er gotes sun nâch gote unt in gote gebildet. Der minnet durch sich selben, daz ist, er minnet durch minne unt würket dur werc, unt dar umbe minnet got unde würket âne underlâz, unt gotes würken ist sîn nâtûre, sîn wesen, sîn leben, sîn sêlikeit. Alsô wêrlîche der gotes sun, ein guot mensche, sô vil unt er gotes sun ist, wil durch got lîden, dur got würken unt daz ist sîn wesen, sîn leben, sîn würken, sîn sêlikeit. Unt alsô sprichet unser herre ‘sêlic sint, die dâ lîdent durch die gerehtikeit.’

Für baz zuo dem dritten mâle sprich ich, daz ein guot mensche als verre er guot ist hât gotes eigenschaft, niht alleine dar an, daz er minnet unt würket allez daz er minnet unde würket dur got, den er dâ minnet unt dur den er würket, sunder er minnet unt würket ouch dur sich selben der dâ minnet; wan daz er minnet daz ist got vater ungeboren; der dâ minnet ist got sun geboren. Nû ist der vater in dem sune unt der sun in dem vater, vater unt sun sint ein in dem heiligen geiste. Von dem nim, wie daz innigôst unt daz obrôste der sêle schöpfet unde nimet gotes sun, und ouch gotes sun werden in des himelschen vater schôze unde herzen, unt daz suoche nâch dem ende diser vorgenprochenen worte von dem edelen menschen.

Ouch sol man wizzen, daz in der nâtûre îndruk unt fluz der obren nâtûre ist einem ieclîchen lustlîcher unt wunneclicher denne sîn selbes eigeniu nâtûre unde wesen. Daz wazzer fliuzet von eigener nâtûre niderwert ze tale und ouch lît sîn wesen dar ane. Doch von îndrucke unt înfluzze des mânen obnân in dem himele sô verzihet unde vergizzet ez sîner eigenen nâtûre unt fliuzet ze berge in die hœhi unt ist der ûfluz vil lîhter denne der fluz niderwert.

Unt dâ bî sol der mensche wizzen, ob ime reht wêre, daz ime wizzentlîche unt frœlîchen wêre, sînen nâtûrlîchen willen ze lâzenne unt sich sîn selbes verzîhen unt alzemâle ûz gân in allem dem, daz got den menschen lîden wil. Unt daz meinet nâch einem guoten sinne, daz unser herre sprichet ‘wer welle komen zuo mir, der sol sîn selbes ûz gân unt verzîhen unde sol sîn kriuze ûf heben’, daz ist, er sol abe legen unt abe tuon allez, daz kriuze unt leit ist; wan sicher, wer sîn selbes sich verzigen hête unt wære ganz sîn selbes ûz gegangen, dem möhte niht kriuze wesen noch leit noch lîden, mêr: ez wêri im allez ein wunne, ein fröude und ein herzenliep, unt der kême unt volgti wêrlîchen got; wan als got niht mac betrüeben noch leidic gemachen, alsô wênic möhte den menschen iht riuwec oder leidic gemachen. Unt dar umbe, daz unser herre sprichet ‘wer wil zuo mir komen, der verzihe sich sîn selbes unt hebe ûf sîn kriuze unt volge mir’, daz ist niht alleine ein gebot, als man wênet oder gemeinlîchen sprichet: ez ist ein geloube unt ein götlîchiu lêre, wie daz dem menschen allez sîn lîden, alliu sîniu werc unt sîn leben wunneclîchen unde frœlîchen wirt, unt ist ein lôn mê denne ein gebot. Wan der mensche, der sô getân ist, hât allez, daz er wil, unt enwil niht übeles, unt daz ist ouch sêlikeit, dar umbe wol unser herre sprichet ‘sêlic sint, die dâ lîdent durch die gerehtikeit.’

Unt ouch daz unser herre sprichet ‘der sun verzihe sich sîn selbes unt habe ûf sîn kriuze unt kome zuo mir’, daz meinet, daz er werde sun als ich sun bin geboren. Got ist daz selbe ein, daz ich bin, daz ich schöpfe in wesenne inne blîbende in des vaters schôze unt herzen. Ouch sprichet der sun ‘vater, ich wil, daz der mir volget, der zuo mir kumet, daz der sîe dâ ich bin.’ Nieman kumet eigenlîchen zuo dem sune als der sun ist denne der sun wirt, unt nieman ist der dâ sun ist, der in des vaters schôze unt herzen ist, ein in einem, dâ der sun ist.

‘Ich’ sprichet der vater ‘sol sie füeren in ein einœdi unt dâ sprechen zuo ir herzen.’ Herze zuo herzen, ein in einem minnet got, alle frömdi unt verri hazzet got, zuo ein locket unt ziuhet got, ein suochent alle crêatûre, ouch die niderôsten crêatûre suochent ein. Daz daz bevinden die obrôsten unt gezogen werden über nâtûre unt überbildet suochen ein, ein in sich selben, dar umbe vil lîhte sprichet der sun Jêsus Kristus in der gotheit ‘vater, dâ ich bin, dâ sol sîn der mir dienet, der mir volget, der zuo mir kumet.’

Noch ist aber ein ander trôst, daz man sol wizzen, daz aller nâtûre unmüglich ist, daz si zerbreche oder verderbe unt ouch enrüere, in dem si niht meine ein bezzerz guot in dem selben, daz si rüeret. Ir benüeget niht, daz si ein gelîch mache, si wil allez ein bezzerz. Ein wîser arzât der berüeret niemer den siechen vinger des menschen umbe daz er dem menschen niht wê tuo, ob er niht den vinger selben unde den menschen alzemâle bezzer machen unt im lieber tuon möhte. Mag er denne den menschen unt ouch den vinger gebezzeren, daz tuot er gerne, unt ist des niht, er snîdet den vinger abe, daz er den menschen bezzeri. Unt daz ist vil bezzer, den vinger verlieren alleine unt den menschen behalten, denne beidiu der vinger unde der mensche verderbe. Wêger ist ein schade denne zwêne, unt sunderbâr dâ der eine vil mêr wêre denne der ander.

Unt ouch sol man wizzen, daz der vinger unt diu hant unt ein ieclîch nâtürlîchez gelit den menschen, des ez ein gelit ist, vil lieber hât denne ez sich selben unt sich gerne und unbedâht frœlîchen gibet in die nôt unt in den schaden für den menschen. Ich spriche sicherlîchen daz in der wârheit, daz diz gelit sich selben alzemâle nihtes niht minnet denne dur daz unt in dem ez ein gelit ist. Dar umbe wêri vil billîchen unt nâtürlîchen, wêri uns reht, daz wir uns selben nihtes niht minnôtin denne dur got unt in gote; unt wêri daz alsô, sô wære uns allez daz lîhte unt ein wunne, daz got von uns unt in uns wölte; sunderlîchen sô wir wizzen unt gewis wërin, daz got ungelîche minre mac gelîden enheinen gebresten noch schaden, ob er niht ein vil grœzer gemach dar inne wisti unt meinti. Wêrlîchen, der des gote niht getrûwet, daz ist alze billîchen, daz er leit unt ungemach habe.

Noch ist ein ander trôst. Sant Paulus sprichet, daz got alle die kestiget, die er ze süne minnet unt enpfâhet. Ez behœret dar zuo, der sun sî, daz der ouch lîde. Wan gotes sun in der êwikeit in der gotheit niht lîden mohte, dar umbe sante in der himelsche vater in die zît, daz er mensche würde unt lîden möhte. Wilt dû denne gotes sun wesen unt wilt doch niht lîden, sô hâst dû gar unreht. An der wîsheit buoche stêt beschrieben, daz got prüevet unde versuochet, wer gereht sî, als man golt prüevet unde brennet in einem eitoven. Ez ist ein zeichen, daz der künic oder ein fürste einem ritter wol getriuwet, sô er in sendet an den vorstrît. Ich hân gesehen einen herren, der etwenne, sô er hâte einen ze hûsgesinde enpfangen, daz er den sante ûz bî naht unt reit in denne selber an unt vaht mit im; unt ez beschach eines, daz er bî nâch getœdet wart von einem, den er alsô versuochen wolte, unt den kneht hâte er dar nâch liep unt wert.

Man liset, daz sant Antonius in der wüesti sunderlîchen einest grœzlîchen in lîden was von den bœsen geistern, unde dô er überwunden hête sîn leit, dô erschein ime ouch unser herre ûzerlîchen unt frœlîchen. Dô sprach der heilig man ‘ach, herre, wâ wære dû ietzunt, dô ich in sô grôzer nôt was?’ Dô sprach unser herre ‘ich was alhie, als ich nû bin, aber ich wolte unt mich luste ze schouwenne, wie frum daz dû wærist.’ Silber unt golt ist wol reine, doch sô man dar ûz wil machen ein vaz, dar ûz der künic trinken sol, sô brennet man daz für baz mêr denne ein anderz. Dar umbe ist von den aposteln geschrieben, daz sie sich fröuten, daz sie wirdic wâren versmêhede unt ungemach ze lîdenne dur got.

Aber gotes sun von nâtûre wolte von gnâden mensche werden, daz er dur dich lîden möhte, unt dû wilt gotes sun werden unt niht mensche, daz dû niht mügest noch dürfest lîden dur got noch durch dich selben. Ouch wölte der mensche wizzen unt gedenken, wie sô grôze fröude in der wârheit got selbe nâch sîner wîse und alle engele unt alle, die got wizzen unt minnent, haben in gedult des menschen. Sô er dur got lîdet leit und ungemach unt schaden, wêrlîchen, er solte sich dur daz alleine billîch trœsten. Ein mensche gît doch sîn guot oder lîdet ungemach umbe daz er sînen friunt erfröuwen müge unt ime ein liebi bewîsen: noch mê sol man gedenken unt hêti ein mensche einen friunt, der dur sînen willen in lîden wære, in leit unt in ungemache, sicherlîchen ez wêri gar billîchen, daz er bî ime wære unt in trœste mit sîn selbes gegenwürtikeit unt mit trœste, den er im tuon möhte. Dâ von sprichet unser herre in dem salter von eim guoten menschen, daz er mit im ist in dem lîdenne. Bî dem worte mac man nemen siben lêre unt trœste.

Zuo dem êrsten, daz sant Augustînus sprichet, daz diu gedult in lîdenne dur got ist bezzer, hœher unt edeler denne allez daz, daz man dem menschen wider sînen willen benemen mac; daz ist allez ûzerlîchez guot. Weiz got, man vindet nieman sô rîchen, der dise welt minnet, der niht willeclîchen unt gerne wölte lîden grôzen smerzen unde leit, ouch vil lange, daz er dar nâch möhte gewaltiger herre sîn aller dirre welte.

Zuo dem andern mâle nime ich niht alleine bî dem worte, daz got sprichet, daz er ist mit dem menschen in lîdenne, sunder ich nime ez in dem worte unt spriche alsô: ist got mit mir in lîdenne, waz wil ich denne mê und anderz? ich wil doch niht anders, ich enwil niht mê denne got, ob mir reht ist. Ez sprichet sant Augustînus: der ist gar gîtic unt unwîse, den niht benüeget an got. Wie mac den menschen benüegen an gotes gâben ûzerlîchen oder innerlîchen, sô in niht benüeget an got selben? Dar umbe sprichet er anderswâ: herre, wîsest dû uns von dir, sô gip uns einen andern dich, wan wir wellen niht wan dich.

Dar umbe stêt geschrieben in der wîsheit buoche ‘mit gote der êwigen wîsheit sint mir komen zemâle mit einander allez guot.’ Daz meinet nâch einem sinne, daz niht guot ist noch mac guot gesîn waz kumet âne got, und allez, daz kumet mit gote, daz ist guot unt dâ von alleine guot, wan ez mit gote kumet. Ich wil gotes geswîgen, unt benême man allen crêatûren unt aller der welte daz wesen, daz got gît, sô beliben sie blôz niht, ungenême, unwert unt hezzelich. Unde vil anders edeles sinnes hêt daz wort inne, wie allez guot kumet mit gote, daz nû ze lange würde ze sprechennne. Ez sprichet unser herre ‘ich bin mit dem menschen in lîdenne.’ Dar umbe sprichet sant Bernhart: herre, bist dû mit uns in lîdenne, sô gip mir ze lîdenne alle zît umbe daz dû alle zît bî mir unt mit mir sîest, daz ich alle zît dich haben müge.

Zuo dem dritten mâle sprich ich, daz got mit uns ist in lîdenne, daz ist, daz er mit uns lîdet selbe. Wêrlîch, der wârheit bekennet, der weiz, daz ich wâr spriche. Got der lîdet mit dem menschen, jâ ungelîch mê nâch sîner wîse, denne der dâ lîdet, der dur in lîdet. Nû sprich ich: wil denne got selbe lîden, sô sol ich gar billîchen lîden; wan ist mir reht, sô wil ich, daz got wil. Ich bite alle tage, unt got heizet mich biten ‘herre, dîn wille werde’; unt doch sô got wil lîden, sô wil ich von lîden clagen, unt dem ist gar unreht. Ouch sprich ich sicherlîchen, daz got sô gerne mit uns unde dur uns lîdet, sô wir alleine dur got lîden, daz er lîdet sunder lîdenne. Lîden ist im sô wunneclîch, daz lîden ist im niht lîden. Unt dar umbe, wære uns reht, sô wære ouch uns lîden niht lîden, ez wære uns ein wunne unt trôst.

Aber zuo dem vierden mâle sprich ich, daz friundes mitlîden minret nâtürlîche diz lîden. Mac mich denne getrœsten eines menschen lîden, daz ez mit mir hêt, sô sol mich vil mê trœsten gotes mitlîden.

Zuo dem fünften mâle sprich ich: unt wölte ich denne lîden mit einem menschen, den ich minne unt der mich minnet, sô sol ouch ich gerne unt gar billîchen mit gote lîden, der dâ lîdet unt dur mich lîdet von minne, die er zuo mir hât.

Noch sprich ich zuo dem sehsten mâle: ist, daz got vor lîdet ê denne ich lîde, unt lîde ich dur got, gewærlîchen, sô wirt mir lîhte ein trôst unt ein fröude allez mîn lîden, wie grôz unt manicvaltic daz ist. Ez ist wâr nâtürlîche, sô der mensche tuot ein werc dur ein andern, sô ist der, dur den er daz tuot, nêher sînem herzen, unt daz er tuot, ist verrer von sînem herzen unt rüeret daz herze niemer denne durch den, dar umbe und dur daz er ez tuot. Der dâ bûwet unt houwet daz holz unde den stein, dar umbe unt dur daz er ein hûs mache für die hitze des sumers unt wider frost des winters, des herze ist zuo dem êrsten unt alzemâle ûf daz hûs unt gehouwete niemer den stein noch tæti die arbeit denne dur daz hûs. Nû sehen wir wol, sô der sieche mensche trinket den süezen wîn, sô dunket in unt sprichet, daz er bitter sî, unt ist wâr, wan der wîn verliuret alle sîne süezikeit in der bitterkeit der zungen ûzerlîche, ê denne der wîn kome inwendig, dâ diu sêle bekennet unde prüevet den smac. Alsô ist ungelîch mê unde wêrlîche, sô der mensche würket alliu sîniu werc dur got, sô ist dâ got daz mitel unt daz nêhste der sêle unt mac niht die sêle unt daz herze des menschen rüeren, daz niht verliere durch got unt dur gotes süezikeit, unt muoz von nôt verliern sîn bitterkeit unt lûter süez werden, ê denne ez des menschen herze iemer müge bewegen noch berüeren.

Die meister sprechent, daz under dem himele sî fiur vil al umbe unt umbe, unt dar umbe mac kein regen noch wint noch allerleie sturm noch ungewitter von unden dem himele sô nâhe komen, daz in ouch niht rüeren müge: ez wirt allez verbrant unde verderbet von hitze des fiurs, ê denne ez an den himel kome. Alsô sprich ich, allez daz man lîdet unt würket durch got daz wirt allez süez in gotes süezikeit, ê denne ez zuo des menschen herzen kome, der durch got alleine würket unde lîdet. Wan daz meinet daz wort, daz man sprichet dur got, wan ez kumet an daz herze niemer denne dur gotes süezikeit, wan ez ouch wirt verbrant von dem hitzigen fiure der götlîchen minne, diu des guoten menschen herze al umbe in sich beslozzen hêt. Nû mac man offenlîche bekennen, wie billichen unt in vil wîse ein guoter mensche allenthalben getrœstet wirt in lîdenne, an leit unde würkende. Ein wîse ist, ob er lîdet unde würket durch got, ein ander wîse, ob er ist in götlîcher minne. Ouch sol der mensche bekennen unde wizzen, ob er alliu sîniu werc dur got würket; wan sicherlichen, wâ der mensche leidic sunder trôst sich vindet, alsô verre was sîn werc niht dur got alleine. Sich, unt alsô verre ist er niht in götlîcher minne. Ez sprichet künic Dâvît ‘ein fiur kumet mit gote unt von gote, daz brennet al umb unt umbe allez, daz got wider ime vindet unt ime ungelîch ist.’ Daz ist leit, untrôst unt bitterkeit.

Noch ist daz sibende in dem worte: daz got mit uns ist in lîdenne unde mitelîdet mit uns, daz uns ouch kreftêclîchen sol trœsten gotes eigenschaft dâ von, daz er daz lûter ein ist sunder alle zuovallende mengi underscheides, ouch in gedenken, daz allez, daz in im ist, got selbe ist. Unt wan daz wâr ist, sô spriche ich, allez, daz der guot mensche lîdet dur got, daz lîdet er in gote unde got ist mit lîden in lîdenne mîn lîden in got, mîn lîden got. Wie mac mir denne lîden leit gesîn, sô lîden unt leit leit verliuret? Leit mîn in gote ist: got ist mîn leit. Wêrlîchen, als got wârheit ist, wâ ich vinde wârheit, dâ vinde ich mînen got die wârheit. Alsô ouch minre noch mê, sô ich vinde lûter lîden dur got unt in gote, dâ vinde ich got mîn lîden. Wer daz niht bekennet, der clage sîne blintheit, niht mich noch die götlîchen wârheit.

Minneclîche unt milteclîche sô lîdent dur got, sit daz ez sô grœzlîchen nütze ist unt sêleclîchen, als ouch unser herre sprichet ‘sêlic sint, die dâ lîdent dur die gerehtikeit.’ Wie mac der guot minnende got daz lîden, daz sîn friunde, guot liute, niht alle zît âne underlâz in lîden sint? Hêti ein mensche einen friunt, der kurze tage lîden möhte zuo grôzem nutze unt êre unt gemach verdienen unde lange besitzen, wölte er daz hindern oder wêre daz sîn wille, daz ez von ieman gehindert würde, man sprêche niht, daz er sîn friunt wêre unt daz er in ouch liep hêti. Dar umbe vil lîhte got möhte in keine wîse lîden, daz sîn friunde, guot liute, iemer sunder lîden wæren, ob sie niht lîden möhtin unt lîdende lîden. Alliu güeti des ûzerlîchen lîdennes kumet unt fliuzet von güeti des willen, als ich vor geschrieben hân.

Unt dar umbe, allez daz der guot mensche lîden wölte unt bereit ist unt begeret ze lîdenne dur got, daz lîdet er vor gotes angesihte durch got unt in gote. Künic Dâvît sprichet in dem salter ‘ich bin bereit in allem ungemache unt mîn smerze ist mir alle zît gegenwürtic in angesihte mînes herzen.’ Sant Jeronimus sprichet, daz ein reine vaz, daz wol gewürket ist unt guot ist, dar ûz unt dâ von ze machenne waz man sol unt wil, hât in sich beslozzen alleine allez, daz man dâ von gewürken mac, ouch ûzerlîchen ie nieman dâ von iht würke. Ouch hân ich dâ vor geschrieben, daz der stein niht minre swære ist, sô er nider lît ûzerlîche ûf der erden, alliu sîn swære diu ist volkomen ûf dem, daz er nider neiget unt bereit ist in sich selben nider ze vallenne. Und alsô hân ich ouch dâ obnân gesprochen, daz der guot mensche hât ietzunt getân in himelrîche unt in ertrîche allez, daz er tuon wolte, ouch gelîche dar an gote.

Nû mac man ouch bekennen unt wizzen grobheit der liute, die gemeinlîchen wunder hât, sô sie sehent guot liute smerzen lîden unt ungemach, unde vallent inen vil dike gedenke în unt ein wân, daz ez sî dur ir heimlîchen sünde, unde sprechent ouch underwîlent ‘ach, ich wânde, daz der mensche gar guot wære! wie kumet daz, daz er sô grôz leit unt ungemach lîdet, unt ich wânde, ime gebreste niut!’ Unt sicherlîchen, wære ez leit unt ungemach unt wære ez in denne leit und ungelücke, daz sie lîdent, sô enwæren sie niht guot noch âne sünde. Sint sie aber guot, sô ist in daz lîden niht leit noch ungelücke unt ungemach: ez ist in ein grôz gelücke unde sêlikeit. Got sprichet ‘sêlic sint alle, die dâ lîdent dur got die gerehtikeit.’

Dar umbe sprichet daz buoch der wîsheit, daz der gerehten sêlen sint gotes in sîner hant. Aber tumme liute dunket unt wênent, daz sie sterbent; doch sint sie in friden, in wunne unt sêlikeit. Sant Paulus sprichet, dô er schrîbet, wie vil der heiligen habent geliten manicvaltic grôze pîne, unt sprichet denne, daz diu welt des unwirdic was. Unde daz wort hât inne, der ime rehte tuon wil, drîerhant sinne. Einer ist, daz disiu welt ist unwirdic vil guoter liuten gegenwürtikeit. Ein ander sin ist bezzer unt sprichet, daz güeti ist diser welt unmære unt unwert; got ist alleine wert, dar umbe sint sie gote wert unt gotes wert. Der dritte sin ist, den ich nû meine, unt wil sprechen, daz disiu welt, daz sint die liute, die dise weltlicheit minnent, sint des unwert, daz sie leit unt ungemach lîdent durch got. Dâ von ist geschrieben, daz die heiligen apostel sich des fröuten, daz sie wirdic wâren, daz sie durch gotes namen pîne unt ungemach littin.

Nû sî der rede genuoge, wan ich in dem dritten teile des buoches sprechen wil mangerleie trôst, wie daz sich ouch trœsten sol und mac ein guoter mensche an sînem leide, wan man daz ouch vindet an den werken, niht alleine an den worten guoter unt wîser menschen.

Man vindet in der künige buoche, daz einer dem künige Dâvîde fluohte unt ime grôz versmêhte bôt. Dô seite einer Dâvîdes friunde, daz er den bœsen hunt ze tôt slahen wölte. Dô sprach der künic mit nihten, niht tuo man ime kein leit, wan vil lîhte got wil unt sol mir durch dis versmêhte mîn bestez tuon.

Unt man liset ouch an der altvater buoche, daz ein mensche clagte eime heiligen vater, daz er was in lîdenne. Dô seite der vater ‘wilt dû, sun, daz ich got bite, daz er dir daz beneme?’ Dô sprach der ander ‘nein, vater, wan ez ist mir nütze, daz bekenne ich wol, sunder bite got, daz er mir sîne genâde verlîhe, daz ich ez wîslîchen lîde unt gedulteclîchen.’

Man frâgte einen siechen menschen, war umbe er got niht bêti umbe daz er in gesunt machôti? Dô seite der mensche, daz wölte er ungerne tuon, durch drîe sachen. Diu ein was, wan er wolte daz wizzen unt gewis sîn, daz der minneclîche got niemer vermöhte daz gelîden, daz er siech wære, denne dur sîn aller beste. Ein ander sache was, wan ist der mensche guot, sô wil er allez daz got wil unt niht, daz got welle daz der mensche wil, wan dem wære gar unreht. Unt dar umbe sô wil er, daz ich siech sî, wan wölte er sîn niht, sô enwære ez ouch niht, sô sol ich ouch niht wünschen gesunt sîn. Sunder zwîvel, möhte daz gesîn, daz mich got gesunt machôti sunder sînen willen, mir wære unwert und unmære, daz er mich gesunt macheti. Lîden wellen kumet von minne, niht wellen kumet von unminne. Vil lieber, bezzer unt nützer ist mir, daz mich got minne unt ich ouch siech sî, denne ob ich gesunt an dem lîbe wære unt mich got niht minnôti. Daz got minnet daz ist iht, waz got niht minnet daz ist niht.

Ez sprichet in dem buoche der wîsheit ‘ouch hât daz diu wârheit inne, daz allez daz got wil, in dem selben unt von dem selben daz ez got wil, sô ist ez guot.’ Wêrlîchen, menschlîchen ze sprechennne, mir wære lieber, daz mich ein rîcher unt gewaltiger mensche, ein künic, minnôti unt mich doch ein wîle lieze âne gâbe, denne ob er mir alzehant hieze etwaz geben unde mich niht minnôti; sô er von minne mir nû zemâle niht gebe unt mir aber dar umb nû niht gebe, daz er mich dar nâch grœzlîcher unde rîcher begâben wölte. Noch setze ich, daz der mensche, der mich dâ minnet unt mir nû niht engît, sich niht bedenket mir noch ze gebenne, unt lîhte bedenket er sich her nâch baz unde gît mir; ich sol gedulteclîchen beiten, sunderlîchen als alle sîne gâben von genâden sint unverdienet. Ouch sicherlichen, wes minne ich niht enhabe unt mîn wille sînem willen wider ist, alleine daz ich sîne gâbe hêti, sô ist daz gar billîchen, daz mir der niht engebe unde mich ouch hazze unt lâze mich in unsêlden.

Diu dritte sache, war umbe mir unwert und unmære wære, daz ich got welle biten umbe daz er mich gesunt mache, wan ich enwil noch ensol den rîchen minneclîchen milten got umbe sô kleine biten. Wære, daz ich zuo dem bâpste kême hundert oder zwô hundert mîle, unt sô ich denne kême für in unt sprêche ‘ô herre, heiliger vater, ich bin komen wol zwei hundert mîle swæres weges mit grôzer koste unt bite iuch, dar umb ich ouch her zuo iu komen bin, daz ir mir gebent eine bônen’, wêrlîchen, er selber unt ouch wer daz vernême, sprêchi ouch von reht, daz ich ein grôzer tôre wære. Nû ist daz ein gewis wârheit, daz ich spriche, daz allez guot, ouch alle crêatûre, gegen gote ist minre denne ein bône. Dar umbe versmâhti mir billîchen, ob ich ein wîser unde guoter mensche wære, daz ich wölte biten umbe daz ich gesunt würde.

Bî diser rede spriche ich ouch, daz ist eines kranken herzen zeichen, sô ein mensche frô oder leidic wirt umbe zerganclichiu dinc diser welte. Man sollte sich des sêre schamen von herzen vor gote unde sînem engelen unt vor den liuten, daz man des iemer gewar würde. Man schamet sich sô vaste eines gebrestes an dem antlütze, daz die liute sehent ûzerlîchen. Waz wil ich langer reden? diu buoch der alten ê unde der niuwen und ouch der heiligen unt ouch der heidenen sint des vol, wie frume liute dur got unt ouch dur nâtürliche tugende ir leben hânt gegeben unt ir selbes willeclîchen verzigen.

Ein heiden Socrates sprichet, daz tugende machent unmüglichiu dinc müglich unt ouch lîht unt süeze. Und ouch enwil ich des niht vergezzen, daz diu sêlic frouwe, von der sprichet daz buoch Machabeorum, diu ûf einen tac vor iren ougen sach wunderlîchiu dinc und ouch unmenschlîchiu ze hœren von grôzer pîne, die man iren siben sünen an tet, unde daz frœlîchen an sach unt enthielt sie unt mante sie sunderlîchen alle dar zuo, daz sie niht erschrêken unde willeclîchen sêle unt lîp ûf gêben dur gotes gerehtikeit.

Noch wil ich mê sprechen zwei wort, unde sî denne genuoc. Einez ist daz. Wêrlîchen, ein guot götlîcher mensche solte sich gar übele unt ouch grœzlîchen schamen, daz in iemer leit bewegeti, sô wir daz sehen, daz der koufman dur gewin eins kleinen geltes unt ouch ûf ein ungewis sô verre landes, sô pînlîche wege, berc unt tal, wiltnüsse unt mer, rouber, morder lîbes unt guotes dicke vert unde lîdet grôzen gebresten an der spîse unt trankes, slâfes unt anders gemaches, unde doch alles des gerne vergizzet dur sô kleinen unt ungewissen nutz. Ein ritter in einem strîte der wâget guot, lîp unt sêle dur zerganclîche unt ein kurze êre, unt uns dunket sô grôz, daz wir ein kleine lîden dur got, dur die êwigen sêlikeit.

Daz ander wort, daz ich meine, daz maniger grop mensche sol sprechen, daz vil wort, diu ich an disem buoche unt ouch anderswâ hân beschrieben, niht wâr sîen, den antwürte ich alsô, daz sant Augustînus sprichet in dem êrsten buoche sîner bîhte. Er sprichet, daz got allez, daz noch künftic ist ouch über tûsent unt tûsent jâr (ob diu welt sô lange sol weren), hât ietze gemachet und allez, daz vergangen ist mangez tûsent jâr, sol er noch hiute machen. Waz mac ich, ob ieman daz niht verstât? Unt sprichet aber anderswâ, daz sich der mensche alze blôzlîchen minnet, der dâ ander liute blenden wil dar umbe, daz sîn blintheit verborgen wese. Mir benüeget, daz in mir unt in gote wâr sî daz ich spriche unt schrîbe. Der einen stapschaft siht gestôzenen in ein wazzer, den dunket der stap krum sîn, alleine er gar reht sîe, unt daz kumet dâ von, daz daz wazzer grœber ist denne der luft sî; doch ist der stap in sich selben reht unt niht krumb unt ouch in des ougen, der in siht in lûterkeit des luftes alleine.

Sant Augustînus sprichet: wer ân allerlei gedenke allerlei lîphaftikeit unt bilden inne bekennet, daz kein ûzer sehen in getragen hât, der weiz, daz ez wâr ist. Der aber des niht enweiz, der lachet unt spottet mîn unt ich erbarme mich über in. Aber soliche liute wellent schouwen unde bevinden êwigiu dinc unt götlîchiu werc unt in dem liehte stân der êwikeit unt ir herze fliuget noch in gestern unt in hiute, in zît unt in stat.

Senecâ ein heidenscher meister sprichet: von grôzen unt von hôhen dingen sol man mit grôzen unt mit hôhen sinnen sprechen unt mit erhabener sêlen. Ouch sol man sprechen, daz man soliche lêre niht sol sprechen noch schrîben ungelêrten. Dar zuo spriche ich: sol man niht lêren ungelêrte liute, sô wirt niemer nieman gelêrt, sô mac nieman lêren noch leben noch sterben; wan dar umbe lêret man die ungelêrten, daz sie werden von ungelêrten gelêrte. Wære niht niuwes, sô würde niht altes. Unser herre sprichet ‘die gesunt sint die bedürfent der arzenîe niht.’ Dar umbe ist der arzât, daz er die siechen gesunt mache. Ist aber denne ieman, der diz wort unreht nimt, waz mac des der mensche, der diz wort, daz reht ist, reht sprichet? Sant Johannes sprichet daz heilige êwangelium allen geloubigen unt ouch ungeloubigen, umbe daz sie geloubic werden, unt doch beginnet er daz êwangelium von dem hœhsten, daz kein mensche von gote hie gesprochen mac, unt ouch sint sîniu wort und ouch unsers herren wort dicke unreht vernomen. Der minneclîche milte got, der diu wârheit selber ist, der gebe mir unt allen den, die diz buoch süllent lesen, daz wir wârheit in uns gewar werden.