Tractate — Chapter 6

Nû soltû prüeven, liebe tohter, ob dû diu zehen gebot gehalten habist alle dîne tage. Wizzest, hêtistû daz Kristus sprach ‘ir sult minnen iwern got von allem iwerm herzen, von iwer sêle und von allen iwern kreften’, hie prüeve wir, daz dû daz dike gebrochen hâst. Dô dû diz gebot brêche, dô brêche dû sie alle. Hie muostû dînem bihter sagen, wie dicke dû sie gebrochen hâst von allen dînen kintlichen tagen. Solte wir nû sagen von allen den zehen geboten, als dû sie dînem bihter sagen solt, diu rede würde uns ze lanc. Ir müezet sie baz prüeven in iu selber denne wir sie iu bediuten kunnen.

Nû solt dû prüeven die siben gâbe des heiligen geistes, wie dicke dû den widerstanden hâst, unde diu siben werc der barmherzekeit hâst ungeüebet gelâzen, daz dir got smæhelîche verwîsen muoz an dem jüngesten tage. Nû vâch an ein niuwe leben, liebe tohter, und bezzer dich an allem dînem lebenne, daz got durch nôt alles dînes gebresten vergeben müeze. Diz ist der êrste rât des êrbêren bihters unde der êrste wec. Sô mahtû sprechen ‘herre, ist daz der nêheste wec?’ Sô sprichet er ‘nein, ez muoz durch nôt sîn allez daz ich dich geheizen hân.’ Sô sprichet si ‘herre, wîse mich denne ûf den aller nêhesten wec.’ Er sprichet ‘beite biz daz dû diz mit lebenne besitzest, daz ich dir hie gerâten hân, unde beite, biz dû dînen gebresten allen abe geleigest, und kume dike wider zuo mir.’ Diu tohter tuot diz und ist irm êrbêren bihter gehôrsam. Si kumt dike wider zuo im unde sprichet ‘herre, ich wil tuon allez daz ir mich heizent biz an mînen tôt, ûf daz ir mir râtent in daz leben, dar inne ich küenlîche sterben müge.’ Er sprach ‘hâstu abe geleit allen dînen gebresten?’ Si sprach ‘jâ, als verre als ich immer mohte in dirre zît, unde wil daz tuon biz an mînen tôt.’ ‘Sô wil ich dich nû wîsen einen wec und einen niuwen rât geben. Halt einen wârhaftigen munt, einen reinen lîchamen und eine minnende sêle. Disen wec unde disen rât den soltû verstân. Ein wârhaftig munt daz ist, daz der mensche niht enrede mit dem munde denne er meinet mit dem herzen. Alsus soltû, tohter, reden daz wârhaftic ist. Got ist diu wârheit, des soltû reden allez von gote; als dû nimmer beten maht unde nâch gote nimmer maht gedenken, sô soltû reden von gote. Alsus soltû alle dîne wîle nemen von gote. Einen reinen lîchamen den soltû alsô verstân, daz dû alsô durchbrochen solt sîn mit gotlîcher vorhte, daz dû niht in dir lâzest wonen daz got niht enist. Eine minnende sêle soltû alsô verstân, daz si minne daz ir glîch ist, daz ist got. Mit dem soltû dich alsô vereinen, daz ez dich selbe unbillich dunke, daz dîn herze niht brichet von überflüzziger minne. Dô sprach diu tohter ‘wie ist mir diz noch sô vremde!’ Si sprach ‘herre, sol ez mir immer werden bekant?’ Er sprach ‘jâ, tuo daz ich dich heize: leg abe allez daz dir die sêle vinster machet, daz dir liuhten müge daz lieht der wârheit. Sô kan diu sêle den wec wol wider ûf, dannân si gevlozzen ist.’

Bî dem dritten brôte sulle wir verstân die barmherzekeit gotes. Eyâ, liebe tohter, prüeve die übermezige barmherzekeit gotes, die dir got gewiset hât. Er gap dir dînen vrîen willen, dô viele dû mit dînem vrîen willen in dînen êwigen tôt, dô lôste er dich mit im selber unde hât dich geweschen in sînem bluote unde hât dich erlôst von allen dînen erbegebresten. Nû prüeve mê die barmherzekeit gotes, daz er dir noch wil vergeben allen dînen gebresten, alse dike als dû gnâde suochest in der zît. Wizzist, solle wir sagen von der barmherzekeit gotes, des gebreste uns an der zît, unde solte wir leben biz an den jüngesten tac. Manige liute sprechent von der fürsihtikeit gotes. Wizzet, got hât uns für gesehen zuo sîner êwiger sêlikeit, daz hêt er uns dâ bî bezeichnet, daz er uns unsern vrîen willen hât gegeben, daz wir mügen tuon daz beste unde lâzen daz ergeste.

Hie sulle wir prüeven, hân wir rehten riuwen umbe alle unser gebresten. Welt ir wizzen, wie rehtiu riuwe geschaffen ist? Diu sol sîn alsô grôz in dir, daz dû ê woldest tûsent tôde, ê dû immer gebresten woldist üeben. Manige liute sprechent ‘ich hân rehten riuwen umbe mînen gebresten.’ Sie blîbent in dem gebrechen. Die sprechent unwâr unde mêrent iren gebrechen. Dû guoter mensche, der dâ genieẓen wil der barmherzikeit gotes unde getoufet wilt werden in dem heiligen geiste, dû solt haben drîvaltige riuwe umbe dînen gebresten, daz dû ie wider dînen herren unde wider dînen got getæte mit worten oder mit werken. Diu ander riuwe soltû hân dar umbe, daz dû ie getæte wider dînen ebenkristen, sît daz dû wilt genieẓen der barmherzikeit gotes unde dû wilt, daz er dir dînen gebresten vergebe unde dich toufe von sînem heiligen geiste in gnâden, sô soltû dich billîche erbarmen über alle menschen, die nâch Kristô gebildet sint, sie haben sich verschuldet gegen dir oder niht, ez muoz sîn durch nôt, ob dû immer gnâde wilt vinden. Der dritte riuwe ist, daz dû dich von herzen erbarmest über dich selber unde besich die wünneclîche zît, die dir got gegeben hât, daz dû erkennen maht dîne êwige sêlikeit, und alle crêatûre hât geschaffen, daz sie dich wîsen zuo dînem besten guote. Diz sprichet sant Augustînus: alle crêatûren wîsent mich zuo mînem guote; her umbe muoz ich haben herzenriuwe: sol ich, herre, immer zuo dir komen, daz muoz an dîner barmherzekeit ligen. Diu zît gêt enwec, die dû mir gegeben hâst, unde dû blîbest ungenimet und unbekant von mir: dâ von sô hab ich riuwe. Doch fürht ich, herre, daz ich nie rehte riuwe gewünne, als ich solte.

Bî dem vierden brôte sulle wir verstân die gerehtikeit gotes. Als erbarmherzic als er ist, alse gereht ist er ouch in ime selben. Wizzist, solt ich iu sagen von der gerehtikeit gotes, ez würde den liuten ze swære: der wære vil wênic die immer gnâde gesuohten. Dar umbe sô bewîse wir den liuten die barmherzekeit gotes unde werfen sie in daz vegefiur, daz sie an dem jüngesten tage gnâde vinden, ob ez niht ê sîn mac. Wizzet, diu gerehtikeit gotes ist alsô strenge in ir selber, daz allen menschen grûwelen mac. Daz kante Kristus wol, dô er sprach zuo sînen jungeren ‘als ir getuot allez daz ir vermüget, sô sult ir nochdanne sprechen, daz ir unnütze knehte sît.’ Daz ist uns bewêret mit sant Johanne, der nie gebresten üebete, der in von gote gescheiden möhte, der sich den tieren gelîchete in dem walde. Sicher er bekante die gotes wârheit. Ich spriche mê, daz diu gerehtikeit gotes ist alsô strenge, daz ein mensche hête volbrâht alliu diu tugentlîchen werc, diu alle heiligen ie volbrâhten, die dâ sint in dem êwigen lebenne, unde wirt er vunden an eime houbethaften gebresten (der ein heizet hôhvart geistlich oder lîplich, der ander heizet trâkheit an gotes dienste, der dritte haz, der vierde zorn, der fünfte gîtikeit, der sehste überezzen und übertrinken, der sibende unkiusche: diz sint houbetsünde), wizzet, wer an der einem wirt funden, der muoz êwiclîche verlorn sîn. Ich spriche, daz alle die heiligen, die in himel sint, für den menschen bêten, ez möhte im niht gehelfen. Ich spriche mê: daz Kristus für sînen vater viele unde Mariâ sîn muoter, ez hülfe niht, der sêle mac nimmer rât werden. Dâ von spriche ich mê, daz ich lieber hête einen menschen, der tûsent houbetsünde hête getân und er die bekante, denne ich einen menschen hête, der nie houbetsünde hête getân wan eine, unde der niht bekennen wil: der wirt verlorn. Ich spriche mê: hête der mensche alle tugende geüebet, die diu heilige kristenheit ie geüebet, ez möhte im niht gehelfen, er müeste verdüemet sîn mit den verlornen, unde der wirt behalten, der die tûsent houbetsünde hêt getân unde die bekennet unde die abe leit mit rehtem riuwen unde mit ganzem willen, sîn nimmer mê ze tuonde unde mit stæter minne sînen gebresten ze bezzerende biz an sînen tôt. Wizzet, der stêt mit den sæligen. Eyâ, liebe tohter, nû merke, wer die sint, die alle ir tage âne houbetsünde sint gewesen unde die dâ mügent sprechen mit dem jüngelinge ‘ich hân dîu zehen gebot behalten alle mîne tage.’ Wolde got, daz ich einen menschen wiste, der dâ möhte sprechen ‘ich hân daz êrste gebot behalten alle mîne tage’, daz Kristus sprach: minne dînen got von aller dîner sêle krefte, unde der sich ouch gehüetet habe alle sîne tage vor der sünde, diu dâ heizet geistlich hôhvart.

Bî dem fünften brôte sulle wir verstân den rehten gelouben. Daz sulle wir alsô verstân, daz wir ganzen glouben sullen hân in got. Wer dâ gloubet in got, der muoz gote getrûwen unde den muoz got bekennen, sô muoz er got minnen. Mensche, besich, daz dû rehten glouben habest, sô muost dû des glouben, daz got alliu dinc vermac. Die meister sprechent: wer rehtes glouben habe als vil als ein senfkorn ist, der tuot einen berc zuo dem andern walgen. Her umbe sulle wir uns dar zuo vlîzen, daz wir uns entledigen von allem dem, daz zergenclich ist unde daz uns daz lieht verdunstert, dar inne wir sehen solten den rehten glouben, daz ist got. Wizzet, wer dâ mac sprechen: ich bin ein reht kristenmensche, der sol stân in Kristô alsô daz Kristus sîn exemplar sî, daz er sich rihte nâch sînen worten unde nâch sînen werken. Wizzent, waz Kristus ie getet, daz tet er dar umbe, daz er unser bildenære wære zuo der êwigen wârheit, wan er ist diu wârheit selber; der kan dich wîsen in den rehten glouben. Ich spriche daz: wer zuo dem vater komen wil, der muoz in Kristô zuo im komen; wer ouch den vater bekennen wil, der muoz in in Kristô bekennen. Daz hât uns Kristus bewêret, dô Philippus sprach ‘zeige uns den vater’, dô sprach Kristus ‘wer mich siht, der siht mînen vater und swâ mîn vater ist, dâ bin ich.’ Her umbe sulle wir prüeven, daz wir rehte dem geminneten sullen nâch gân, daz muoz sîn, ob wir immer der behalten wellen werden. Manige liute sprechent ‘wie möhte ich tuon als Kristus tet?’ Daz hât uns Kristus gelêret. Er sprach ‘nement iwer kriuze unde volgent mir nâch.’ Daz sult ir alsô verstân, daz er iuch niht heizet lîden den tôt, als er an dem kriuze starp. Er sprach ‘volgent mir!’ daz ist, daz wir im volgen sullen mit volkomenem lebenne. Wizzet, waz uns gebristet in der zît sînes lebennes, daz wir im niht volgen ûf daz aller hœhste, sînen worten und sînen werken, daz muoz uns êwiclîche bresten. Her umbe sprach er ‘in mînes vaters rîche ist maniger hande wonunge.’ Wizzit, ez sol manic mensche zuome himelrîche komen, daz götlîches antlützes niht mê gebrûchet denne einer der liehten sunnen in einem vinstern walde. Eyâ, lieber vriunt, prüeve daz wort, daz Kristus sprach zuo sîner muomen, dô si in bat für ir süne. Er sprach ‘wer trinken wil ûzer dem kelche, der mir künftic ist, der sol mîn erbegnôze sîn in mîns vater rîche.’ Alsus sult ir prüeven: wie wir uns hie mezzen, alsô wil uns der himelische vater wider mezzen in sînem êwigen rîche. Her ûf sprichet sant Augustînus: als verre als wir hie erkennen unde minnen, daz sulle wir êwiclîche niezen. Die meister sprechent von der helle. Ich sage iu wol, waz diu helle ist. Ez ist anders niht denne ein wesen. Waz hie iuwer wesen ist, daz sol êweclîch iuwer wesen sîn. Diz ist diu helle. Daz sult ir alsô verstân. Als der diep, der sînen lîp verworht hât unde gevangen ist, prüeve, wie dem ze muote sî! daz er ander liute in vreuden siht, als vil ist im deste wirs. Alsus geschiht den, die in der helle sint unde got sehent und alle sîne vriunde: daz wellen die meister, daz ez ir aller meistiu pîne sî. — Diz vernimet diu guote tohter, von der wir dâ vor geret hân, unde gêt zuo ir êrbêren bihter. Si sprichet ‘herre, wîsent mich den nêhsten wec zuo mîner êwigen sêlikeit.’ Er sprach ‘tohter, lâ dir genüegen.’ Si sprach ‘mir genüeget nimmer alsô lange als ich unbesichert bin mîner êwigen sêlikeit.’ Er sprach ‘tohter, dû bist des êwigen lebenes sicher.’ Si sprach ‘herre, hâstu mich gewîset zuo mînem nêhsten wege?’ Er sprach ‘dâ zuo wîsent dich alle crêatûre. Sie sprechent alle: ganc für baz, wir sîn got niht. Tohter, hie mite hâstû lêre genuoc.’ Si sprach ‘herre, ez benüeget mir niht.’ ‘Wiltû mir dan niht glouben, sô gloube den worten unsers herren Jêsû Kristî, daz er sprach: nemt iwer kriuze unde volget mir. Er sprach niht: nement mîn kriuze unde volget mir. Daz soltû verstân: als dû getruost daz dû vermast, sô soltû dich genüegen lâzen, unde wizzist, dâ mite genüeget got.’ Si sprach ‘hête ich getân daz ich vermac?’ Er sprach ‘waz wiltû tuon?’ Si sprach ‘ich wil lâzen êre unde guot unde friunde unde mâge und allen ûzern trôst, der mir von crêatûren geschehen mac.’ Dô sprach der bihter ‘wilt dû mich ouch lâzen?’ Si sprach ‘jâ, herre. Sol ich alliu dinc lâzen, sô muoz ich iuch ouch lâzen.’ Er sprach ‘niht ennim dich des an, ez ist vrouwen niht gegeben.’ Si sprach ‘ich weiz wol, kein vrouwe mac zuo dem himel komen, si enwerde ê ein man. Daz sult ir alsô verstân: sie müezen menlîchiu werc wirken unde müezen menlîchiu herzen hân mit voller kraft, daz sie in selber mügen widerstân und allen gebresthaften dingen.’ ‘Nu dünkestû dich harte stark: mich hât wunder, wie dû lîden mügest mê denne dû geliten hâst.’ Si sprach ‘herre, ich mac allez daz lîden, daz Kristus durch mich geliten hât.’ Er sprach ‘daz sint rede.’ Si sprach ‘ich sage wâr.’ Er sprach ‘wie wiltû mich des bescheiden?’ Si sprach ‘harte wol. Ich hân gehoeret sagen, daz diu gotheit der menscheit nie ze helfe enkême an allem dem lîdenne, daz Kristus ie geleit.’ Er sprach ‘daz ist wâr: diu gotheit ist unlîdlich, wan si geleit nie niht unde sol nimmer niht gelîden, wan si mac nieman berüeren.’ Si sprach ‘allez daz Kristus geliten hât, daz mac ich wol lîden.’ Er sprach ‘des beriht mich.’ Si sprach ‘ich tuon. Ich weiz wol, daz Kristus der edelste mensche ist, der ie geborn wart: er was von zwein und sibenzic fürsten geslehte. Ich spriche mê: er was daz edelste bluot, daz Marien herze ie geleisten mohte. Wizzet, daz ich prüeve, daz ich ez billiche lîden sol allez, daz er dur mich geliten hât. Man prüevet die liute nâch adele: sô sie ie edeler sint, sô sie ie zarter sint. Hie prüeve ich, daz ich baz lîden mac dan Kristus. Solt ich sagen von allem dem, daz ich bekenne, von sînem edelen anevange sîns lebens in der zît in eime rehten willigen armüete, sô wizzet, daz mir mîn herze müeste brechen.’ Si sprach ‘ich hân mich harte wol berâten: wizzet, den tac den ich lebe sô wil ich volgen deme râte des heiligen geistes.’ Er sprach ‘wie râtet der heilige geist?’ Si sprach ‘er râtet mir, daz ich mich lâze an die gewaltige hant gotes unde daz ich lâze allen enthalt der crêatûren.’ Er sprach ‘dû wilt übele.’ Si sprach ‘war an?’ Er sprach ‘daz dû niht râtes wilt volgen: wizzist, daz gehôrsam ein tugende ist.’ Si sprach ‘ich wil gehôrsam sîn biz an mînen tôt.’ Er sprach ‘wem?’ Si sprach ‘Kristô dem himelischen vater, dem Johannes gehôrsam was in der wüeste unde Mariâ Magdalênâ, Mariâ von Egypten unde Mariâ Salomê.’ Er sprach ‘hie dunket mich, daz dû mîns râtes nimmê wilt volgen.’ Si sprach ‘daz ist wâr: mir ist von herzen leit, daz ich menschen râte ie sô lange gevolgete unde dem râte des heiligen geistes widerstanden hân.’ Er sprach ‘tohter, nû hœre mich. Waz dunket dich, daz ich dir geschat hân?’ Si sprach ‘ir hânt mich gehindert mîner êwigen sêlikeit.’ Er sprach ‘war an?’ Si sprach ‘daz ir mich niht enwîsetet zehant ûf mînen nêhsten wec.’ Er sprach ‘daz ist dem heiligen geiste bevolhen: ich solte dir nimmê râten wan als ich dir gerâten hân.’ Si sprach ‘hêtent ir mich niht dar abe genomen und ander geistlîchiu liute, ich hête mîne zît tugentlîcher an geleit dan ich nû habe getân. Ich wânde, daz ez allez daz êwangelium wære, daz die geistlîchen redden.’ Er sprach ‘daz êwangelium ist gemachet in dem heiligen geiste von sînem volkomen lebenne unsers herren Jêsû Kristî unde nâch sînen edelen sprüchen. Den êwangelium lesen unde predigen wir offenbêrlichen: wer im volgen wil, der mac im volgen ûf daz allerhœhste.’ Si sprach ‘daz erbarme got, daz ich des niht getân hân alle mîne tage.’ Er sprach ‘daz dû mir hie die schulde gist, daz ist mir leit, daz ich dich gehindert habe.’ Si sprach ‘jâ, ich gibe iu die schulde unde allen crêatûren.’ Er sprach ‘dâ hâstû unreht: dich mac nieman gehindern denne dû dich selber. Wizzist, wer von gote wirt berüeret, dem mac nieman wider stân, daz sich sîn alle die heiligen annemen, die in himelrîche sint, und alle die predier unde barfüezen, die ûf ertrîche sint, die möhten dem niht widerstân, der von wârheit wirt berüeret. Daz eine wort tribet in ûz daz Kristus sprach wider den jüngelinc, dô er begerte des volkomenen lebens. Kristus sprach: halt diu zehen gebot. Der jüngelinc sprach: diu hân ich gehalten alle mîne tage. Kristus sprach: wiltû volkomen werden, sô verkoufe allez daz dû hâst unde gib ez armen liuten unde volge mir. Alsus hât uns Kristus bewêret die wârheit mit Pêtrô unde mit andern sînen jungern, die er an sich rief mit im selbe in willige armuot. Wizzist, tohter, daz ez wâr muoz sîn, daz Kristus getân hât mit worten unde mit werken, wan er ist diu wârheit selber, unde wizzest, wer zuo dem vater komen wil, der muoz Kristô volgen unde sînen fuozstapfen ûf daz aller hœhste.’ Si sprach ‘eyâ, lieber vater, war umbe widerrâtent ir ez dan alsô sêre?’ Er sprach ‘wand ez ist ein alsô durneh tic leben, daz er wol bedarf, daz im got ze helfe kome, der dâ inne gestân sol.’ Si sprach ‘ich weiz wol, daz got abe noch zuo engât. Ich weiz wol, wer sich an in lâzet, er entheltet in wol an allen sînen nœten.’ Er sprach ‘wie wiltû denne tuon als dû versmêhet wirst von allen crêatûren?’ Si sprach ‘des beger ich, daz ich die minste crêatûre werde in unserm herren Jêsû Kristô, die er under allen crêatûren hât, daz ich müge sprechen mit Paulô: ich vröuwe mich, alle crêatûre sint mir ein kriuze und ich bin allen crêatûren ein kriuze.’ Er sprach ‘tohter, her zuo bistû ze junc.’ Si sprach ‘Mariâ Magdalênâ was junger dan ich, dô si in die wüeste fuor und in ellende durch rouber unde morder.’ Er sprach ‘got was mit ir.’ Si sprach ‘ich weiz wol, daz got mit mir ist.’ Er sprach ‘er was mit ir gegenwürticlîch.’ Si sprach ‘er ist mit mir geistlich sunder underlâz.’ Er sprach ‘Mariâ hâte einen grôzen enthalt an sîner gegenwürtikeit, des enhâstu niht, liebe tohter.’ Si sprach ‘sît ich alles trôstes enbern sol, sô wil ich der gegenwürtikeit ûzwendic enbern: ich beger, daz er sich in mîner sêle gebere sunder underlâz.’ Er sprach ‘versinne dich baz, sît daz dû dich des annemen wilt.’ Si sprach ‘swîget, erlâzet mich der rede! daz ir sô vil der rede zuo mir geret habt, dâ von habt ir mich gehindert.’ Er sprach ‘wizzest, wêristû von wârheit berüeret, dû hêtist durch mich gelâzen noch getân. Dû maht wol wizzen, daz ich ein crêatûre bin. Die wîle dan crêatûre gegeben unde genomen mac, sô wizzist, daz dû niht der wârheit lebest. Diu wârheit hât alsô vil tugende an ir, daz si den menschen wol rihtet ûf daz aller hœhste sunder aller crêatûre helfe. Dâ von darft dû mich niht schuldig geben, wan wizzest, wer von wârheit ist berüeret, der heilige geist ist sîn meister, daz er in wîset, wer im volgen wil in die hœhste schuole, diu ie gemachet wart. Dâ lernet der mensche in eime ougenblike mê, denne alle meister geworten mügen.’ Si sprach ‘ir sprechent wâr.’

Daz ander wort, daz zuo dem glouben gehœret, daz ist, daz wir gote getrûwen sullen. Wer daz sprechen mac, daz er gote getrûwe, der sol niht alsô vil behalten über naht als ein pfenwert guotes. Ich spriche mê: er sol nihtes niht behalten; mêr: wer ein pfenwert irdisches guotes beheltet vor sînem ebenkristen, den er's nôtdürftig weiz, der ist ein rouber vor gote. Daz wil ich iu bewêren mit Kristô, der alsô vil von minnen durch den menschen geliten hât, unde daz dû den menschen, der alsô nâch Kristô gebildet ist, lâst gebresten haben, durch des willen got alliu dinc geschaffen hât, unde daz dû im sîne nâtûre krenkest unde daz dû im vor beheltst sînes vater guot, daz er ze gote solte tragen. Ich spriche mê: wer fürspart ein pfenwert für sich selber zuo der zît, als ers nôtdürftig wære, und denket: ich bedarf sîn morgen, er ist ein morder vor gote. Daz wil ich iu bewêren. Getrûwete er gote, sô lieze er sich ze gote: gæbe im got morgen den tac, er gæbe im ouch, des er in nôtdürftig weste oder bekante. Dâ von sprich ich, daz wênec liute sîn, die rehten glouben haben und gote vollekomenlîche getrûwen. Wizzet, wer irdesch guot beheltet vor sînen kreften, dâ mite er got kennen unde minnen sol, der mac wol ein morder heizen. Daz bewêre ich iu mit Kristô, dô er sprach ‘ist, daz ich erhaben werde, alliu dinc wil ich nâch mir ziehen.’ Alsus sol der guote mensche alliu dinc ûf tragen ze gote in irn êrsten ursprinc. Diz bewêren uns die meister, daz alle crêatûren sint gemachet durch des menschen willen. Diz prüevent an allen crêatûren, daz ein crêatûre die andern nützet: daz rint daz gras, der visch daz wazzer, der vogel den luft, daz tier den walt. Alsus koment alle crêatûren dem guoten menschen ze nutze, ein crêatûre in der andern treit ein guoter mensche ze gote. Dâ noch ein mensche wære, der gote getrûwete, got tæte im baz, denne er selber immer georden kunde.

Nû sulle wir verstân daz dritte stüke, daz zuo dem glouben gehœret, daz ist, daz wir got bekennen. Ich spriche daz, daz nieman got bekennen mac, er bekenne sich selber mit dem êrsten. Nû merket, wie ir iuch selber bekennen sult. Der mensche, der sich selber bekennen wil, der sol alle wege ein însehen haben in sich selber unde sol in sich ziehen sîne ûzern krefte unde sol sie zemen alsô lange mit starker üebunge, daz sie gehôrsam werden den obersten kreften der sêle, unde sol die üebunge hân alsô lange, biz er die stat besitzet einer lûtern samwizzikeit, daz in dich niht bilden müge, daz minner sî dan got. Dâ lernest dû dich bekennen unde got bekennen.

Daz vierde, daz zuo dem glouben gehœret, daz ist minne. Der dâ mac sprechen ‘herre, ich minne dich’, der sol allez daz lîden umbe kein warumbe, sunder war umbe daz Kristus geliten hât unde sol ez lîden vröliche sunder lîden. Sprêche got zuo dem menschen munt wider munt ‘dû solt verlorn sîn êwiclîch mit den verlornen’, der mensche solte got deste mê minnen unde solte sprechen ‘herre, sît dû wilt, daz ich verlorn sî, sô wil ich êwiclîche verlorn sîn.’ Alsus sol der mensche mit sînem willen vereinet hân, waz got wil, daz er daz welle in himel und in ertrîche. Des selben sol er sich unwirdic dunken. Der mensche muoz sprechen ‘ich minne dich.’ Nû hân wir den glouben bewêret. Wer dise stücke hât volbrâht mit lebenne, von den wir dâ vor geret hân biz her, der mac sprechen ‘ich gloube in got.’

Bî den zwein gebrâtenen vischen sulle wir verstân (der eine visch ist wille, der ander volbringunge), daz dû dich alsô gar durchüeben solt, daz alle dîne nâtûre alsô gar durchstorben sî, daz marc in den beinen, daz bluot in den âdern und allez daz zuo nâtûrlîcher kraft gehoeret, ob dû gerne gebresten woltest, daz dû ez niht vermügest. Ez ist ein vrâge under den meistern, ob der mensche dâ zuo müge komen, daz er niht sünden müge in disem lîbe? Die besten meister sprechent: jâ. Daz sult ir alsô verstân. Die liute hânt sich alsô durchüebet innen und ûzen, daz sie sich zuo keinem gebresten geneigen mügent. — Bî dem andern vische sulle wir verstân volbringunge aller tugende, alsô daz wir alle tugende haben vollebrâht in uns, daz wir ez niht enwizzen, daz die tugende unser wesen sî worden, daz wir bekennen unde minnen enboven alle tugende. Der mensche, der her zuo komen ist, der liuhtet ein lûter lieht. Die meister sprechent von vierleie lieht. Daz êrste ist nâtûrlich; daz liuhtet nâtûrlîchen liuten, die vil behendikeit kunnen in der zît, und ist in mê schade denne vrume. Daz ander ist ein gnâdenrîche lieht. Swem daz liuhtet, der vertilget daz nâtûrlîche lieht alzemâle; daz liuhtet dem menschen ûf dem wege sîner behaltenisse, alsô daz er in gnâden behalten wirt, ob er im volgen wil ûf daz aller nêhste. Daz dritte lieht daz liuhtet den engelen unde dem menschen, der dâ stêt in sîner êrsten unschulde. Der mensche der enpfâhet von gote mit den engelen alliu dinc, wizzet, der mensche muoz enblœzet sîn aller irdischer sache unde aller geschaffenheit und alsô blôz, als er ûzer got gevlozzen ist. Der mensche vermac, daz der engel niht vermac: er mac in disem liehte komen über alle engel, daz er alliu dinc enpfâhet von dem ursprunge götlîcher wârheit. Dâ wirt im gegeben ein götlîch lieht, daz ist daz vierde lieht, dâ von wir nimmê sprechen. Ich wil mir selber daz behalten.

Hie kumt diu tohter zuo dem êrbêren bihter unde sprichet ‘herre, ich weiz niht, ob mîn immer rât sol werden.’ Er sprach ‘wie?’ Si sprach ‘ich hân noch an ze vâhende alle tugende. Ich weiz niht, daz ich eine tugende ie volbrâhte ûf irn hœhsten adel, als ich solte.’ Er sprach ‘lâ dir genüegen, als dû getuost daz dû vermaht.’ Si sprach ‘ich getet nie daz ich vermohte unde weiz doch wol, daz ich gote schuldig bin drîerleie schulde. Diu êrste schulde ist bezzerunge für mînen gebresten.’ Er sprach ‘alle menschen möhten niht gebezzeren einen gebresten, got wolte in dan von minnen vergeben.’ Si sprach ‘daz weiz ich wol. Ich solte doch billiche daz mîne tuon und in bezzerunge blîben biz an mînen tôt ûf gnâde.’ Er sprach ‘waz ist diu ander schulde?’ Si sprach ‘daz ich gerne wære in dem freuden unsers herren unde daz ich nie dâ nâch gelebt als ich solte, unde weiz doch wol, wer dar komen wil, der muoz ez mit lebenne ervollen in unserm herren Jêsû Kristô.’ Er sprach ‘dû hâst reht. Sag mir, waz ist diu dritte schulde?’ Si sprach ‘ob noch helle noch himelrîche enwêre, sô solt ich doch dem minner nâch gân von rehter minne als er mir vorgegangen hât, und solte ime volgen ûf daz aller hœhste sunder warumbe. Dise schulde bekenne ich wol unde bezzer mich niht, als ich solde.’ Er sprach ‘waz woldest dû mê tuon? Dû hâst doch gelâzen êre unde guot, friunde unde mâge und allen den trôst, den dû von crêatûren hâtest.’ Si sprach ‘herre, daz ist wâr nâch rede.’ Si sprach ‘hêt ich allez daz got ie geschuof unde lieze daz allez durch got, ich hête niht gelâzen, wan ez was mîn niht, ez was gotes. Waz guot heizen mac, daz ist gotes: her umbe weiz ich wol, daz ich noch ze lâzenne hân, daz ich lâzen sol.’ Er sprach ‘waz solt dû lâzen?’ Si sprach ‘daz sol ich mich selber. Wenne ich mich gelâze an allen den stücken, dâ ich mich vinde, sô mac ich sprechen, daz ich mich gelâzen habe.’ Er sprach ‘dû hâst wâr; mich hât wunder, alsô zart als dû wære, waz dû lîden mügest die grôzen smâcheit, diu dich übergêt.’ Si sprach ‘got weiz wol, des enhân ich kein bevinden.’ Er sprach ‘berüeret dich niht, daz dîne friunde, geistlich unde weltlich, durch dînen willen sô betrüebet sint und sie des dunket, daz dû allez unreht tuost?’ Si sprach ‘waz sol mir daz geseit? Ich wêne wol, daz Kristus weste, dô er in dem tempel saz, daz sîn muoter unde Joseph betrüebet wâren, dô sie in suohten. Die meister sprâchen zuo Kristô: dîn vater unde dîn muoter suochent dich. Kristus sprach: wer mir guot tuot, der ist mîn vater unde mîn muoter unde mîn swester unde mîn bruoder.’ Er sprach ‘dû seist wâr. Ich bite dich, daz dû dîne nôtdurft nemist, wenne man dir sî geben wil dur got.’ Si sprach ‘bescheident mich, waz rehtiu nôtdurft sî.’ Er sprach ‘wiltû bescheiden sîn rehter nôtdurft?’ Si sprach ‘jâ.’ ‘Daz ist brunne unde brôt und ein rok: daz ist rehte lîplich nôtdurft.’ Si sprach ‘nû bescheident mich nôtdurft.’ Er sprach ‘daz ist daz wir der aller versmæhteste mensche werden in Kristô, der einer lebet.’ Si sprach ‘nû lône iu got, bitet für mich, daz got allen crêatûren urloup gebe, daz sie mich urteilen in daz aller niderste unde daz mich alle menschen marteren nâch ir willen.’ Er sprach ‘des sol dir gnuoc geschehen, wiltû dem nâch gân daz dû bekennest.’ Ein heilige sprichet: weste got einen menschen, der allez daz lîden möhte, daz alle menschen geliten hân, daz gêbe er im allez ze lîden ûf daz, daz sîn wirdikeit deste mêr wêre in êwikeit. Diz tuot got durch lûtere minne allen den, die er zuo im geruofen mac. Ein meister sprichet, daz nieman lîdens wert sî wan der sîn von herzen begert. Er sprach ‘tohter, dû hâst reht. Ich bite dich, daz dû blîbest in disem lande und üebe dich wenne dû wilt.’ Si sprach ‘des enwil ich niht tuon: ich wil daz mîne tuon, ich wil in ellende gân und in alle die stete, dâ ich durchêhtet werden mac. Ir sult wizzen, daz ich in der minsten versmêhede mê gotes hân funden denne von aller der süezikeit, diu mir von crêatûre ie geschach.’ Er sprach ‘des enstrâf ich niht, wan ez ist wâr. Kristus hât uns bewêret mit dem worte daz er sprach zuo sînen jungeren ‘ir sult gân an alle die stete, dâ ir durchêhtet werdet.’’ Si sprach ‘nû gesegen iuch got unde habent mînen dienst zwischen mir unde gote.’ Er sprach ‘kum zuo mir, swâ dû mich vindest.’ ‘Daz tuon ich gerne.’

Sant Paulus sprichet von den heiligen martirêren unde von den vriunden unsers herren ‘sie sint tôt.’ Daz sulle wir alsô verstân, daz wir tôt müezen sîn. Ich spriche: wer niht ze grunde tôt ist, der mac die minnestên heilikeit niht bekennen, die got sînen geminneten vriunden ie offenbârete. Ir sult wizzen, alsô lange als dû weist, wer dîn vater unde dîn muoter ist gewesen in der zît, sô wizzest, daz dû des rehten tôdes tôt niht enbist. Ich spriche mê: alsô lange als dich daz berüeret, daz man dîne bihte niht hoeren wil noch dir gotes lîchnam niht geben wil noch dich nieman herbergen wil und alle menschen dich versmæhen, als lange dû daz vindest in dir, daz dich daz berüeren mac, sô wizzist, daz dû dem rehten tôde vremde bist. Dû solt wizzen: wenne dû in dir niht envindest, wannân dû komen bist von irdischer art, unde dir vergezzen ist aller êre getête unde waz dir ie geschach in der zît, daz dir des alsô gar vergezzen ist, daz ez nimmer in dir erbildet noch dû niht in dir envindest denne einen lûteren ûfganc dîner sêle, sô maht dû sprechen, daz dû ze grunde tôt sîst. Sô wizzest: wer alsus tôt ist, der blîbet an allen dingen in einer glîcheit stênde, daz in niht berüeren mac. Her ûf sprichet sant Johannes ‘sêlic sint die in got sterbent.’ Nû prüevent, lieben vriunde, wie guot sterben ist in got. Wir mügen frœlîche sterben ûf daz, daz got lebe in uns und alliu werc in uns wirke und wir der ledic sîn. Wir müezen doch sterben, wizzit, daz ist ein senfte tôt. Manige liute sprechent von der heiligen leben, waz sie geliten haben. Der dâ von reden wolde, waz unsers herren vriunde geliten hânt, dem wære daz zît ze kurz. Ich spriche: sie hânt niht geliten: mit der aller minsten bevindunge, daz sie ie gotes bevunden, dâ hâten sie alles irs lîdens vergezzen. Diz geschiht wol, die wîle diu sêle imme lîbe ist. Ich spriche mê: der mensche mac dar zuo komen imme lîbe, daz im vergizzet aller sîner arbeit, daz er ir nimmer mê gedenket. Ich spriche mê: wer von minnen niht enlîdet, dem ist lîden lîden und ist im swære. Wer aber von minnen lîdet, der enlîdet niht unde daz lîden ist fruhtbêr vor gote. Her umbe, lieben vriunde, müge wir gerne sterben in gote, daz wir sunder lîden sîn an allen dingen. Wizzet, wer diz hât bevunden, der ist ze grunde tôt. Daz wir alsus sterben in gote, des helf uns der vater unde der sun unde der heilige geist. Âmen.

Nû kumt diu vor genante tohter zuo ir bihtvater und sprichet in an ‘herre, hœret mich durch got.’ Er sprach ‘wannân kumest dû?’ Si sprach ‘von verren landen.’ Er sprach ‘von waz landen bistû?’ Si sprach ‘herre, bekennet ir mich niht?’ Er sprach ‘weiz got, nein ich.’ Si sprach ‘daz ist mir ein zeichen, daz ir iuch selbe nie bekantent.’ Er sprach ‘daz ist wâr. Ich weiz wol, bekante ich mich selber als ich solte ûf daz nêheste, sô kante ich alle crêatûren ûf daz aller hœhste.’ Si sprach ‘daz ist wâr. Herre, dise rede lâze wir belîben. Hœret mich durch got.’ Er sprach ‘gerne, nû sag an.’ Diu tohter tuot ir bihte zuo dem êrbêren bihter alsô, als ez nû in ir ist, daz sîn sêle iu im selber errewet wirt. Er sprichet ‘liebe tohter, kum schiere zuo mir.’ Si sprichet ‘füeget ez got, ez ist mir liep.’ Er gêt hin zuo sînen brüedern unde sprichet ‘ich hân einen menschen gehoeret, ich weiz niht unde zwîvel dar an, ob er mensche oder engel sî. Ist er ein mensche, sô wizzet, daz aller sîner sêle krefte wonent mit den engeln in dem himel und sîn sêle hât enpfangen ein engelwesen. Si kennet unde minnet über alle menschen, der ich kunde ie gewan.’ Die brüeder sprechent ‘gelobet sî got.’ Der bihter suochet die tohter, wâ er si weiz und in der kirchen unde bitet si getriuwlîche, daz si mit im rede. Si sprichet ‘bekennet ir mîn noch niht?’ Er sprichet ‘nein ich, daz weiz got.’ ‘Sô wil ich ez iu von minnen sagen. Ich bin der arme mensche, den ir ze gote gezogen hânt.’ Dô offenbâret si im, wer si sî. Er sprichet ‘ach mich armen man, wie mac ich mich sô wol schamen vor den ougen gotes, daz ich sô lange geistlichen schîn hân gehabt und ich sô wênic bevunden hân götlîcher heimlicheit.’ Er sprichet ‘ich bite dich, liebe tohter, durch die minne, die dû ze gote hâst, daz dû mir offenbârest dîn leben und dîne üebunge, die dû sider hâst gehabt, sît ich dich ze jüngeste sach.’ Si sprichet ‘dâ wêre vil von ze sagenne.’ Er sprichet ‘ez mac niht ze vil gesîn, ich hœre ez gerne. Wizzest, mir ist vil wunders von dir geseit.’ Diu tohter hebt an unde seit dem bihter unde sprichet ‘ir sult mich nimmer vermelden, die wîle ich lebe.’ Er sprichet ‘ich gib dir mîne triuwe, daz ich dich nimmer vermelde en dîner bihte, die wîle dû lebst.’ Si sleht ûz unde seit im alsô vil wunders, daz ez in wunder hât, daz ein mensche ie sô vil möhte gelîden. Si sprichet ‘herre, mir gebristet noch. Ich hân in mir funden, daz ich daz allez übergangen hân, des mîn sêle begert hêt, ân alleine, daz ich niht bin an gesprochen von mînem glouben.’ Er sprach ‘gelobet sî got, daz er dich ie geschuof.’ Er sprach ‘nû solt dû dir lâzen genüegen.’ Si sprach ‘nimmer als lange als mîn sêle blîben hât in der stat der êwikeit.’ Er sprach ‘mir genüegete wol, hête mîne sêle den ûfganc, den dîne hât.’ Si sprach ‘mîn sêle hât einen ûfganc an aller hindernisse; si hât aber niht ein stête blîben. Wizzet, der wille benüeget mir niht, weste ich, waz ich tuon solte dar umbe, daz ich bestêtet würde in der stêten êwikeit.’ Er sprach ‘hâst dû sîn alsô grôz begirde?’ Si sprach ‘jâ.’ Er sprach ‘des selben muostû blôz sîn, ob dû immer bewert wirst.’ Si sprach ‘ich tuon gerne’ unde setzet sich in eine blôzheit. Dâ ziuhet si got in eime götlîchen liehte, daz si wênet ein mit got sîn. Als lange als daz wert dâ wirt si geslagen mit einer überswenker götlîcher bevindunge wider in sich selber, daz si sprichet: ich weiz wol, daz mîn nimmer rât mac werden. Der bihter gêt dike zuo der tohter unde sprichet ‘sage mir, wie gêt ez dir nû?’ Si sprichet ‘ez gêt mir übel, mir ist himel und ertrîche ze enge.’ Er bitet si im etewaz sagen. Si sprichet ‘ich weiz sô liehtes niht, daz ich sagen müge.’ Er sprichet ‘tuo ez durch got, sage mir ein wort.’ Er gewinnet ir eines abe mit minnen. Dâ ret si mit im alsô wunderlîche und alsô tiefe sprüche von der blôzen bevindunge götlîcher wârheit, daz er sprichet ‘wizzist, diz ist allen menschen fremde, unde wære ich niht ein solich pfaffe, daz ich ez selber gelesen hête von götlîcher kunst, sô wære ez mir ouch fremde.’ Si sprichet ‘des gan ich iu übele: ich wolde, daz irz befunden hêtet mit lebenne.’ Er sprichet ‘dû solt wizzen, daz ich sîn alsô vil befunden hân, daz ich ez alsô wol weiz, als ich weiz daz ich hiute messe sprach. Wizzist, daz ich ez niht mit lebenne besetzen hân, daz ist mir aber leit.’ Diu tohter sprichet ‘bitet got für mich’ unde gêt wider in ir einôte unde gebrûchet sich gotes. Die wîle wert aber niht lange, si gêt wider für die porte unde heischet ir êrbêren bihter unde sprichet ‘herre, vreuwet iuch mit mir, ich bin got worden.’ Er sprichet ‘des sî got gelobet! Ganc wider von allen liuten in dîn einôte: blîbest dû got, ich gan dir sîn wol.’ Si ist dem bihter gehôrsam unde gêt in die kirchen in einen winkel. Dâ kam si dar zuo, daz si alles des vergaz, daz ie namen gewan, unde wart alsô verre gezogen ûzer ir selber unde ûzer allen geschaffenen dingen, daz man si ûz der kirchen muoste tragen, unde lac biz an den dritten tac unde heten si sicher für tôt. Der bihter sprach ‘ich geloube niht, daz si tôt sî.’ Wizzet, wære der bihter niht gewesen, man hête si begraben. Man versuohte si mit allem dem, daz man kunde: ob diu sêle in dem lîbe wære, des kunde man nie bevinden. Man sprach ‘sicher, si ist tôt.’ Der bihter sprach ‘sicher, si enist.’ An dem dritten tage kam diu tohter wider. Si sprach ‘ach, mich arme, bin ich aber hie?’ Der bihter was gereite dâ und rette zuo ir und sprach ‘lâ mich genieẓen götlîcher triuwen und offenbâr mir dîner bevindunge.’ Si sprach ‘got weiz wol, ich enmac. Daz ich befunden hân, daz mac nieman gewortigen.’ Er sprach ‘hâstû nû allez daz dû wilt?’ Si sprach ‘jâ, ich bin bewêret.’

Gelobet unde geëret sî der name unsers herren Jêsû Kristî, daz er uns geoffenbâret hât, daz wir erkriegen mügen in gnâde daz er selber ist von nâtûre. Ez muoz sîn ein got lidender mensche, der sich selber undertritet und alliu geschafniu dinc. Der mensche muoz sterben fünf tôde. Der êrste tôt ist, daz er sterbe aller nâtûrlîcher dinge. Alse der mensche tôt ist aller nâtûrlîcher dinge, denne stêt der geist in sînem werke. Nochdanne mac der mensche gevallen in sînen êwigen tôt. Daz ist uns bewêret mit Lucifer. Der was ein lûter geist in im selber, der viel von im selber und sol êwiclîche vallen. Her umbe sulle wir sterben imme geiste, daz unser geist vergeistet werde in den geist der wârheit. Hie sulle wir an vâhen ze lebenne, in dem leben unsers herren Jêsû Kristî, unde sullen volgen sînen sprüchen unde sînem bilde ûf daz aller hœhste. Dâ sulle wir sterben in unserm herren Jêsû Kristô in der wârheit, die er selber ist und alsô als er selber tôt ist an der menscheit. Nû sulle wir ûfstân mit unserme herren Jêsû Kristô unde sullen leben in dem leben des lebens. Dâ kume wir in dem sune zuo dem vater. Dâ wirt dem menschen ein slag des tôdes unde wirt geslagen in sich selber von dem götlîchen liehte. Dâ lernet der mensche sich selber erkennen. Dâ ist im vergeẓẓen alles des guotes, daz im got ie getet von sîner bekantnisse. Gedenke, wort, wille unde werc stânt vor im offen in dem widerblicke des götlîchen liehtes, daz er dâ von dem vater enpfangen hât. Hie verurteilet sich diu sêle in dem götlîchen liehte under alle crêatûre. Si vindet keine stat, dâ si blîben müge. Si dunket sich bœser dan die snœdeste crêatûre, die got ie geschuof. Lucifer ist ir alze guot, si verurteilet sich under in. Daz ist dâ von die meister sprechent, daz Kristî sêle unde Lucifers in eime liehte geschaffen wurde. Hie vinde wir der sêle jâmer, dâ von si sich urteilen muoz. Kristî sêle was diu aller wîseste sêle, diu ie wart: si kêrte sich in dem gescheffede gên den schepfer. Dar umbe cleidete sî der vater mit eime götlîchen cleide und eigenschaft der nâtûre. Lucifer der kêrte sich zuo gebresthaftigen dingen: dâ von viel er unde sol êweclîche vallen. Noch vallent alle die, die sich von gote kêrent an zergenclichiu dinc. Hie vindet sich diu sêle inne unde vernihtet sich in ir selbe unde wil dâ ligen êweclîche, wan si diu ist, diu sich verschuldet hât.

Die aller besten meister sprechent, daz von dem aller nidersten engele, der in dem himel ist, ein tropfe sî gevallen ûf den obersten himel, dâ von hânt alle himel ir louf unde loufet ieclich himel alsô verre, als ime diu nâtûre gegeben hât, unde tragent den einen tropfen umbe. Von dem enpfindent alle crêatûre ir leben, die ie leben gewunnen in der zît, hie inne îlent alle crêatûre zuo ir êrstem ursprunge. Hie bevindet diu sêle, daz alsô wênec gotes ist gewesen in der zît, daz wir werken sullen alliu werc obwendig der zît in êwikeit. Daz ist uns bewêret mit Kristô. Er würket alliu werc in êwikeit. Hête got ie kein werc ûzer ime geworht, sô wære er got niht gewesen. Alsô wirket got alliu sîniu werc, daz sie in ime blîbent. Alsô sulle wir tuon unseren werken, sô bestênt sie in êwikeit. Daz sulle wir alsô verstân: daz heizet mîn unde blîbet in mir, daz mir nieman genemen mac. Hie wirt diu sêle geslagen unde sprichet ‘ach, daz ich alsô manic werc ûzer mir geworht hân!’

Hie sprechent die meister von nâtûre. Nâtûre unde nâtûrlicheit sint niht ein. Nâtûrlicheit ist an genomen in der zît, nâtûre ist êwic in ir selber. Diz sleht diu sêle. Die meister sprechent, daz der tunre kome niergen von denne von unglîcheit. Des enwellent die wolken niht in in lîden, daz in unglîch ist, unde stôzent zesamen: dâ von kumet der tunr unde der widerblic. Alsus tuot der wint unde wêt alsô lange biz er ûzer im getrîbet daz im unglîch ist; daz ist der regen. Alsus reingent sich alle crêatûren von dem, daz in unglîch ist. Hie bevindet diu sêle, daz si dike hât in ir gelâzen wonen daz ir unglîch was. Si sprichet ‘alle crêatûren hânt mich gewîset zuo mîner êwigen sêlikeit. Des entäten sie Lucifer niht: er viel von ime selber sunder enthalt von der unglîcheit, die er an sich nam. Hie hât mich got enthalten in im selber. Des enwolte ich nie bekennen: dar umbe mac ich nimmer gnâde gesuochen.’ Hie wil si ligen unde von ir selber nimmer ûf komen. Dâ sprechent die meister, daz got muoz von nâtûre in sich ziehen sîn glîch von sîns selbesheit, als diu sunne ziuhet ûf daz wazzer an sich. Dâ wirt diu sêle vereinet in der blôzen gotheit, daz si nimmer mêr müge funden werden, als vil als ein tropfe wînes mitten in dem mer. Als vil got vallen mac, als vil mac der mensche gevallen in keinen gebresten. Der mensche heizet ein gotformelich mensche. Got ist in der persône ein wirkende werkmeister. Der mensche hât ein wâr bevinden aller dinge. Sie stênt in im âne bilde, die wîle er ein ist in got unde alliu dinc in ime sint. Hie bestêt daz wort, daz alliu dinc in dem menschen sint âne bilde. Die meister sprechent: wer eine sêle welle mezzen, der sol si nâch gote mezzen, wan der grunt gotes unde der grunt der sêle sint ein wesen. Daz minneste teil der sêle daz ist daz dem lîbe leben gît. Der mensche, der diz mit leben hât erfüllet, der hât in ime eine niwe wunne âne underlâz. Alleine der mensche wandelen muoz in der zît, joch sô stêt er in dem wesen sîner êwigen weslicheit. Er hât die stat besezzen der wârheit. Disen menschen sol man prüeven an fünf stücken. Daz êrste ist, daz er nimmer clêglich wort gesprichet. Daz ander ist, daz er sich nimmer entschuldiget, swaz man ûf in ret, er lâze sich die wârheit berihten. Daz dritte ist, daz der mensche in himelrîche noch in ertrîche niht begert denne als got wil von im selber. Daz vierde ist, daz er in der zît nimmer berüeret enwirt. Daz fünfte ist, daz er nimmer mê ervrewet wirt: er ist selber diu vreude.

Hie kumt der êrbêre bihter unde suochet die tohter in eime vremden lande unde bitet si getriulich durch got, daz si mit im rede. Si sprichet ‘ich rede wol von ûzern dingen mit iu.’ Er sprichet ‘daz ist mir liep. Sage mir, waz dunket dich, daz dich aller meist gefüeget habe zuo der êwigen wârheit.’ Si sprichet ‘daz ist, daz ich mich gelâzen hân wâ ich mich vant. Daz ander, daz ich mich nie entschuldigete waz man ûf mich redde, daz mich aleine an gienc. Daz dritte, daz ich nie sô vil pîne geleit, ich gerte ir mê unde dûhte mich, daz ich ez billiche lîden solde. Daz vierde, daz ich mich alle wege dâ zuo fuogte, daz ich der minste mensche was und arm und abgescheiden von allem trôste, der mir von crêatûre werden mohte. Daz fünfte, daz ich nie menschen gesach an sînem gebresten, ich strâfte in dar umbe, unde daz ich nie gehôrte daz wider dem êwangelio was unde wider Kristî leben, ich gêbe mînen lîb dar umbe in den tôt. Ir sunt wizzen, daz ich dar umbe mê geüebet bin, daz ich diu liute gestrafet hân umbe ir gebresten, dâ ich sie bekante in ir êwigem schaden. Daz sult ir wizzen, daz ich daz niergent umbe tet denne von lûterr minne durch got, wan sie mich erbarmten. Wizzet, daz mich diu liute versmêhet hânt mit manigem smêhelichen worte. Daz sehste, daz ich nie die stat geschuohte, dâ man mich versmâhte: wan wâ man mir êre bot, dannân flôch ich, unde wâ man mich versmâhte, dâ blieb ich. Daz sibende, daz ich nie hinder mich gesach, sît ich ûf den wec gewîset wart zuo mîner êwigen sêlicheit, unde daz ich keiner crêatûre rât nie gevolgete, wan daz ich allez für mich gienc in eime rehten ernste. Daz ahte, daz mir nie benüegete alles des liehtes, dar în ich gesetzet wart, noch mit aller der beschöude, daz was mir allez niht, sît ich bewêret wart. Daz niunde, daz ich gote nie enbleip, waz got ie durch mich gewerken wolde. Daz zehende, daz ich mich innen und ûzen üebete ûf daz aller hœhste.’ Er sprach ‘gelobet sî got! Nû hâstû mir geseit von ûzerr üebunge: nû sage mir von inrer üebunge.’ Si sprach ‘got weiz wol, ich fürhte, daz irs niht verstânt.’ Er sprach ‘nû sag mir doch ein wort.’ Si sprach ‘dô ich bewêret wart, dô wâren in mir alliu diu werc, diu got ie geworhte, daz was ein cleine dinc, daz under dem himel was. Mîn wonunge was in dem himele unde dâ wonte ich mit dem gesinde, daz in der drîvaltikeit wonet, unde was mir alsô wol bekant als eime guoten man sîn hûs, dâ er inne wonet, unde bekante underscheide aller crêatûren und alles gescheffedes gotes: des hâte ich alsô underscheide, als ich hân fünf vinger in mîner hant.’ Er sprach ‘des sinnes beriht mich baz.’ Si sprach ‘ich tuon. Ich hête aller mîner sêle krefte gezemt. Wenne ich in mich sach, sô sach ich got in mir und allez daz got ie geschuof in himelrîche und in ertrîche. Des wil ich iuch noch baz berihten. Ir wizzet wol, wer in got gekêret ist unde in den spiegel der wârheit, der siht allez daz, daz in dem spiegel geriht ist, daz sint alliu dinc. Diz was mîn inre üebunge, ê ich bewêret wart. Habet ir den sin wol verstanden?’ Er sprach ‘ez muoz von nôt wâr sîn.’ Er sprach ‘ist dîn üebunge nû niht alsô?’ Si sprach ‘nein. Ich hân mit engeln noch mit heiligen niht ze schaffende noch mit allen crêatûren noch mit allem dem, daz ie geschaffen wart; prüevet selber vil ebene: niht alleine daz ie geschaffen wart, mê: daz ie gewortiget wart, dâ hân ich niht ze schaffende.’ Er sprach ‘des berihtet mich.’ Si sprach ‘daz tuon ich. Ich bin bewêret in der blôzen gotheit, dâ nie bilde noch forme inne wart.’ Er sprach ‘bistû dâ allez stêteclîche?’ Si sprach ‘jâ.’ Er sprach ‘wizzest, dise rede hœre ich gerne, liebe tohter, rede für baz.’ Si sprach ‘dâ ich stân dar mac kein crêatûre komen in crêatûrlîcher wîse.’ Er sprach ‘verrihte mich baz.’ Si sprach ‘ich bin dâ, dâ ich was, ê ich geschaffen wurde, daz ist blôz got unde got. Dâ ist weder engel noch heilige noch kœre noch himel. Manige liute sagent von aht himeln unde von niun kœren; der enist dâ niht, dâ ich bin. Ir sult wizzen, allez daz man alsus wortiget unde den liuten für leit mit bilde, daz ist niht dan ein reizen ze gote. Wizzet, daz in got niht ist dan got; wizzit, daz kein sêle in got komen mac, si werde ê got alsô, als si got was, ê si geschaffen wurde.’ Er sprach ‘liebe tohter, dû seist wâr. Nû tuo ez durch got unde rât mir dînen nêhesten rât, wie ich her zuo kome, daz ich diz guot besitze.’ Si sprach ‘ich gib iu einen getriwen rât. Ir wizzet wol, daz alle crêatûren sint von nihte geschaffen unde müezen wider ze nihte werden, ê sie in iren ursprunc koment.’ Er sprach ‘daz ist wâr.’ Si sprach ‘sô ist iu gnuoc geseit. Prüevet, waz ist niht?’ Er sprach ‘ich weiz, waz niht ist unde weiz wol, waz minner ist dan niht. Daz soltû alsô verstân: alliu gebresthaftigiu dinc sint vor gote niht. Wer denne gebresten üebet, der ist minner denne niht.’ ‘War umbe?’ ‘Er ist des gebresten kneht. Niht ist niht. Wer dem nihte dienet, der ist minner denne niht.’ Si sprach ‘daz ist wâr. Har nâch rihtet iuch, ob ir zuo iwerm guote komen welt, unde sult iuch vernihten under iuch selber und under alle crêatûre, alsô daz ir niht enpfindet, daz ir mê ze tuonne habet, daz got in iu wirken müge.’ Er sprach ‘dû seist wâr. Ein meister sprichet: wer got minnet für sînen got unde got an betet für sînen got unde im dâ mite lâzet genüegen, daz ist mir als ein ungeloubic mensche.’ Si sprach ‘sêlic sî der meister, der diz ie gesprach: er bekante die wârheit. Ir sult wizzen, wer im dâ mite lâzet gnüegen, mit dem daz man gewortigen mac: got ist ein wort, himelrîche ist ein wort, der niht für baz wil komen mit der sêle kreften, mit bekentnisse unde mit minne denn ie gewortiget wart, der sol billiche ungloubic heizen. Waz man wortiget daz begrîfent die nidersten sinne oder krefte der sêle. Dâ mite genüeget den obersten kreften der sêle niht: sie dringent immer für baz, biz sie koment in den ursprunc, dâ diu sêle ûz gevlozzen ist. Ir sult doch wizzen, daz diu kraft der sêle in den ursprunc komen enmac. Die niun krefte der sêle die sint alle knehte des mannes der sêle unde helfent dem manne für den ursprinc unde ziehent in ûz den nidersten dingen. Als diu sêle stêt in ir magenkraft ob allen geschaffenen dingen vor dem ursprunge, sô blîbent alle die krefte hie ûze. Daz sult ir alsô verstân. Ez ist diu sêle blôz unde nakent aller namhaftiger dinge, sô stêt si ein in ein, alsô daz si ein fürwertgân hât in der blôzen gotheit, als daz oleum ûf dem tuoche, daz vihtet allez für baz: alsus vihtet diu sêle für baz unde fliuẓet immer für unde für als lange als daz got geordent hât, daz diu sêle muoz geben dem lîbe wesen in der zît. Wizzit, als lange als der guote mensche lebet ûf ertrîche, sô hât sîn sêle ein fürgân in der êwicheit. Her umbe hânt guote gerne daz leben. Er sprach ‘tohter, dû hâst wâr. Ein meister sprichet: lægen zwei menschen an irm tôde unde stüenden in glîcher minne vor den ougen gotes unde solten beide sterben, daz eine stürbe vor dem andern alsô lange, daz daz ander einen siufzen möhte getuon gên got oder einen gedanc nâch der aller minster marter, die got ie geleit, oder nâch dem minsten worte, daz got ie gesprach, daz hête er immer mê enbor zuo eime prîsande vor dem andern, daz dâ vor gestorben ist, als lange als got êwic ist.’ Si sprach ‘daz ist wâr: daz sult ir alsô verstân. Als diu guoten ûf gênt, alsô gênt lie bœsen nider die in gebresten sint.’ ‘Eyâ, liebe tohter, nû berihte mich. Man seit von helle unde von vegefiure unde von himelrîche unde dâ von lesen wir gar vil. Nû lesen wir ouch, daz got ist in allen dingen und alliu dinc sint in gote.’ Si sprach ‘daz ist wâr.’ Er sprach ‘nû berihte mich durch got, wie ich diz sülle verstân ûf der nêhsten wârheit.’ Si sprach ‘daz tuon ich gerne, als verre ichz gewortigen mac. Helle ist niht dan ein wesen. Waz hie der liute wesen ist, daz blîbet êwiclîche ir wesen, alsô ob sie drinne funden werden. Menge liute wênent hie haben ein wesen der crêatûre unde wênent dort besitzen ein götlîch wesen. Des enmac niht sîn. Wizzet, daz vil liute dâ inne wirt betrogen. Daz vegefiur ist ein angenomen dinc als ein buoze, daz nimt ende. Daz sult ir alsô verstân. Etelîche liute êrent got alsô sêre unde die friunde gotes, daz sich got dur nôt über sie erbarmen muoz, wêr ez doch niht ê dan an irm ende, daz in werde ein rehte riuwe in minne und in bekantnisse, daz sie sich habent ûzer in selber und ûzer allen geschaffinen dingen. Dâ wirt rehte minne ir wesen, alsô ob sie langer solten leben, daz sie nimmer gebresten solten geüeben und allez daz wolten lîden von rehter minne, daz unser herre Jêsus Kristus geliten hât und alle sîne geminten friunde. Dise liute koment ûf, daz in gnâden geschiht. Mêr: die liute, die in ir wesen hinnân varnt der crêatûrlicheit, die müezent êwiclîche blîben mit ir wesen, daz dâ heizet helle. Alsus blîbet ouch den ir wesen, die dâ niht in in blîben lâzent denne got alleine; dâ wirt got ir wesen und blîbet êwiclîche ir wesen. Diz sult ir alsô verstân. Man seit von dem jungesten tage, daz got sol urteil geben. Daz ist wâr. Ez ist aber niht als die liute wênent. Ieclîch mensche urteilt sich selber alsô: als er dâ erschinet in sînem wesen, alsô sol er êwiclîche blîben. Nû sprechent menge liute: der lîcham sülle erstân mit der sêle. Daz ist wâr. Ez ist aber niht als die liute verstênt. Daz wesen des lîbes kumt zuo dem wesen der sêle unde wirt dâ ein wesen. Die sêlen, die ir zît in gote verzert hânt alle ir tage unde got ir wesen ist gewesen, dâ blîbet got ir wesen lîbes unde sêle êwiclîche. Alsus geschiht niht den bœsen, die ir zît mit geschefte vertân hânt der crêatûre, unde daz ir wesen ist gewesen, daz blîbet dâ ir wesen unde sinkent êwiclîche von gote und von allen sînen friunden, unde daz heizet man helle. Diz sult ir alsô verstân, daz die selben liute hânt ir wesen von gote, want si enwæren anders niht. Alsus sint sie in gote unde got ist in in. Wizzent, si hânt daz wesen von gote. Nû verstânt. Sie sint alsô in gote als ein man, der sînen lîp verworht hât gegen einem rehten künige, alsô daz er im hât sîn êre genomen unde sînen friunden und im dike an sînen lîp gerüeret hât, unde der herre hêt im nie niht dan guot getân und er wênet, daz er sich bezzern sülle, und ergert sich alle zît, alsô daz er siht, daz er sich nimmer gebezzeren wil. Der künic begrîfet den man mit rehtem gerihte unde tœtet sîn niht. Daz tuot er dar umbe, daz er im die smâcheit gelten wil, die er im getân hât. Bî dem êrsten bindet man im hende unde füeze unde wirfet in den understen turm under krotten und slangen und in daz unflêtige wazzer, daz in dem understen turne pfliget ze sîne. Dar nâch nimet man in ûz unde setzet in an ein smæhe stat, daz alle liute sehen sîn offenbar laster, und er siht aller liute vreude. Deste mêr ist sîn pîne. Alsus tuot man im eine smâcheit über die ander, die smêhelichesten die man erdenken mac, unde wirfet in alle wege wider în und ist alle zît wartende, wenne man in verderben welle. Alsus mac man sprechen: der man ist in des küniges hove, wan der turm ist als wol in des küniges hove als der sal, dâ der künic ist mit sînen geminten friunden, unde doch verstêt ir wol, daz ir wesen unglîch ist. Alsus ist niht dem himelischem volke, von dem wir dâ vor gesprochen hân. Ir sult wizzen, daz daz jâmer êwiclîche wern muoz. Wizzet, mich hât wunder, swer dise rede hœret daz der sünden getar. Ir sult wizzen, daz daz vegefiur alsô angeslich in im selber ist, wer ez rehte erkante, er blîbe keine wile in gebresten. Daz vegefiur sult ir alsô verstân: daz ist nâch der zît unde nâch reden. Swenne diu sêle von dem lîbe scheidet alsô, als ich dâ vor geret hân, in triwen unde minnen unde willen alliu dinc ze tuon durch got und allen gebresten abe ze lâzen durch got, sô wizzet, daz diu sêle stêt in grôzem jâmer, wan si niht mê enmac unde si des wartet, wenne sich got über si erbarmen welle. Unde wêr ez doch niht ê dan an dem jüngesten tage, diu hoffenunge ist ir wesen. Ir sult wizzen, daz diz allez abe gêt nâch dem jüngesten tage. Aber die liute, die in götlîcher weslicheit stênt, die blîbent unberüeret alsô: wenne diu sêle scheidet von dem lîbe, sô blîbet si in dem wesen götlîcher weslicheit als verre, als si got bekant unde geminnet hât, unde nâch dem jüngesten tage daz wesen des lîbes mit dem wesen der sêle wirt ein wesen in der götlîcher weslicheit. Und alsô sult ir verstân, nâch dem besten meisterspruche. Endürfent ir iuch niht rihten, daz sie sagent von dem gescheffede, daz Johannes sî mit lîbe unde mit sêle ze dem himelrîche und ander die friunde unsers herren, von den man sprichet, daz sie in gote sîn mit lîbe unde mit sêle obwendic zît in êwikeit. Des enmac niht sîn. In gote mac niht gesîn dan got: dâ ist munt noch nase noch hant noch fuoz noch kein gescheffede, daz zuo dem lîchamen gehoeret. Dâ von mac diz niht bestân, daz sie mit lîbe dar sîn komen. Welt ir den sin niht verstân, dô diu zît kam, daz Johannes hin solte, dô liez im got geschehen, daz im an dem jüngesten tage geschehen solte. Daz tet er im von rehter minne, wan er als reine was. Des nam daz wesen der sêle daz wesen des lîbes mit ime mit einer götlîcher hilfe unde wart ûf gezogen. Daz sult ir alsô verstân. Der lîp, der in der erden solte verwornden sîn, der wart verzert in dem lufte, daz niht mê in got kam denne daz wesen des lîbes, daz doch der sêle gevolget hête an dem jüngesten tage. Alsus geschach Marîen und allen den, von den man sprichet, daz sie mit lîbe ze gote sîn komen.’ Er sprach ‘dû seist wâr. Dû solt wizzen, daz grôz disputacie ist gewesen under unseren besten meistern umbe dise rede.’ Si sprach ‘ich wil iu sagen, wie irz verstân sult. Wir wellen sîn komen an unsern herren Jêsum Kristum, unde prüevet an sîner ûfvart. Er az, dô er ze himel vuor. Ir wizzet wol, daz diu spîse muoste verwerden in der ûfvart, und alliu diu angenomeneheit, die Kristus an sich genomen hâte, diu bleip in der zît. Er mohte mit im niht bringen in den vater wan als ez ûz dem vater geflozzen was. Daz wesen Kristi sêle fuorte mit ir daz wesen der edelen menscheit unsers herren Jêsû Kristi mit götlîcher weslicheit. Alsus bestênt die persônen in dem vater, daz er ein ist mit dem vater. Alsus gesênt alle die in dem vater, die daz erkriegent in gnâden, daz Kristus hât von nâtûre: niht alsô, daz sie daz leben des lîbes mit in füeren ûf, der zît sô si hinnân varnt, ez muoz enplîben biz an den jüngesten tac, dâ alliu dinc ze nihte werdent, dâ wirt der sêle alrêst ir wesen des lîbes nâch gemeiner rede. Ir wizzent wol, den got begnâden wolte, er tête im daz selbe, daz er Johannes tet.’ Er sprach ‘daz weiz ich wol. Tête ich, als sant Dominicus tet, ich würde Dominicus. Sanctus Dominicus verkoufte sîniu buoch und allez, daz er hete, unde gab ez armen liuten durch got. Liebe tohter, des entuon wir niht und ander menge tugende, die sant Dominicus tet. Dâ von blîben wir daz wir sîn, wir stellen dar ûf, daz wir grôze pfaffen werden, unde leben im niht. Sant Franciscus was ein einvaltic man; dâ von tet im got grôze êre. Er gienc einvelticlîche ze gote mit volkomenem lebenne, des wart im got heimlich. Dô was ein guoter pfaffe in dem lande, der hâte des grôzen haz in im selber, daz der leie hête alsô grôze heimlicheit mit gote. Er gienc zuo im und sprach: bruoder, wie sulle wir diz verstân? Diu schrift lêret uns, daz wir die liute sullen strâfen umbe ir gebresten. Sant Franciscus sprach: daz ist guot. Der meister sprach: ich möhte den strâfen, er strâfte mich zwir als vil wider. Sant Franciscus sprach: im sol niht aldus sîn. Ich kan iu die schrift vil baz glôsen: wir sullen alsô durchdehelich leben der wârheit von volkomenem lebenne ûzen unde innen ûf daz aller hœhste, daz wir alle liute strâfen mit irm lebenne. Der pfaffe schamte sich und sprach: bruoder, ir sagent wâr. Wizzet, der noch tête, als sant Franciscus tet, der würde als sant Franciscus. Ich spriche mê: want wir dem leben enplîben, des enplîbet uns diu gnâde. Ich spriche noch mê: der minre wêre denne sant Johannes, er würde mêr denne sant Johannes.’ Si sprach ‘gelobet sî got, daz ir daz selbe bekennet.’ Er sprach ‘ich hân ez lange bekant unde weiz, daz ez wâr muoz sîn, alleine ich ime doch niht lebe.’ Si sprach ‘wizzet, daz ez mich erbarmet. Ir hânt mir geseit von niun himelen. Nû sagent mir, des ich vrâge. Râtet mir nâch iwerm besten sinne, wie ich mîn leben halten sülle, wan ir wizzet mîn leben baz dan alle menschen.’ Er sprach ‘zwâr, daz tuon ich gerne. Dû solt ezzen als dich hungert unde solt trinken als dich turstet, dû solt senfte hemde an tragen, dû solt slâfen unde senfte bestên und allez, daz dîn herze begert von spîse unde von kurzewîle, soltû an dich nemen unde solt nieman leben denne dir selber. Sêhestû vor dînen ougen allez daz versinken, daz got ie geschuof, daz soltestû niht wenden mit einem ave Mariâ unde solt dir heizen dienen alle crêatûren nâch dînem willen, gote ze êren. Dû solt tragen edel gewant, daz ist senfte, unde solt blîben in einer stat unde solt gote ûf tragen alliu dinc. Möhtestû niezen alle crêatûren, daz soltestû billiche tuon, wan welche crêatûre dû niuzest, die treistû ûf in iren ursprinc. Dû weist wol, waz dû niuzest, daz dû in gote gote ze lobe stêst.’ Si sprach ‘daz weiz ich wol, ir sagent wâr. Doch sult ir wizzen, daz ich nimmer anders gegern wil denne als ein armer mensche ze sînde biz an mînen tôt.’ Er sprach ‘dû hâst unreht.’ Si sprach ‘an dem unrechte wil ich blîben. Ich wil ellende und arm sîn, daz mac mir nieman benemen.’ Er sprach ‘ûf mîne sêle, dû tuost dîme gote unreht.’ Si sprach ‘alse wie?’ Er sprach ‘dû hâst doch daz dû wilt.’ Si sprach ‘got weiz wol, ich tuon ez niergent umbe wan der linien ze êren, diu mich geleitet hât zuo mîner êwigen sêlikeit. Als unreht als diu linie ist gewesen in ir selber in der zît und in der êwikeit, alsus wil ich sîn in der êwikeit und in der zît. Ir sult wizzen, daz ich der linien unsers herren Jêsû Kristî niht wil abe gân.’ Er sprach ‘dû solt daz wizzen, got gan dirs alles wol.’ Si sprach ‘ich nime wol alsô vil gemaches an mich, daz ich niht sô vil üebunge hân als ich hie vor hâte. Wizzet, möhte ich allen guoten liuten für baz gehelfen, die ûf dem wege sint zuo ir êwigen sêlicheit unde die noch niht bewêret sint, daz wolte ich gerne tuon; unde möhte ich allen menschen von gebresten helfen, daz tæt ich gerne durch got. Ir sult wizzen, sît unser herre Jêsus Kristus sich üebte biz an sînen tôt, sô wizzent, daz ich ouch billiche daz tuon sol. Mîn ûzeren krefte suln bekümmert sîn mit dem edelen lebenne unde mit der edelen menscheit unsers herren Jêsû Kristî unde mit sînen edelen sprüchen die wîle ich lebe in der zît. Wizzit, die obersten krefte mîner sêle die wirkent in Kristî sêle in dem himelischen vater unde sint dâ in eime wesen, dâ sie sich nimmer nider geneigent. Der heilige geist fliuzet von dem vater durch die krefte in die sêle unde wider von der sêle in got, unde ieclich kraft würket ir sunder werc hie in dem heiligen geiste und in dem vater mit dem sune, unserm herren Jêsû Kristô. Diz sult ir verstân nâch reden. Der wil wizzen alle mîne tage sît dem mâle daz ich ein guot für ein bœsez bekennen mohte.’ Er sprach ‘liebe tohter, beriht mich. Die meister sprechent: tûsent sêlen sitzent in dem himel ûf einer nâdelspitze. Sage mir, wie ich daz verstân sulle.’ Si sprach ‘die meister sagent wâr, unde daz sult ir alsô verstân. Welch sêle in got kumet, diu hât weder stat noch stunde noch kein namhaft dinc, daz man ze worte bringen mac. Mêr: ich wil iu sagen von rede, solte man die stat prüeven, diu einer sêle ze teile wirt, diu ist vil mêre denne himelrîche und ertrîche und allez daz got ie geschuof. Ich spriche mê: daz got als manig himelrîch und ertrîch hête geschaffen und als menge welt und als manige crêatûre ie geschuof, daz wære noch allez minre denne einer nâdeln spitze wider der stat, diu einer sêle ze teile wirt, diu in gote vereinet wirt.’ — Hinnen von rette diu tohter unde kam mit der rede in got unde wart von got alsô vil redende, daz der bihter allez sprach ‘liebe tohter, rede für baz.’ Diu tohter seite im als vil von der grœze gotes unde von der vermügenheit gotes unde von der fürsihtikeit gotes, daz er von allen sînen ûzeren sinnen kam unde daz man in in ein heimliche celle muoste tragen unde lac dâ inne eine lange wîle, ê er wider in sich selber kême. Dô er wider in sich selber kam, dô hât er begirde, daz diu tohter zuo im kême. Diu tohter kam für den bihter unde sprach ‘wie gêt ez iu nû?’ Er sprach ‘von herzen wol. Gelobet sî got, daz er dich ie geschuof zuo einem menschen! dû hâst mich gewîset zuo mîner êwigen sêlicheit, ich bin gezogen in ein götlîche beschöude unde mir ist gegeben ein wâr wizzen alles des, daz ich von dînem munde gehoeret hân. Eyâ, liebe tohter, ich man dich der minne, die dû von gote hâst, daz dû mir helfest mit worten unde mit werken, daz ich ein blîben dâ gewinne, dâ ich nû bin.’ Si sprach ‘wizzet, des enmac niht sîn. Ir sît ungetempert dar zuo. Wenne iwer sêle und iwer krefte gewonlich den wec ûf unde nider gênt als ein gesinde gêt ûz und în in ein hove und ir daz himelische gesinde als wol bekennet in underscheit und allez daz got ie geschuof und iu des niht gebristet, ir wizzet ez als ein man sîn gesinde weiz, danne sult ir prüeven underscheit gotes unde der gotheit. Nû sult ir ouch prüeven underscheit zwischen dem geiste unde der geistlicheit. Danne sult ir alrêst dar nâch stân, daz ir bewêret werdent. Ir sult iuch niht vergêhen, ir sult kurzewîle suochen mit crêatûren, daz ir sîn âne schaden blîbent und ouch sie iwer âne schaden blîben in in selber. Hie mite sult ir iwer krefte ûf ziehen daz ir niht râsende werdent. Diz sult ir alsô dike tuon biz die krefte der sêle gereizet werdent, biz ir dar zuo koment in daz wizzen, dâ von wir dâ vor geret hân.’ Gelobet unde geëret sî der süeze name unsers herren Jêsû Kristi. Âmen.